2 Timoteo 2

2 ¹Busa, anak ko, pagkuha ug kusog gikan sa grasya nga anaa kang Cristo Jesus. ²Ug ang imong nadungog gikan kanako atubangan sa daghang saksi, itugyan sa kasaligang mga tawo nga makahimo usab sa pagtudlo sa uban. ³Dawata ang imong bahin sa pag-antos ingon nga maayong sundalo ni Cristo Jesus. ⁴Walay sundalo nga nagaalagad nga maglambigit sa mga buluhaton sa sibilyan—buot niyang mapahimut-an ang nagrekluta kaniya. ⁵Ug ang usa ka magdudula dili pagakoronahan gawas kon makigkompetensiya siya sumala sa mga lagda. ⁶Ang kugihang mag-uuma angay nga mauna sa pagdawat ug bahin sa mga ani. ⁷Hunahunaa pag-ayo ang akong gisulti, kay ang Ginoo maghatag kanimo ug pagsabot sa tanang butang.

⁸Hinumdomi si Jesu-Cristo, nga nabanhaw gikan sa mga patay, usa ka kaliwat ni David, sumala sa akong ebanghelyo, ⁹nga tungod niini nag-antos ako, ginapos nga daw kriminal. Apan ang pulong sa atong Amahan dili magapos! ¹⁰Busa gilahutay ko ang tanan alang sa mga pinili, aron sila usab makabaton sa kaluwasan nga anaa kang Cristo Jesus, uban sa himayang dayon. ¹¹Kasaligan kini nga pulong: Kon namatay kita uban kaniya, mabuhi usab kita uban kaniya; ¹²kon molahutay kita, maghari usab kita uban kaniya; kon ilimod nato siya, ilimod usab niya kita; ¹³kon dili kita matinud-anon, magpabilin siyang matinud-anon, kay dili niya ikalimod ang iyang kaugalingon.

Usa ka Mamumuo nga Gikahimut-an sa Amahan

¹⁴Pahinumdomi sila niining mga butanga, ug pasidan-i sila atubangan sa atong Amahan nga dili maglalis mahitungod sa mga pulong—walay pulos, ug makadaot niadtong mga nagapatalinghog.

¹⁵Paningkamoti nga ikapakita mo ang imong kaugalingon ngadto sa atong Amahan ingon nga gikahimut-an, usa ka mamumuo nga walay ikaulaw, nga nagsabwag sa pulong sa kamatuoran sa husto. ¹⁶Apan likayi ang walay pulos ug dili-diosnong sulti; kini magagiya sa mga tawo ngadto sa labaw pang pagkadaotan, ¹⁷ug ang ilang sulti mokaylap nga daw kabahong. Lakip kanila mao si Himeneo ug si Fileto, ¹⁸nga nahisalaag gikan sa kamatuoran, nga nagaingon nga ang pagkabanhaw nahitabo na, ug nagaguba sa pagtuo sa pipila ka mga tawo. ¹⁹Apan ang lig-ong patukoranan sa atong Amahan nagabarog, nga tinimbrehan: “Nakaila siya niadtong mga iya,” ug “Ipabulag sa tanang nagangalan sa iyang ngalan ang ilang kaugalingon gikan sa daotan.”

²⁰Sa usa ka dakong balay adunay mga sudlanan nga dili lamang bulawan ug plata, kondili usab kahoy ug yutang kolon—ang uban alang sa kadungganan, ang uban alang sa kaulawan. ²¹Busa kon adunay maghinlo sa iyang kaugalingon gikan niining mga butanga, mahimo siyang sudlanan sa kadungganan: balaan, mapuslanon sa Agalon, andam sa matag maayong buhat.

²²Kalagiw gikan sa mga kaibog sa pagkabatan-on; tinguhaa ang pagkamatarong, ang pagtuo, ang gugma, ug ang kalinaw uban niadtong mga nagatawag sa Ginoo gikan sa putli nga kasingkasing. ²³Ayaw pakiglabot sa mga binuang ug walay-alamag nga mga panaglalisan; nasayod ka nga kini manganak ug mga away. ²⁴Ang sulugoon sa Ginoo kinahanglan dili palaaway, kondili maluloy-on sa tanan, makahimo sa pagtudlo, mapailubon kon mapasipalahan, ²⁵nga malumong nagabadlong niadtong mga nagasupak kaniya. Tingali ihatag sa atong Amahan kanila ang paghinulsol aron masayod sa kamatuoran, ²⁶ug mahiulian sila, nga makaikyas sa lit-ag sa yawa diin siya nagbihag kanila aron buhaton ang iyang kabubut-on.