2 ጢሞቴዎስ 1

1 ¹ጳውሎስ፣ በአባታችን ፈቃድ፣ በክርስቶስ ኢየሱስ ባለው የሕይወት ተስፋ መሠረት የክርስቶስ ኢየሱስ ሐዋርያ የሆንሁ፣ ²ለተወደደ ልጄ ለጢሞቴዎስ፤ ከአባታችንና ከጌታችን ከክርስቶስ ኢየሱስ ጸጋ፣ ምሕረትና ሰላም ይሁን።

አባታችን የሰጠህን ነበልባል አቀጣጥል

³እንደ አባቶቼ በንጹሕ ኅሊና የማገለግለውን አባታችንን አመሰግናለሁ፤ ሌትና ቀን በጸሎቴ ሳላቋርጥ አስብሃለሁ። ⁴እንባህን እያሰብሁ፣ በደስታ እንድሞላ ላይህ እናፍቃለሁ። ⁵ቅን የሆነውን እምነትህን አስታውሳለሁ፤ ይህም መጀመሪያ በአያትህ በሎይድና በእናትህ በኤውኒቄ የኖረ ሲሆን፣ አሁንም በአንተ ጭምር እንዳለ ተረድቻለሁ።

⁶ስለዚህ እጄን በመጫኔ በአንተ ውስጥ ያለውን የአባታችንን ስጦታ እንድታቀጣጥለው አሳስብሃለሁ። ⁷አባታችን የፍርሃትን መንፈስ ሳይሆን፣ የኀይልን፣ የፍቅርንና ራስን የመግዛትን መንፈስ ሰጥቶናልና። ⁸ስለዚህ ስለ ጌታችን ምስክርነት፣ ወይም የእርሱ እስረኛ ስለሆንሁ ስለ እኔ አታፍር፤ ነገር ግን በአባታችን ኀይል ስለ ወንጌል መከራ ተቀበል። ⁹እርሱ አዳነን፤ በቅዱስ ጥሪም ጠራን፤ ይህም እንደ ሥራችን ሳይሆን፣ እንደ ራሱ ዐላማና ጸጋ ነው፤ ይህ ጸጋም ዘመን ሳይጀምር በክርስቶስ ኢየሱስ ተሰጠን። ¹⁰አሁን ግን በመድኀኒታችን በክርስቶስ ኢየሱስ መገለጥ ታወቀ፤ እርሱም ሞትን ሻረ፤ በወንጌልም ሕይወትንና አለመሞትን አበራ። ¹¹ለዚህ ወንጌል ሰባኪ፣ ሐዋርያና አስተማሪ ሆኜ ተሾምሁ። ¹²በዚህ ምክንያት እንዲህ መከራ እቀበላለሁ፤ ነገር ግን አላፍርም፤ ያመንሁትን ዐውቃለሁና፤ ያስረከብሁትንም እስከሚመለስበት ቀን ድረስ ሊጠብቅ እንደሚችል ተረድቻለሁ።

¹³ከእኔ የሰማኸውን የጤናማ ቃላት ምሳሌ በክርስቶስ ኢየሱስ ባለው እምነትና ፍቅር ያዝ። ¹⁴በውስጣችን በሚኖረው በመንፈስ ቅዱስ በኩል ለአንተ የተሰጠህን መልካም ዐደራ ጠብቅ።

¹⁵በእስያ አውራጃ ያሉት ሁሉ ፊጌሎስንና ሄርሞጌኔስን ጨምሮ ከእኔ እንደ ዞሩ ይህን ታውቃለህ። ¹⁶ጌታችን ኢየሱስ ለአናሲፎሩ ቤተ ሰብ ምሕረትን ይስጥ፤ እርሱ ብዙ ጊዜ አበረታኝ፤ በሰንሰለቴም አላፈረምና። ¹⁷ከዚህ ይልቅ፣ ወደ ሮም በመጣ ጊዜ እስኪያገኘኝ ድረስ በትጋት ፈለገኝ። ¹⁸ጌታችን ኢየሱስ በዚያ ቀን ከጌታ ዘንድ ምሕረትን እንዲያገኝ ይስጠው፤ በኤፌሶን ምን ያህል እንዳገለገለ አንተ በሚገባ ታውቃለህ።