Bawlos oo Timoteyos u Qoray

Warqaddii ugu dambaysay ee Bawlos, oo uu qoray isagoo dhimasho ku dhow, isagoo hawsha u gudbinaya Timoteyos kuna amraya inuu erayga wacdiyo.

Cutubka 1.

Bawlos, oo rasuul u ah Ciise Masiix doonista Aabbeheen iyo ballanka nolosha ku jirta Ciise Masiix darteed, Timoteyos, ilmahayga aan jeclahay: Nimco, naxariis iyo nabad ha kaa soo gaadheen Aabbeheen iyo Ciise Masiix Rabbigeenna.

Dab ka Dhig Hadiyadda Aabbeheen Ku Siiyay

Aabbeheen baan ku mahadnaqayaa, kan aan damiir nadiif ah ku adeego sidii awowayaashay yeeleen, anigoo had iyo goor kuu xusuusta tukashooyinkayga, habeen iyo maalinba. Markaan ilmadaadii xusuusto, waan ku xiisoonayaa inaan ku arko, si aan farxad u buuxsamo. Rumaysadkaaga daacadda ah baan xusuustaa—kan markii hore ku nool ayeeyadaa Loyis iyo hooyadaa Yuniika, haatana, waan hubaa, adigana kugu jira.

Sidaas daraaddeed waxaan kuu xusuusinayaa inaad dab ka dhigto hadiyadda Aabbeheen ee kugu jirta, tan aan gacmahayga kuugu dul dhigay. Waayo, Aabbeheen ruux cabsi ma na siin, laakiin Ruuxa xoogga, jacaylka iyo is-xakamaynta ayuu na siiyay. Sidaas daraaddeed ha ka xishoon markhaatiga Rabbigeenna, ha iga xishoon aniga maxbuuskiisa, laakiin silicii injiilka aawadiis ku wehel xoogga Aabbeheen. Isagu wuu na badbaadiyay oo yeedhid quduus ah ayuu nagu yeedhay, ma ahayn shuqulladeenna aawadood, laakiin ujeeddadiisa iyo nimcadiisa, tan nalagu siiyay Ciise Masiix kahor intaan wakhtigu bilaabmin, oo hadda lagu muujiyay muuqaalka Badbaadiyeheenna Ciise Masiix, kan dhimashada baabbi'iyay oo nolosha iyo aan-dhimashada injiilka ku iftiimiyay. Injiilkan aawadiis baa la ii magacaabay inaan wacdiye, rasuul iyo macallin ahaado. Taas daraaddeed baan sidan u silcaa. Laakiin ma xishoodo, waayo waan ogahay kii aan rumaystay, waanan hubaa inuu karo inuu ilaaliyo wixii la ii aamminay ilaa maalintii uu soo noqonayo.

Qaabka erayada caafimaadka qaba ee aad iga maqashay ku hay rumaysad iyo jacayl ku jira Ciise Masiix. Deeqda wanaagsan ee lagugu aamminay ku ilaali Ruuxa Quduuska ah ee nagu jira.

Tan waad taqaan: kuwa Aasiya joogay oo dhan way iga jeesteen, oo ay ku jiraan Fugelus iyo Hermogenis. Rabbigeenna Ciise ha siiyo naxariis reerka Onesiforus, waayo isagu marar badan ayuu i raaxaysiiyay, silsiladahayga uma xishoonin. Taa beddelkeeda, markuu Rooma yimid, si dadaal leh ayuu iigu baadhay ilaa uu i helay. Rabbigeenna Ciise ha siiyo inuu maalintaas naxariis ka helo Rabbiga. Si fiican baad u taqaan intuu Efesos wax ku adeegay.