Paulei Timoti to Le Dokei
Hailabü nyangko dobü Paul meten le che ki, Timoti to haoeibü kümbü kungaiko hoba hao to ngüh songlenla sakkukei.
1 1Ho le, seneibü Bou maangangbüei Khrista Jisu youkoikjai Paul, Khrista Jisua langkei thekubüei pienbü, 2kü sanoubü shou Timoti jungto: seneibü Bou hoba seneibü Bunyubou Khrista Jisu ka onou, sanoudambü hoba haülabü yingshi.
Seneibü Bouei Ka Kubü Wanlong Angtiashi
3Ngei ngeibü pisibou shuong tegü maangpon hinseibüei khangenbü seneibü Bou la ngei nyensang kuda, hoba khüyou si chalou ngeibü welaua kan ponpen damenda. 4Kaibü nyeksi damenko, ngo olinbüei shenlabü shanga, ka hau kitila ngei aeibou chüheida. 5Kaibü tangbü mailem, khei shaangla kaibü nyusibou Lois hoba kaibü nyu Eunis to langbü, ngei damenda; hoba touje ka toakei langa dogo ngei maimaitham ngeda.
6Kheijinei ngei ik ka to shatbü danko, ka toabü seneibü Bou jongsak kho wanlong tegü angtiashi dogo ngei ka to damentida. 7Aishanga seneibü Bouei sen la hatbü soushou aku, lausikei hau, sanou hoba mütpem leiyobü Soushou kukei. 8Khoei seneibü Bunyubou aukabü shanga himou teki, ayingsi hao thüngdanga kibü ngo shanga himou teki, lausikei seneibü Bou hau danko Ngühlang Maibü shanga khonkua thuiyojan. 9Haoei sen khümenkei hoba saopobü ngala ngabei; ho seneibü kümsileiei aying, lausikei hao jembü nyekchüh hoba onou danko, khei jih khangshang akitou Khrista Jisua sen la kubü ki, 10hoba touje seneibü Khümenbou Khrista Jisu langngeibü danko loushatkei, aoei haibü penkei, hoba Ngühlang Maibü danko langkei hoba ahaialabü kho ngesaktikei. 11Ho Ngühlang Maibü shanga ngo songlenbou, youkoikjai hoba lenbou che yeitikei. 12Khoei ngo hainyu khonkutida, lausikei ngo himouko aki, aishanga ngei aoto mailemkei kho ngei ngeda, hoba hao longeilabü nyet sühko kü la kubü peisilei haoei apyola thükda dogo ngei maimaitham ngeda.
13Ka kü ka ditbü takteibü ngüh tegü kho, Khrista Jisua mailem hoba sanou yoa hatlepashi. 14Sen to kibü Soushou Saopobü danko, ka la kubü maibü jongsak kho apyoashi.
15Nyi ho ngeda, Asia kaodaka kibü müt pendouei, Fugela hoba Hermojene yoan, ngo ka sepeikei. 16Seneibü Bunyubou Jisuei Onesifora chempen to sanoudambü kushi, aishanga haoei ngo ladüngnei haksomang maiyokei hoba ngeibü yangmen shanga himouko aki. 17Aieilausi haoei Rom to loujinei ngo aeibou lamjung ngo hapbü sühko lamkei. 18Seneibü Bunyubou Jisuei kushi, khei khünyet haoei Bunyubou ka sanoudambü haplabü. Efesaa haoei ladüng khangenkei kho nyi maimaia ngeda.
