ንጐይቶት ከም ኣሕዋት ምግልጋል

ንባሮት ዝወሃብ ትእዛዛት፥ ድሕሪኡ ኸዓ ንኣምልኾ ናይ መኽሰብ መንገዲ ዝገብርዎ መምህራን ዝገልፅ ስእሊ። እቲ ሓቀኛ መኽሰብ ዕግበት እዩ፥ ፍቕሪ ገንዘብ ከዓ ንገሊኦም ወግኦም። ጳውሎስ ንጢሞቴዎስ እቲ ፅቡቕ ቃልሲ ኽቃለስ የዝዞ፤ ነቶም ሃብታማት ድማ ኣብ ክንዲ ሃብቲ ኣብ ኣቦና ተስፋ ክገብሩ ይነግሮም።

ምዕራፍ 6።

ኵሎም እቶም ኣብ ትሕቲ ኣርዑት ባርነት ዘለዉ ፥ ስም ኣቦናን እቲ ትምህርትን ከይፅረፍ ፥ ንጐይቶቶም ምሉእ ክብሪ ዝግብኦም ጌሮም ይቝፀርዎም። እቶም ዝኣምኑ ጐይቶት ዘለዎም ከዓ ፥ ኣሕዋቶም ስለ ዝኾኑ ኣይንዓቕዎም ፤ እቶም ተጠቀምቲ ፥ ኣመንትን ፍቑራትን ስለ ዝኾኑ ፥ ኣብ ክንድኡ ብዝበለፀ የገልግልዎም። ነዙይ መሃር ፥ ኣተባብዕ ከዓ።

ሓሰት ትምህርቲ መሪር ፍረ ይፈሪ

ሓደ ሰብ ብኻልእ እንተ መሃረ ፥ ነቲ ጥዑይ ቃላት ጐይታና ኢየሱስ ክርስቶስን ፥ ነቲ ንኣምልኾ እግዚኣብሄር ዝሰማማዕ ትምህርትን እንተ ዘይተሰማምዐ ፥ ንሱ ዕቡይ ኮይኑ ፥ ሓንቲ እኳ ኣይፈልጥን ፤ ብዛዕባ ክርክርን ባእሲ ቃላትን ግና ዝሓመመ ፥ ካብኡ ድማ ቅንኣት ፥ ባእሲ ፥ ሓሜት ፥ ክፉእ ጥርጣረ ዝፍጠር እዩ ፥ ከምኡውን ኣእምሮኦም ዝተበላሸወ ፥ ካብ ሓቂ ዝተኸልኡ ፥ ኣምልኾ እግዚኣብሄር መኽሰቢ መንገዲ ኣምሲሎም ዝሓስቡ ሰባት ዝርከብ ቀፃሊ ባእሲ።

ኣምልኾ ምስ ዕግበት ግና ዓብዪ መኽሰብ እዩ ፥ ናብ ዓለም ገለ እኳ ኣየምፃእናን ፤ ካብኣ ገለ እኳ ክንወስድ ኣይንኽእልን ኢና እሞ። ምግብን ክዳንን እንተ ሃለወና ግና ፥ በዙይ ዕጉባት ክንኸውን ኢና። ክህብትሙ ዝደልዩ ግና ፥ ናብ ፈተና ፥ ናብ መፈንጠር ፥ ናብ ብዙሕ ዓሻን ጐዳእን ትምኒት ይወድቁ ፤ እዙይ ከዓ ንሰባት ናብ ጥፍኣትን ብርሰትን የስጥሞም። ፍቕሪ ገንዘብ ፥ ናይ ኵሉ ዓይነት ክፍኣት ሱር እዩ ፤ ገሊኣቶም ነዙይ እናሃረፉ ፥ ካብ እምነት ተኣልዮም ፥ ንርእሶም ብብዙሕ ስቃይ ወግኡ።

እቲ ፅቡቕ ቃልሲ እምነት ተቓለስ

ንስኻ ግና ፥ ኦ ናይ ኣቦና ሰብ ፥ ካብዝ ኵሉ ህደም። ፅድቂ ፥ ኣምልኾ ፥ እምነት ፥ ፍቕሪ ፥ ትዕግስቲ ፥ ለውሃት ተኸተል። ^a እቲ ፅቡቕ ቃልሲ እምነት ተቓለስ ፤ ነታ እተፀዋዕካላ ፥ ኣብ ቅድሚ ብዙሓት መሰኻኽር ከዓ እቲ ፅቡቕ ምስክርነት እተኣመንካላ ናይ ዘለኣለም ህይወት ሓዛ። ኣብ ቅድሚ እቲ ንዅሉ ህይወት ዝህብ ኣቦናን ፥ ኣብ ቅድሚ ጶንጥዮስ ጲላጦስ እቲ ፅቡቕ ምስክርነት ኣብ ዝመስከረ ክርስቶስ ኢየሱስን ፥ እእዝዘካ ኣለኹ ፥ ^b ጐይታና ኢየሱስ ክርስቶስ ክሳዕ ዝግለፅ ፥ ነቲ ትእዛዝ ፥ ነውርን መንቅብን ዘይብሉ ጌርካ ክትሕልዎ ፥ ነዝ ከዓ እቲ ብሩኽን በይኑ ገዛኢን ፥ ንጉስ ነገስታት ፥ ጐይታ ጐይቶት ፥ በቲ ዝግባእ ጊዜ ኬርእዮ እዩ። ንሱ በይኑ ዘይመውት ፥ ኣብ ዘይቅረብ ብርሃን ዝነብር ፥ ሓደ ሰብ እኳ ዘይረአዮ ፥ ኺርእዮ ድማ ዘይኽእል እዩ። ንእኡ ክብርን ናይ ዘለኣለም ስልጣንን ይኹን። ኣሜን።

ነቶም ኣብዝ ዘሎ ዘመን ሃብታማት ፥ ከይዕበዩ ፥ ኣብ ዘይተረጋገፀ ሃብቲ ተስፋ ከይገብሩ ፥ ኣብቲ ንኽንሕጐሰሉ ዅሉ ነገር ብብዝሒ ዝህበና ኣቦና ደኣ ተስፋ ኪገብሩ ኣዝዞም። ሰናይ ክገብሩ ፥ ብሰናይ ግብሪ ሃብታማት ኪኾኑ ፥ ለጋሳት ፥ ንምክፋል ፍቓደኛታት ኪኾኑ ኣዝዞም ፥ ነታ ናይ ብሓቂ ህይወት ዝኾነት ህይወት ምእንቲ ኺሕዙ ፥ ንዝመፅእ ጊዜ ፅቡቕ መሰረት ንርእሶም የንብሩ።

ኦ ጢሞቴዎስ ፥ ነቲ ዝተዋህበካ ሕድሪ ሓሉ። ካብ ርኹስ ከንቱ ዘረባን ፥ ፍልጠት ተባሂሉ ዝፅዋዕ ተፃራሪ ነገርን ርሓቕ ፥ ገሊኣቶም ነዙይ እናኣመኑ ፥ ካብ እምነት ተኣልዮም እዮም እሞ። ፀጋ ምስ ኵላትኩም ይኹን።