E Sitere Nʼamara Nweta Ike Idigide

Pọl gwara Timoti ka o nweta ike ya site n'amara, nyefeekwa ozizi ahụ n'aka ndị kwesịrị ntụkwasị obi ndị nwere ike ịkụziri ndị ọzọ. Onye agha, onye egwuregwu, onye ọrụ ubi — ihe atụ nke ọ bụla bụ maka ịtachi obi n'ihe isi ike. Ịrụ ụka maka okwu abaghị uru; jiri nwayọọ gbazie, ebe Nna anyị nwere ike inye nchegharị.

Isi 2.

Ya mere, nwa m, site nʼamara dị na Kraịst Jisọs nweta ike gị. Ihe ị nụrụ nʼọnụ m nʼihu ọtụtụ ndị akaebe, were ha nyefee ndị kwesịrị ntụkwasị obi, bụ ndị pụrụ izikwa ndị ọzọ ihe. Keta oke gị nʼahụhụ dịka ezigbo onye agha nke Kraịst Jisọs. O nweghị onye agha nọ nʼọrụ agha na-etinye onwe ya nʼihe ndị ụwa — nʼihi na ọ chọrọ ime ihe ga-atọ onye kpọbatara ya nʼọrụ agha ụtọ. Ọzọkwa, a naghị enye onye na-asọ mpi okpueze ma ọ bụrụ na ọ sọghị mpi dịka iwu si dị. Onye ọrụ ubi na-adọgbu onwe ya nʼọrụ kwesịrị ịbụ onye mbụ ga-eketa oke na mkpụrụ ubi ahụ. Tụgharịa uche nʼihe m na-ekwu, nʼihi na Onyenwe anyị ga-enye gị nghọta nʼihe niile.

Cheta Jisọs Kraịst, onye si nʼọnwụ bilie, onye sitere nʼagbụrụ Devid, dịka e kwuru nʼoziọma m, nke m na-ata ahụhụ nʼihi ya, bụ ejiri m agbụ kee dịka onye omempụ. Ma a dịghị eke okwu Nna anyị agbụ! Ya mere, ana m anagide ihe niile nʼihi ndị a họpụtara, ka ha onwe ha nwetakwa nzọpụta dị na Kraịst Jisọs, ya na ebube ebighị ebi. Okwu a kwesịrị ntụkwasị obi: Ọ bụrụ na anyị na ya nwụrụ, anyị na ya ga-adịkwa ndụ; ọ bụrụ na anyị tachie obi, anyị na ya ga-achịkwa; ọ bụrụ na anyị agọnarị ya, ọ ga-agọnarịkwa anyị; ọ bụrụ na anyị ekwesịghị ntụkwasị obi, ọ na-anọgide na-ekwesị ntụkwasị obi, nʼihi na ọ pụghị ịgọnarị onwe ya.

Onye Ọrụ Nna Nabatara

Chetara ha ihe ndị a, dọọkwa ha aka na ntị nʼihu Nna anyị ka ha ghara ịrụ ụka banyere okwu — nke na-abaghị uru, nke na-ebibikwa ndị na-ege ntị.

Gbalịsie ike iche onwe gị nʼihu Nna anyị dịka onye a nabatara, onye ọrụ ihere na-adịghị eme, onye na-ejizi okwu eziokwu ahụ nke ọma. Ma zere mkparịta ụka efu nke na-adịghị asọpụrụ Chineke; nʼihi na ọ na-eduba ndị mmadụ nʼime ajọ omume karịa, okwu ha ga-agbasakwa dịka ọrịa na-ata ahụ. Nʼetiti ha ka Haịmeniọs na Filitọs nọ, bụ ndị kpafuru site nʼeziokwu ahụ, na-ekwu na mbilite nʼọnwụ adịgoro, na-emebikwa okwukwe ụfọdụ mmadụ. Ma ntọala siri ike nke Nna anyị guzosiri ike, nke e kaara akara, sị: “Ọ maara ndị bụ nke ya,” na “Ka ndị niile na-akpọku aha ya si nʼajọ ihe wezuga onwe ha.”

Nʼụlọ buru ibu, e nwere ngwa ọrụ, ọ bụghị naanị nke ọlaedo na ọlaọcha, kamakwa nke osisi na ụrọ — ụfọdụ maka nsọpụrụ, ụfọdụ maka nleda anya. Ya mere, ọ bụrụ na onye ọbụla edozie onwe ya ọcha site nʼihe ndị a, ọ ga-aghọ ngwa ọrụ maka nsọpụrụ: nke dị nsọ, nke bara uru nye Onyenwe ya, nke jikere maka ọrụ ọma ọbụla.

Gbanarị ọchịchọ nke okorobịa; chụsoo ezi omume, okwukwe, ịhụnanya, na udo, ya na ndị ji obi dị ọcha na-akpọku Onyenwe anyị. Ghara itinye aka nʼese okwu nzuzu na nke na-enweghị uche; ị maara na ha na-amụ ọgụ. Ohu Onyenwe anyị ekwesịghị ịbụ onye na-ese okwu, kama ọ ga-adị nwayọọ nye mmadụ niile, bụrụ onye pụrụ izi ihe, onye na-enwe ndidi mgbe e mejọrọ ya. Were obi dị nwayọọ na-adọ ndị na-emegide ya aka na ntị. Ma eleghị anya, Nna anyị ga-enye ha nchegharị ka ha mata eziokwu ahụ, ka ha nwee uche ọma, si nʼọnya Ekwensu gbapụ, bụ ebe o jidere ha nʼagbụ ka ha mee uche ya.