Kusadila Bapfumu hanga Baphangi
Mitsiku kwena batu ba bupika, buna fwanusu wa balongi bana bisi tala kinzambi hanga nzila ya kuvwa mbongu. Kudisephila kwenina muluta wa kyedika, amana zola dya mbongu dyátubula bahika. Pholu wusonga Thimoti ni kanwana mvita ya mboti, amana wusonga bamvwama ni basila kivuvu mwena Tata wetu, ka mu kimvwama ku.
6 1Batu boosu bana benina mu zitu dya bupika, bafwana kubanza ni bapfumu ba bawu bafwana luzitu lwosu, ndangu bakasafulaku khumbu ya Tata wetu yi kilongi. 2Bana benina yi bapfumu ba bakwikidi, bakabasafulaku kikuma bena baphangi; kaasi babasadila lawu kitoku, mukuma bana bisi vwa mamboti benina bakwikidi, batondama. Longa amana kebisa mambu mana.
Kilongi kya Luvunu Kibuta Mbutu ya Khadi
3Yuka ni mutu kalonga mambu makwawu, wudisa yi ndinga za bukheti za Pfumu wetu Yesu Kidisitu yi kilongi kina kifwanani yi kuyekamina kwena Nzambi, 4yandi wenina yi kimvunya, kazaya kima ku, kaasi wenina mbefu mu nzoluka ya phaka yi mvita za ndinga, mina misi buta kiphala, tsita, ngusi yi mabanza mambi, 5amana tendana kwa kosu tangwa mukati dya batu ba mayedi mazangana, bana bazangiswa kyedika, bana bisi banza ni kuyekamina kwena Nzambi kwenina nzila ya kuvwa mbongu.
6Kaasi mambu ma kinzambi hamosi yi kudisephila kwena kuvwa kwa lawu, 7mukuma, konda kima twánata mu tsi, amana tulendaku kunata ni kima ku kuna. 8Kaasi yuka ni twenina yi bidya yi miledi, mu byabina twasephila. 9Kaasi bana bisi zola kukituka bamvwama bisi bwa mu phukumunu, mu mutambu, yi mu nzoluka za lawu za buzoba amana za mbi, zina zisi dinginisa batu mu kuzanga yi mu kuzangana. 10Nzoluka ya mbongu yenina muyanzi wa mambu moosu ma mbi; mu kuyineka, ndambu ya batu bátota mu lukwikilu amana báditubula bawu-meni ni misongu mya lawu.
Nwana Muzingu wa Bukheti wa Lukwikilu
11Kaasi ngeyi, mutu wa Tata wetu, tina mambu mana moosu. Landa masonga, mambu ma kinzambi, lukwikilu, lungongu, kikwamina yi lembami. a a v11 «Mutu wa Tata wetu» kisi songila mambu mana Mabibila makwawu masi tuba «mutu wa Nzambi» — kutela Thimoti hanga mutu wuna wenina wa Tata, heku kaka wa nzambi wenina thama. 12Nwana muzingu wa bukheti wa lukwikilu; simba luzingu lwa mvula yi mvula luna wábokwala, amana wásamuna kimbangi kya bukheti ku thwala ya bambangi ba lawu. 13Yikutumi ku thwala ya Tata wetu, wuna wisi hana luzingu kwena bima byosu, yi Kidisitu Yesu, wuna wásamuna kimbangi kya bukheti ku thwala ya Phosi Philatu, b b v13 «Kisamu kyamboti» kya Yesu ku thwala ya Philatu kyákala ndinga yandi ya ngolu ni yandi wenina kinga amana wakwísa kuhana kimbangi kya kyedika (tala Yowani 18:33-37). 14ndangu walunda lutumu, konda mvindu amana konda kifu, yi kuna Pfumu wetu Yesu Kidisitu kamónika, 15luna Muyadi mosi wuna wasakumunwa, Kinga wa bakinga yi Pfumu wa bapfumu, kakwisa monikisa muna tangwa dya kyawu. 16Yandi mosi kenina wuna wisiku fwa, wenina zinga mu mwini wuna ka mutu ku kalenda fikama, wuna ka mutu ku kámona amana ka mutu ku kalenda kumona. Kwena yandi luzitu yi luyalu lwa mvula yi mvula. Abwabuna.
17Zimbula bamvwama ba tsi yayi ya lelu ni bakakala yi lulendu ku, amana bakatula kivuvu kya bawu mu kimvwama kina kisi zimbakana ku, kaasi mu Tata wetu, wuna wisi tuheka bima byosu yi kimvwama kyosu ndangu tuta mukinzi. 18Batuma ni basala mamboti, bakala bamvwama mu bisalu bya mboti, bakala ba kukaba, bakala yi luzolu lwa kukabisa bima bya bawu, 19basweka kikuma kya bawu-meni mupfundila wamboti kikuma kya mana makwísa, ndangu basimba luzingu luna lwenina luzingu lwa kyedika.
20Thimoti, lunda mana máhekwala ngeyi. Bwisa phandi za phamba zakonda kinzambi yi tendana kwa mana bisi tela nduka, 21mukuma mu kusamuna yawu, ndambu ya batu bayekukini mu lukwikilu. Khenda yakala yi benu boosu.
