Ijere Ndị Nwe Ohu Ozi Dịka Ụmụnne
Ntụziaka nye ndị ohu, emesịa, nkọwa nke ndị nkuzi na-ewere nsọpụrụ Chineke dịka ụzọ isi rite uru. Afọ ojuju bụ ezi uru ahụ, agụụ ego adụpuokwala ụfọdụ mmadụ. Pọl na-enye Timoti iwu ka ọ lụọ ezi ọgụ ahụ, ma gwa ndị ọgaranya ka ha tụkwasị olileanya ha na Nna anyị kama ịtụkwasị ya nʼakụnụba.
6 1Ndị niile nọ nʼokpuru ibu arọ nke ịbụ ohu kwesịrị iwere ndị nwe ha dịka ndị kwesịrị nsọpụrụ zuru ezu, ka a ghara ikwujọ aha Nna anyị na nkuzi ahụ. 2Ndị nwe ha bụ ndị kwere ekwe ekwesịghị ilelị ha anya nʼihi na ha bụ ụmụnne; kama ha kwesịrị ijere ha ozi nke ọma karịa, ebe ọ bụ na ndị na-erite uru nʼime ya bụ ndị kwere ekwe, ndị a hụrụ nʼanya nke ukwuu. Kuzie ihe ndị a, gbaakwa ha ume.
Nkuzi Ụgha Na-amị Mkpụrụ Ilu
3Ọ bụrụ na onye ọbụla akụzie ihe dị iche, nke na-ekwetaghị nʼokwu ziri ezi nke Onyenwe anyị Jisọs Kraịst na nkuzi ahụ kwekọrọ na nsọpụrụ Chineke, 4ọ bụ onye mpako, onye na-amaghị ihe ọbụla, kama ọ na-arịa ọrịa nʼihi mmasị gabigara ókè nʼịrụrịta ụka na ịlụ ọgụ okwu, nke na-ebute ekworo, esemokwu, nkwutọ, na enyo ọjọọ, 5na esemokwu na-adịgide nʼetiti ndị uche ha rụrụ arụ, ndị a napụrụ eziokwu, ndị na-eche na nsọpụrụ Chineke bụ ụzọ e si erite uru.
6Ma nsọpụrụ Chineke ya na afọ ojuju bụ uru dị ukwuu, 7nʼihi na anyị ewetaghị ihe ọbụla nʼụwa, anyị apụghịkwa iwepụ ihe ọbụla nʼime ya. 8Ma ọ bụrụ na anyị nwere ihe oriri na uwe, anyị ga-enwe afọ ojuju nʼihe ndị a. 9Ma ndị chọrọ ịba ọgaranya na-adaba nʼọnwụnwa, nʼọnya, na nʼọtụtụ ọchịchọ nzuzu nke na-emerụ ahụ, nke na-eme ka mmadụ mikpuo nʼime mbibi na ịla nʼiyi. 10Ịhụ ego nʼanya bụ mgbọrọgwụ nke ụdị ihe ọjọọ niile; nʼihi agụụ ya, ụfọdụ akpafuola site nʼokwukwe ma jiri ọtụtụ ihe mgbu dupuo onwe ha.
Lụọ Ọgụ Ọma nke Okwukwe
11Ma gị onwe gị, nwoke nke Nna anyị, gbanarị ihe ndị a niile. Chụso ezi omume, nsọpụrụ Chineke, okwukwe, ịhụnanya, ntachi obi, na ịdị nwayọọ. a a v11 “Nwoke nke Nna anyị” bụ nsụgharị nke nkebiokwu Akwụkwọ Nsọ ndị ọzọ na-asụ dịka “nwoke nke Chineke” — na-akpọ Timoti onye bụ nke Nna, ọ bụghị naanị nke chi dị anya. 12Lụọ ọgụ ọma nke okwukwe; jidesie ndụ ebighị ebi ahụ a kpọrọ gị, nke i kwupụtara nkwupụta ọma ahụ nʼihu ọtụtụ ndị akaebe. 13Ana m enye gị iwu nʼihu Nna anyị, onye na-enye ihe niile ndụ, na nʼihu Kraịst Jisọs, onye gbara ama nke nkwupụta ọma ahụ nʼihu Pọntiọs Paịlet, b b v13 “Nkwupụta ọma” nke Jisọs nʼihu Paịlet bụ nkwupụta ya nwere obi ike na ya bụ eze nakwa na ọ bịara ịgba ama banyere eziokwu (lee Jọn 18:33–37). 14ka i debe iwu ahụ nke na-enweghị ntụpọ, nke a na-apụghị ịta ụta ya, ruo mgbe Onyenwe anyị Jisọs Kraịst ga-apụta ìhè, 15nke Onye Ọchịchị ahụ a gọziri agọzi, naanị ya, Eze nke ndị eze na Onyenwe nke ndị nwe, ga-eme ka ọ pụta nʼoge ya kwesịrị ekwesị. 16Ọ bụ naanị ya bụ onye na-anwụghị anwụ, onye bi nʼìhè nke mmadụ na-apụghị ịbịaru nso, onye ọ dịghị onye hụrụla anya maọbụ nke pụrụ ịhụ. Ka nsọpụrụ na ikike ọchịchị ebighị ebi dịrị ya. Amen.
17Gwa ndị ọgaranya nʼoge ugbu a ka ha ghara ịdị mpako maọbụ itụkwasị olileanya ha nʼakụ nke na-adịghị ejide chịm, kama ka ha tụkwasị ya na Nna anyị, onye na-enye anyị ihe niile nʼụba ka anyị nwee obi ụtọ nʼime ha. 18Nye ha iwu ka ha na-eme ihe ọma, baa ọgaranya nʼọrụ ọma, bụrụ ndị na-emesapụ aka, ndị dị njikere ịkekọrịta ihe, 19na-akpakọbara onwe ha ntọala ọma maka oge dị nʼihu, ka ha wee jide ndụ ahụ bụ ndụ nʼezie.
20Timoti, chebe ihe ahụ e nyefere nʼaka gị. Zere mkparịta ụka efu nke na-adịghị asọpụrụ Chineke na mgbagha nke ihe a na-akpọ ihe ọmụma, 21nʼihi na site nʼikwupụta ya, ụfọdụ akpafuola site nʼokwukwe. Ka amara dịnyere unu niile.
