Pọl Degaara Timoti Akwụkwọ Ozi

Akwụkwọ ozi ikpeazụ Pọl, nke e dere mgbe ọ nọ nso ọnwụ, na-enyefe Timoti ọrụ ahụ ma na-enye ya iwu ka o kwusaa okwu ahụ.

Isi 1.

Pọl, onye ozi nke Kraịst Jisọs site nʼọchịchọ Nna anyị, nʼihi nkwa nke ndụ ahụ dị na Kraịst Jisọs, na-edegara Timoti, nwa m ọ hụrụ nʼanya: Ka amara na ebere na udo nke sitere nʼaka Nna anyị na Kraịst Jisọs Onyenwe anyị dịịrị gị.

Mee Ka Ọkụ Nna Anyị Nyere Gị Nwuo

Ana m ekele Nna anyị, onye m ji akọnuche dị ọcha na-efe dịka nna nna m ha mere, ebe m na-echeta gị mgbe niile nʼekpere m, nʼabalị na nʼehihie. Mgbe m na-echeta anya mmiri gị, ọ na-agụ m agụụ ịhụ gị, ka obi m wee jupụta nʼọṅụ. Ana m echeta okwukwe gị nke na-enweghị aghụghọ—nke buru ụzọ dịrị ndụ na nnenne gị Loịs na nne gị Yunaịs, ugbu a kwa, ekwenyesiri m ike na ọ dịkwa na gị.

Ya mere, ana m echetara gị ka i mee ka onyinye Nna anyị nke dị nʼime gị nwuo ọkụ ọzọ, site nʼibikwasị gị aka m. Nʼihi na Nna anyị enyeghị anyị mmụọ nke egwu, kama ọ nyere anyị Mmụọ nke ike, na ịhụnanya, na njide onwe. Ya mere, ihere emekwala gị nʼihi ịgba ama nke Onyenwe anyị, maọbụ nʼihi m bụ onye e kere nʼagbụ ya, kama soro keta òkè nʼahụhụ nʼihi oziọma site nʼike Nna anyị. Ọ zọpụtara anyị ma kpọọ anyị site nʼọkpụkpọ dị nsọ, ọ bụghị site nʼọrụ anyị kama site nʼebumnuche nke aka ya na amara ya, nke e nyere anyị na Kraịst Jisọs tupu oge ọbụla amalite, ma ugbu a e mere ka a mata ya site nʼọbịbịa nke Onye Nzọpụta anyị bụ Kraịst Jisọs, onye kwụsịrị ọnwụ ma mee ka ndụ na anwụghị anwụ chaa site nʼoziọma. Ọ bụ nʼihi oziọma a ka e mere m onye nkwusa na onye ozi na onye nkuzi. Ọ bụ nke a mere m ji ata ahụhụ dị otu a. Ma ihere adịghị eme m, nʼihi na amaara m onye m kwenyere na ya, ekwenyesiri m ike na o nwere ike ichebe ihe ahụ e nyefere m nʼaka ruo ụbọchị ahụ ọ ga-alọghachi.

Jidesie ụkpụrụ okwu ndị ziri ezi ị nụrụ site nʼaka m ike, nʼokwukwe na nʼịhụnanya dị na Kraịst Jisọs. Chebe ezigbo ihe ahụ e nyefere gị nʼaka, site nʼaka Mmụọ Nsọ nke bi nʼime anyị.

Ị maara nke a: mmadụ niile nọ nʼọkpụrụkpụ Eshia hapụrụ m, tinyere Fijelọs na Hermojenis. Ka Onyenwe anyị Jisọs meere ezinụlọ Onesiforọs ebere, nʼihi na o mere ka ahụ dajụọ m ọtụtụ mgbe, ihere emeghịkwa ya nʼihi agbụ m. Kama, mgbe o rutere na Rom, o ji ịnụ ọkụ nʼobi chọọ m ruo mgbe ọ chọtara m. Ka Onyenwe anyị Jisọs mee ka ọ chọta ebere nʼaka Onyenwe anyị nʼụbọchị ahụ. Ị maara nke ọma otú o si jeere ozi nʼEfesọs.