2 Timoteo 1

1 ¹Si Pablo, apostol ni Cristo Jesus pinaagi sa kabubut-on sa atong Amahan, sumala sa saad sa kinabuhi nga anaa kang Cristo Jesus, ²nganha kang Timoteo, akong hinigugmang anak: Ang grasya, kaluoy, ug kalinaw nga gikan sa atong Amahan ug kang Cristo Jesus nga atong Ginoo maanaa kanimo.

Pagdilaab sa Gasa nga Gihatag Kanimo sa atong Amahan

³Nagpasalamat ako sa atong Amahan, nga akong gialagaran uban sa hinlo nga tanlag sama sa gibuhat sa akong mga katigulangan, samtang nahinumdom ako kanimo kanunay sa akong mga pag-ampo, gabii ug adlaw. ⁴Sa paghinumdom sa imong mga luha, nangandoy ako nga makita ka, aron mapuno ako sa kalipay. ⁵Nahinumdom ako sa imong matinud-anon nga pagtuo—nga buhi una diha sa imong apohan nga si Lois ug sa imong inahan nga si Eunice, ug karon, nasiguro ko, anaa na usab kanimo.

⁶Busa gipahinumdoman ko ikaw nga dilaabon ang gasa sa atong Amahan diha kanimo, pinaagi sa pagpandong sa akong mga kamot. ⁷Kay ang atong Amahan wala maghatag kanato ug espiritu sa kahadlok, kondili sa Espiritu sa gahom, gugma, ug pagpugong sa kaugalingon. ⁸Busa ayaw ikaulaw ang pagpamatuod sa atong Ginoo, ni ako nga iyang binilanggo, kondili makig-ambit sa pag-antos alang sa ebanghelyo pinaagi sa gahom sa atong Amahan. ⁹Giluwas niya kita ug gitawag sa usa ka balaan nga pagtawag, dili tungod sa atong mga buhat kondili tungod sa iyang kaugalingong katuyoan ug grasya, nga gihatag kanato diha kang Cristo Jesus sa wala pa magsugod ang panahon, ¹⁰ug karon gipadayag pinaagi sa pagpakita sa atong Manluluwas nga si Cristo Jesus, nga nagtapos sa kamatayon ug naghayag sa kinabuhi ug sa pagka-imortal pinaagi sa ebanghelyo. ¹¹Alang niini nga ebanghelyo gitudlo ako nga magwawali, apostol, ug magtutudlo. ¹²Mao kana nga nag-antos ako sa ingon niini. Apan wala ako maulaw, kay nasayod ako kang kinsa ako mituo, ug nasiguro ko nga makahimo siya sa pagbantay sa gipiyal kanako hangtod sa adlaw sa iyang pagbalik.

¹³Kuptan ang sumbanan sa maayong mga pulong nga imong nadungog gikan kanako, diha sa pagtuo ug gugma nga anaa kang Cristo Jesus. ¹⁴Bantayi ang maayong tipigan nga gipiyal kanimo, pinaagi sa Espiritu Santo nga nagpuyo sulod kanato.

¹⁵Nasayod ka niini: ang tanan sa probinsiya sa Asia mitalikod kanako, lakip si Figelo ug si Hermogenes. ¹⁶Hinaut nga ang atong Ginoong Jesus maghatag ug kaluoy sa panimalay ni Onesiforo, kay kanunay niya akong gilagsik ug wala maulaw sa akong mga talikala. ¹⁷Hinunoa, sa iyang pag-abot sa Roma masiboton niya akong gipangita hangtod nga iya akong nakaplagan. ¹⁸Hinaut nga itugot sa atong Ginoong Jesus nga makakaplag siya ug kaluoy gikan sa Ginoo niadtong adlawa. Nasayod ka pag-ayo kon unsa kadako ang iyang pag-alagad sa Efeso.