Ngawula ka Dunungan Minangka ka Dulur

Pituduh pikeun para budak, tuluy gambaran guru-guru anu nganggap kasalehan minangka jalan pikeun meunang untung. Rasa cukup téh kauntungan anu sabenerna, sarta kahayang kana duit geus nyiksa sababaraha jalma. Paulus marentah Timoteus sangkan bajoang dina perang anu hadé, sarta nitah anu beunghar ngandelkeun Rama urang tibatan kabeungharan.

Pasal 6.

Sakur jalma anu keur aya dina beungbeurat perbudakan kudu nganggap dununganana sorangan pantes meunang hormat anu pinuh, supaya jenengan Rama urang jeung pangajaranana teu dicawad. Jalma anu boga dunungan anu geus palercaya, ulah teu ngajenan ka maranehna ngan ku sabab maranehna dulur; sabalikna kudu leuwih daria ngawula, sabab anu narima mangpaatna teh jalma-jalma anu palercaya, anu kacida dipikanyaahna. Ieu kabeh kudu diwulangkeun jeung didorong.

Pangajaran Palsu Ngahasilkeun Buah nu Pait

Lamun aya jalma anu ngajarkeun anu sejen, teu luyu jeung pangandika anu sehat ti Gusti urang Yesus Kristus jeung pangajaran anu saluyu jeung kasalehan ka Allah, manehna teh jalma anu gumede, taya pangaweruhna, tapi katarajang panyakit resep kana paséa jeung patorek ngeunaan kecap-kecap, anu ngabalukarkeun sirik, pacogregan, pitenah, jeung sangkaan-sangkaan goreng, sarta pasalingsingan anu teu eureun-eureun di antara jalma-jalma anu pikiranana geus ruksak, anu geus leungit tina bebeneran, anu nyangka yen kasalehan ka Allah teh jalan pikeun meunang kauntungan.

Ari kasalehan anu dibarengan ku rasa sugema teh kauntungan anu gede, sabab urang henteu mawa nanaon basa datang ka dunya, jeung urang moal bisa mawa nanaon mun indit ti dunya. Tapi lamun urang boga kadaharan jeung pakean, ku eta sakitu urang kudu sugema. Tapi jalma anu hayang jadi beunghar bakal labuh kana panggoda, kana jiret, jeung kana rupa-rupa kahayang anu bodo tur ngabahlakeun, anu nyurungkeun jalma kana karuksakan jeung kabinasaan. Kaasih kana duit teh akar sagala rupa kajahatan; ku karana mikahayang kana eta, aya sawatara jalma anu geus nyalingkah tina iman sarta nyilakakeun manehna sorangan ku loba kanyeri.

Perangan Perang nu Hade dina Iman

Tapi anjeun, jalma kagungan Rama urang, kudu nyingkahan ieu kabeh. Udag kaadilan, kasalehan, iman, kaasih, katabahan, jeung kalemah-lembutan. ^a Perangan perang anu hade dina iman; cangking hirup langgeng anu jadi sambutan anjeun, anu ku anjeun geus diakukeun dina pangakuan anu hade di hareupeun loba saksi. Sim kuring ngawelingan anjeun di payuneun Rama urang, anu maparin hirup ka sagala perkara, jeung Kristus Yesus, anu geus nyaksian pangakuan anu hade di hareupeun Pontius Pilatus, ^b sangkan anjeun ngajaga parentah teh beresih taya kokotor jeung taya cawadeun nepi ka sumpingna Gusti urang Yesus Kristus, anu bakal diwujudkeun dina waktuna ku Panguasa anu diberkahan tur anu ngan hiji-hijina, Rajana sakabeh raja jeung Gustina sakabeh gusti. Ngan Mantenna anu teu keuna ku pati, anu jumeneng dina caang anu teu kaasupan, anu tacan kungsi aya anu ningali sarta moal aya anu bisa ningali. Ka Mantenna sagala hormat jeung kakawasaan anu langgeng. Amin.

Wejang jalma-jalma anu baleunghar dina jaman ayeuna, supaya ulah aradigung jeung ulah ngandelkeun kabeungharan anu teu puguh, tapi kudu ngandelkeun Rama urang, anu kalawan mucekil masihan sagala rupa ka urang pikeun dinikmati. Parentah maranehna sangkan milampah kahadean, beunghar ku amal nu hade, balabah, jeung iklas babagi, ku kituna maranehna numpukkeun pikeun dirina hiji pademen anu hade pikeun mangsa nu bakal datang, supaya maranehna bisa nyangking hirup anu saestuna hirup.

Timoteus, jaga naon anu dipercayakeun ka anjeun. Singkahan omongan anu kosong tur teu nurut ka Allah, jeung bantahan-bantahan tina anu disebut pangaweruh, sabab ku ngaku kana eta, aya sawatara jalma anu geus nyimpang tina iman. Mugia sih kurnia nyarengan aranjeun sadaya.