Yi wa Iyayengiji Hidima kamar 'Yan'uwa

Umarni ga bayi, sa'an nan hoton malaman da ke ɗaukar ibada hanyar samun riba. Wadar zuci ita ce ribar gaske, son kuɗi kuwa ya soki waɗansu. Bulus ya umarci Timoti ya yi yaƙi mai kyau, ya kuma gaya wa masu arziki su sa begensu ga Ubanmu maimakon dukiya.

Babi na 6.

Duk waɗanda suke ƙarƙashin kangin bauta su ɗauki iyayengijinsu a matsayin masu cancantar cikakken girmamawa, domin kada a zargi sunan Ubanmu da koyarwar. Waɗanda suke da iyayengiji masu bi kada su rena su don su 'yan'uwa ne; a maimakon haka su ƙara yi musu hidima da kyau, tun da waɗanda suke amfana masu bi ne, ƙaunatattu. Ka koyar da waɗannan ka kuma yi gargaɗi.

Koyarwar Ƙarya Takan Ba da 'Ya'ya Masu Ɗaci

Idan wani ya koyar da wani abu dabam, yana rashin yarda da sahihan kalmomin Ubangijinmu Yesu Almasihu da kuma koyarwar da ta dace da ibada ga Allah, ya cika da girman kai ne, bai san kome ba, sai dai yana da cutar sha'awar gardama da faɗan kalmomi, waɗanda suke haifar da kishi, da faɗa, da ɓata suna, da mugun zato, da kuma rikici marar ƙarewa a tsakanin mutane masu lalatacciyar hankali, waɗanda aka hana wa gaskiya, waɗanda suke tsammani ibada ga Allah hanyar samun riba ce.

To, ibada tare da wadar zuci riba ce mai girma, gama ba mu kawo kome cikin duniya ba, ba kuwa za mu iya fitar da kome daga cikinta ba. Amma in muna da abinci da sutura, da waɗannan za mu wadar da zuci. Amma waɗanda suke son yin arziki sukan fāɗa cikin jaraba, da tarko, da sha'awace-sha'awace da yawa na wauta da masu cutarwa, waɗanda suke jefa mutane cikin lalacewa da hallaka. Son kuɗi tushen kowane irin mugunta ne; saboda marmarinsa, waɗansu sun kauce daga bangaskiya suka soki kansu da baƙin ciki masu yawa.

Ka Yi Kyakkyawan Faɗan Bangaskiya

Amma kai, mutumin Ubanmu, ka guji duk wannan. Ka nemi adalci, da ibada, da bangaskiya, da ƙauna, da jimiri, da tawali'u. ^a Ka yi kyakkyawan faɗan bangaskiya; ka riƙe rai madawwami wanda aka kira ka gare shi, ka kuma shaida kyakkyawar shaida a gaban shaidu masu yawa. Ina umartar ka a gaban Ubanmu, wanda yake ba da rai ga dukan abubuwa, da Almasihu Yesu, wanda ya shaida kyakkyawar shaida a gaban Buntus Bilatus, ^b ka kiyaye umarnin ba tare da tabo ba, marar abin zargi, har sai bayyanar Ubangijinmu Yesu Almasihu, wadda Mai mulki mai albarka, shi kaɗai, Sarkin sarakuna da Ubangijin iyayengiji, zai kawo a daidai lokaci. Shi kaɗai marar mutuwa ne, yana zama cikin hasken da ba a iya kusantarsa, wanda ba wanda ya taɓa gani ko kuwa ya iya ganinsa. A gare shi girma da madawwamin iko su tabbata. Amin.

Ka gaya wa masu arziki a wannan zamani kada su yi girman kai ko su sa zuciya ga dukiya marar tabbas, sai dai ga Ubanmu, wanda yake ba mu kome a yalwace domin mu more. Ka umarce su su aikata nagarta, su zama masu arziki a ayyuka na gari, masu karamci, masu niyyar raba wa waɗansu, suna tara wa kansu kyakkyawan tushe domin nan gaba, domin su riƙe rai wanda yake rai na gaskiya.

Timoti, ka tsare abin da aka danƙa maka. Ka guji surutai marasa amfani, marasa tsoron Allah, da sabani na abin da ake kira ilimi, gama ta wurin shelanta shi waɗansu sun kauce daga bangaskiya. Alheri yă kasance tare da ku duka.