2 Timoteo 1

1 ¹Si Pablo, apostol ni Cristo Jesus ayon sa kalooban ng ating Ama, ayon sa pangako ng buhay na nasa kay Cristo Jesus, ²kay Timoteo, minamahal kong anak: Sumaiyo nawa ang biyaya, awa, at kapayapaang mula sa ating Ama at kay Cristo Jesus na ating Panginoon.

Paningasin ang Alab na Ibinigay sa Iyo ng ating Ama

³Nagpapasalamat ako sa ating Ama, na pinaglilingkuran ko nang may malinis na budhi gaya ng ginawa ng aking mga ninuno, habang walang tigil kang naaalala sa aking mga panalangin, gabi't araw. ⁴Sa pag-alaala sa iyong mga luha, nananabik akong makita ka, upang mapuspos ako ng kagalakan. ⁵Naaalala ko ang iyong tapat na pananampalataya—na unang nabuhay sa iyong lola na si Loida at sa iyong inang si Eunice, at ngayon, natitiyak ko, ay nasa iyo na rin.

⁶Kaya't ipinapaalala ko sa iyo na paningasin mo sa alab ang kaloob ng ating Ama na nasa iyo, sa pamamagitan ng pagpapatong ng aking mga kamay. ⁷Sapagkat hindi tayo binigyan ng ating Ama ng espiritu ng takot, kundi ng Espiritu ng kapangyarihan, pag-ibig, at pagpipigil sa sarili. ⁸Kaya't huwag kang mahiya sa patotoo ng ating Panginoon, ni sa akin na kanyang bilanggo, kundi makibahagi ka sa paghihirap para sa ebanghelyo sa pamamagitan ng kapangyarihan ng ating Ama. ⁹Iniligtas at tinawag niya tayo sa isang banal na pagtawag, hindi ayon sa ating mga gawa kundi ayon sa kanyang sariling layunin at biyaya, na ipinagkaloob sa atin kay Cristo Jesus bago pa nagsimula ang panahon, ¹⁰at ngayo'y inihayag sa pamamagitan ng pagpapakita ng ating Tagapagligtas na si Cristo Jesus, na nagwakas sa kamatayan at nagbigay-liwanag sa buhay at kawalang-kamatayan sa pamamagitan ng ebanghelyo. ¹¹Para sa ebanghelyong ito ay itinalaga ako bilang mangangaral, apostol, at guro. ¹²Iyan ang dahilan kaya ako nagtitiis nang ganito. Ngunit hindi ako nahihiya, sapagkat kilala ko kung sino ang aking pinaniwalaan, at natitiyak kong kaya niyang ingatan ang ipinagkatiwala sa akin hanggang sa araw ng kanyang pagbabalik.

¹³Panghawakan mo ang huwaran ng mga wastong salitang narinig mo sa akin, sa pananampalataya at pag-ibig na nasa kay Cristo Jesus. ¹⁴Ingatan mo ang mabuting bagay na ipinagkatiwala sa iyo, sa pamamagitan ng Espiritu Santo na nananahan sa atin.

¹⁵Alam mo ito: ang lahat sa lalawigan ng Asia ay tumalikod sa akin, kabilang sina Figelo at Hermogenes. ¹⁶Pagkalooban nawa ng ating Panginoong Jesus ng awa ang sambahayan ni Onesiforo, sapagkat madalas niya akong pinapaginhawa at hindi siya nahiya sa aking mga tanikala. ¹⁷Sa halip, nang dumating siya sa Roma ay masigasig niya akong hinanap hanggang sa matagpuan niya ako. ¹⁸Ipagkaloob nawa ng ating Panginoong Jesus na makasumpong siya ng awa mula sa Panginoon sa araw na iyon. Alam na alam mo kung gaano siya naglingkod sa Efeso.