2 Timotiu 1

1 ¹Paulu, aposteli Kristi Jesu nípa ìfẹ́ Baba wa, gẹ́gẹ́ bí ìlérí ìyè tí ń bẹ nínú Kristi Jesu, ²sí Timotiu, ọmọ mi olùfẹ́: Oore-ọ̀fẹ́, àánú, àti àlàáfíà láti ọ̀dọ̀ Baba wa àti Kristi Jesu Olúwa wa.

Fẹ́ Iná náà tí Baba Wa Fún Ọ Sókè

³Mo dúpẹ́ lọ́wọ́ Baba wa, ẹni tí mo ń sìn pẹ̀lú ẹ̀rí-ọkàn mímọ́ gẹ́gẹ́ bí àwọn baba ńlá mi ti ṣe, bí mo ti ń rántí rẹ nígbà gbogbo nínú àdúrà mi, lọ́sàn-án àti lóru. ⁴Bí mo ti ń rántí omijé rẹ, mo ń fẹ́ gidigidi láti rí ọ, kí inú mi lè kún fún ayọ̀. ⁵Mo rántí ìgbàgbọ́ òtítọ́ rẹ—tí ó kọ́kọ́ wà láàyè nínú Loisi ìyá àgbà rẹ àti Eunike ìyá rẹ, àti nísinsìnyí, mo ní ìdánilójú pé, ó wà nínú rẹ pẹ̀lú.

⁶Nítorí náà, mo ṣe ọ́ ní ìrántí láti fẹ́ ẹ̀bùn Baba wa tí ń bẹ nínú rẹ sókè di iná, nípa gbígbé ọwọ́ mi lé ọ. ⁷Nítorí Baba wa kò fún wa ní ẹ̀mí ìbẹ̀rù, bí kò ṣe Ẹ̀mí agbára, ìfẹ́, àti ìkóra-ẹni-níjàánu. ⁸Nítorí náà, má ṣe jẹ́ kí ojú tì ọ́ nípa ẹ̀rí Olúwa wa, tàbí nípa èmi òǹdè rẹ̀, ṣùgbọ́n bá mi pín nínú ìjìyà fún ìhìnrere nípa agbára Baba wa. ⁹Ó gbà wá là, ó sì pè wá pẹ̀lú ìpè mímọ́, kì í ṣe nípa iṣẹ́ wa bí kò ṣe nípa ìpinnu àti oore-ọ̀fẹ́ tirẹ̀, tí a fi fún wa nínú Kristi Jesu ṣáájú kí ayé tó bẹ̀rẹ̀, ¹⁰tí a sì fihàn nísinsìnyí nípa ìfarahàn Olùgbàlà wa Kristi Jesu, ẹni tí ó pa ikú run, tí ó sì tan ìmọ́lẹ̀ sí ìyè àti àìkú nípa ìhìnrere. ¹¹Fún ìhìnrere yìí ni a ṣe yàn mí ní oníwàásù àti aposteli àti olùkọ́. ¹²Ìdí nìyí tí mo fi ń jìyà báyìí. Ṣùgbọ́n ojú kò tì mí, nítorí mo mọ ẹni tí mo ti gbà gbọ́, mo sì ní ìdánilójú pé ó lè pa ohun tí a fi lé mi lọ́wọ́ mọ́ títí di ọjọ́ náà tí yóò padà dé.

¹³Di àpẹẹrẹ ọ̀rọ̀ tí ó yè kooro tí o gbọ́ lọ́dọ̀ mi mú, nínú ìgbàgbọ́ àti ìfẹ́ tí ń bẹ nínú Kristi Jesu. ¹⁴Pa ohun rere tí a fi lé ọ lọ́wọ́ mọ́, nípa Ẹ̀mí Mímọ́ tí ń gbé inú wa.

¹⁵O mọ èyí: gbogbo àwọn tí ń bẹ ní agbègbè Asia ti kọ̀ mí sílẹ̀, títí kan Figelu àti Hermogene. ¹⁶Kí Olúwa wa Jesu fi àánú hàn sí agbo ilé Onesiforu, nítorí ó máa ń tù mí lára nígbà púpọ̀, ojú kò sì tì í nípa ẹ̀wọ̀n mi. ¹⁷Kàkà bẹ́ẹ̀, nígbà tí ó dé Romu, ó fi ìtara wá mi kiri títí tí ó fi rí mi. ¹⁸Kí Olúwa wa Jesu jẹ́ kí ó rí àánú gbà lọ́dọ̀ Olúwa ní ọjọ́ náà. O mọ̀ dáadáa bí ó ti ṣe ìránṣẹ́ tó ní Efesu.