2 Timotiu 2

2 ¹Nítorí náà, ọmọ mi, fi oore-ọ̀fẹ́ tí ó wà nínú Kristi Jesu mú ara rẹ lókun. ²Àti ohun tí o gbọ́ lọ́dọ̀ mi níwájú ọ̀pọ̀ ẹlẹ́rìí, fi lé àwọn olóòótọ́ ènìyàn lọ́wọ́, àwọn tí ó lè kọ́ àwọn ẹlòmíràn pẹ̀lú. ³Mú ìpín rẹ nínú ìjìyà gẹ́gẹ́ bí ọmọ ogun rere ti Kristi Jesu. ⁴Kò sí ọmọ ogun tí ó wà lẹ́nu iṣẹ́ tí ó ń fi ara rẹ̀ dí nínú ọ̀ràn ayé lásán—ó fẹ́ láti tẹ́ ẹni tí ó gbà á sí ẹgbẹ́ ogun lọ́rùn. ⁵Bẹ́ẹ̀ ni, a kì í fi adé dé eléré-ìje lórí bí kò ṣe pé ó bá díje gẹ́gẹ́ bí òfin ìje. ⁶Àgbẹ̀ tí ó ń ṣiṣẹ́ kára ni ó yẹ kí ó kọ́kọ́ rí ìpín nínú irè oko gbà. ⁷Rò ohun tí mo ń sọ yẹ̀wò, nítorí Olúwa yóò fún ọ ní òye nínú ohun gbogbo.

⁸Rántí Jesu Kristi, tí ó jíǹde kúrò nínú òkú, ìran Dafidi, gẹ́gẹ́ bí a ti sọ nínú ìhìnrere mi, ⁹nítorí èyí tí mo ń jìyà, tí a fi ẹ̀wọ̀n dè mí bí arúfin. Ṣùgbọ́n a kò dè ọ̀rọ̀ Baba wa ní ẹ̀wọ̀n! ¹⁰Nítorí náà, mo faradà ohun gbogbo nítorí àwọn àyànfẹ́, kí àwọn pẹ̀lú lè rí ìgbàlà tí ó wà nínú Kristi Jesu gbà, pẹ̀lú ògo àìnípẹ̀kun. ¹¹Ọ̀rọ̀ yìí jẹ́ olóòótọ́: Bí a bá ti bá a kú, àwa yóò sì wà láàyè pẹ̀lú rẹ̀; ¹²bí a bá faradà, àwa yóò sì jọba pẹ̀lú rẹ̀; bí a bá sẹ́ ẹ, òun pẹ̀lú yóò sẹ́ wa; ¹³bí àwa kò bá jẹ́ olóòótọ́, òun ṣì jẹ́ olóòótọ́, nítorí kò lè sẹ́ ara rẹ̀.

Òṣìṣẹ́ Tí Baba Tẹ́wọ́gbà

¹⁴Rán wọn létí nǹkan wọ̀nyí, kí o sì kìlọ̀ fún wọn níwájú Baba wa pé kí wọn má ṣe jà nítorí ọ̀rọ̀—èyí tí kò ní èrè kankan, tí ó sì ń ba àwọn tí ń gbọ́ jẹ́.

¹⁵Sa gbogbo ipá rẹ láti fi ara rẹ hàn níwájú Baba wa gẹ́gẹ́ bí ẹni tí a tẹ́wọ́gbà, òṣìṣẹ́ tí ojú kì í tì, tí ń lo ọ̀rọ̀ òtítọ́ lọ́nà tí ó tọ́. ¹⁶Ṣùgbọ́n yẹra fún ọ̀rọ̀ òfo tí kò ní ìbọ̀wọ̀ fún Ọlọ́run; nítorí yóò máa tì ènìyàn jìnnà síwájú sínú ìwà búburú, ¹⁷ọ̀rọ̀ wọn yóò sì máa tàn kálẹ̀ bí egbò kíkẹ̀. Nínú wọn ni Hímeneu àti Fíletu wà, ¹⁸àwọn tí ó ti ṣìnà kúrò nínú òtítọ́, tí wọ́n ń wí pé àjíǹde ti ṣẹlẹ̀ tán, tí wọ́n sì ń ba ìgbàgbọ́ àwọn kan jẹ́. ¹⁹Síbẹ̀, ìpìlẹ̀ tí ó fìdí múlẹ̀ ti Baba wa dúró ṣinṣin, tí a sì fi èdìdì dì í pé: “Ó mọ àwọn tí í ṣe tirẹ̀,” àti “Jẹ́ kí gbogbo àwọn tí ń pe orúkọ rẹ̀ yẹra kúrò nínú ibi.”

²⁰Nínú ilé ńlá, ohun èlò kì í ṣe ti wúrà àti fàdákà nìkan, ṣùgbọ́n ti igi àti amọ̀ pẹ̀lú—àwọn kan fún iyì, àwọn kan fún àìlọ́lá. ²¹Nítorí náà, bí ẹnikẹ́ni bá wẹ ara rẹ̀ mọ́ kúrò nínú ìwọ̀nyí, yóò di ohun èlò fún iyì: mímọ́, tí ó wúlò fún Ọ̀gá rẹ̀, tí ó sì ti múra sílẹ̀ fún iṣẹ́ rere gbogbo.

²²Sá fún ìfẹ́kúfẹ̀ẹ́ èwe; lépa òdodo, ìgbàgbọ́, ìfẹ́, àti àlàáfíà pẹ̀lú àwọn tí ń ké pe Olúwa láti inú ọkàn mímọ́. ²³Má ṣe bá aáwọ̀ òmùgọ̀ àti àìnímọ̀ dọ́rẹ̀ẹ́; o mọ̀ pé wọ́n ń dá ìjà sílẹ̀. ²⁴Kò yẹ kí ìránṣẹ́ Olúwa jẹ́ oníjà, ṣùgbọ́n kí ó jẹ́ pẹ̀lẹ́ sí gbogbo ènìyàn, kí ó lè kọ́ni, kí ó sì ní sùúrù nígbà tí a bá ṣẹ̀ sí i. ²⁵Pẹ̀lú ìwà pẹ̀lẹ́ ni kí ó máa tọ́ àwọn tí ń tako rẹ̀ sọ́nà. Bóyá Baba wa yóò fún wọn ní ìrònúpìwàdà láti mọ òtítọ́, ²⁶kí wọ́n sì lè padà sí ìmọ̀ ara wọn, kí wọ́n bọ́ nínú ìdẹ̀kùn èṣù níbi tí ó ti fi wọ́n sẹ́wọ̀n láti ṣe ìfẹ́ rẹ̀.