Wazodi wa Thimoti 1 FHB Father's Heart Bible™

1 ¹Pholu, thumwa wa Yesu Kidisitu muna luzolu lwa Tata wetu, muna lusilu lwa luzingu mwena Kidisitu Yesu, ²kwena Thimoti, Mwana wama watondama: Khenda, kyadi yi ngemba bitukini kwena Tata wetu yi Kidisitu Yesu Pfumu wetu.

Lemisa Muleku wuna Wákuheka Tata wetu

³Yisi vutula matondu kwena Tata wetu, wuna yisi sadila muna katsatsa ka bukheti hanga batata betu, konda kulembwa yisi lusungula muna bisambu byama, phipha yi mwini. ⁴Mu kuyubuka matsanga maku, yenina yi luzolu lwa kumona ngeyi, hanga yibabasa yi kyesi. ⁵Yisi yubuka lukwikilu lwaku lwakonda bukavungalosi—lwalu lwazínga theti mwena nkaka waku Lowisi yi mwena ngudi waku Yunisi, amana bwabu, yenina yi kikumbwala ni lwenina phi mwena ngeyi.

⁶Yihana yikuyubulula ndangu wulemisa hika kabu dya Tata wetu dina dyenina mwena ngeyi, muna kusya kwa moku mama. ⁷Mukuma Tata wetu katúhanaku kitembu kya bweya, kaasi Kitembu kya ngolu, kya lungongu yi kya kukanga kwa mbundu. ⁸Yihana, kuyukaku tsoni ku kimbangi kya Pfumu wetu, keti kikuma kyama, meni mutu wa boloku wandi, kaasi wukhundakana mu kiwayi kikuma kya Musamu wa Bukheti, muna ngolu za Tata wetu. ⁹Yandi wátuhulula amana wátutela mu mbila ya bukheti, ka mu mihangu myetu ku, kaasi muna mabanza mandi yi khenda yandi, mana matuhanama mwena Kidisitu Yesu, buna nza kayandika ku, ¹⁰amana bwabu mamonisama muna kumonika kwa Muhuludi wetu Kidisitu Yesu, wuna wámanisa lufwa amana watemuna luzingu yi luzingu luna lwisiku fwa muna Musamu wa Bukheti. ¹¹Kikuma kya Musamu wawu, bángyadikila meni ndangu yikala mbambala, thumwa amana mutu wa kulonga. ¹²Kikuma kya bwabuna yisi mona kiwayi bwabu. Kaasi yisi yukaku tsoni, mukuma nzayi nani wuna yakwikila, amana yenina yi kikumbwala ni yandi kenina yi ngolu za kukengila mana mámpheka tii yi kuna kilumbu kyakina.

¹³Simbidila mbandu ya ndinga za masonga zina wayuka kwena meni, muna lukwikilu yi muna lungongu mwena Kidisitu Yesu. ¹⁴Kengila kima kya bukheti kina kyáhekama kwena ngeyi, muna Kitembu Kyatoma kina kizingila mwena betu.

¹⁵Wuzayi mama: batu boosu bana benina mu kinzunga kya Aziya básisa meni, mukati dya bawu, Fizele yi Hemongene. ¹⁶Bika Pfumu wetu Yesu kaheka kyadi kwena nzu ya Onezifodi, mukuma mbala za hika wálembiki kitembu kyama amana káyukaku tsoni ku miyololu myami. ¹⁷Kinga, buna kátula ku Loma, wásanda meni mu ngolu zoosu tii káwana meni. ¹⁸Bika Pfumu wetu Yesu kaheka ndangu kawána kyadi kwena Pfumu muna kilumbu kyakina. Wuzayi mboti-mboti bwosu kasadila ku Efeso.