2 ጢሞቴዎስ 2

2 ¹እንግዲህ ልጄ ሆይ፣ በክርስቶስ ኢየሱስ ባለው ጸጋ ተጠናከር። ²በብዙ ምስክሮች ፊት ከእኔ የሰማኸውንም፣ ሌሎችን ደግሞ ሊያስተምሩ ለሚችሉ ታማኝ ሰዎች አደራ ስጥ። ³እንደ ክርስቶስ ኢየሱስ መልካም ወታደር፣ የመከራ ተካፋይ ሁን። ⁴በውትድርና የሚያገለግል ማንም ወታደር ያስመለመለውን ደስ ሊያሰኝ ስለሚፈልግ፣ በዕለታዊ ኑሮ ጒዳይ አይጠላለፍም። ⁵እንዲሁም አንድ ተወዳዳሪ እንደ ሕጉ ካልተወዳደረ በቀር አክሊል አይቀዳጅም። ⁶የሚደክመው ገበሬ ከፍሬው ድርሻ ለመቀበል ፊተኛው ሊሆን ይገባዋል። ⁷ጌታ በሁሉ ነገር ማስተዋልን ይሰጥሃልና የምለውን ነገር አስተውል።

⁸በወንጌሌ እንደ ተነገረው፣ ከዳዊት ዘር የሆነውን፣ ከሙታን የተነሣውን ኢየሱስ ክርስቶስን አስብ፤ ⁹ስለ እርሱም እንደ ወንጀለኛ በሰንሰለት ታስሬ መከራ እቀበላለሁ። የአባታችን ቃል ግን አልታሰረም! ¹⁰ስለዚህ እነርሱ ደግሞ በክርስቶስ ኢየሱስ ያለውን ድነት ከዘላለም ክብር ጋር እንዲያገኙ፣ ስለ ተመረጡት ሁሉን ነገር እታገሣለሁ። ¹¹ይህ ቃል የታመነ ነው፤ ከእርሱ ጋር ከሞትን፣ ከእርሱ ጋር ደግሞ በሕይወት እንኖራለን፤ ¹²ብንጸና፣ ከእርሱ ጋር ደግሞ እንነግሣለን፤ ብንክደው፣ እርሱ ደግሞ ይክደናል፤ ¹³ታማኝ ባንሆን፣ እርሱ ታማኝ ሆኖ ይኖራል፤ ራሱን ሊክድ አይችልምና።

በአብ ዘንድ የተመሰከረለት ሠራተኛ

¹⁴ይህን ነገር አስታውሳቸው፤ በቃላት እንዳይከራከሩ በአባታችን ፊት አስጠንቅቃቸው፤ ይህ ፋይዳ የሌለው ሆኖ የሚሰሙትን ያጠፋልና።

¹⁵የእውነትን ቃል በትክክል የሚያስረዳ፣ የማያፍር ሠራተኛ ሆነህ፣ ራስህን በአባታችን ዘንድ የተመሰከረልህ አድርገህ ለማቅረብ ትጋ። ¹⁶ከንቱና ለእግዚአብሔር የሚቃረን ለፍለፋን ግን ራቅ፤ ሰዎችን ወደ ባሰ ክፋት ይመራልና፤ ¹⁷ንግግራቸውም እንደ ነቀርሳ ይስፋፋል። ከእነርሱም መካከል ሄሜኔዎስና ፊሊጦስ አሉ፤ ¹⁸እነዚህም ትንሣኤ አስቀድሞ እንደ ሆነ በማለት ከእውነት የተሳሳቱ ናቸው፤ የአንዳንዶችንም እምነት ያፈርሳሉ። ¹⁹ይሁን እንጂ የአባታችን የጸና መሠረት ጸንቶ ይቆማል፤ እንዲህ የሚል ማኅተም አለው፤ “እርሱ የራሱ የሆኑትን ያውቃል፤” ደግሞም፣ “የእርሱን ስም የሚጠራ ሁሉ ከክፋት ይራቅ።”

²⁰በትልቅ ቤት ውስጥ የወርቅና የብር ዕቃ ብቻ ሳይሆን፣ የእንጨትና የሸክላ ዕቃ ደግሞ አለ፤ አንዳንዱ ለክብር፣ አንዳንዱም ለውርደት ነው። ²¹እንግዲህ ማንም ራሱን ከእነዚህ ቢያነጻ፣ ለክብር የተለየ ዕቃ ይሆናል፤ የተቀደሰ፣ ለጌታው የሚጠቅም፣ ለበጎ ሥራ ሁሉ የተዘጋጀ ነው።

²²ከወጣትነት ምኞት ሽሽ፤ ጽድቅን፣ እምነትን፣ ፍቅርንና ሰላምን ከንጹሕ ልብ ጌታን ከሚጠሩት ጋር ተከታተል። ²³ጠብ እንደሚወልዱ ታውቃለህና ከሞኝነትና ከማይጠቅም ክርክር ራቅ። ²⁴የጌታ አገልጋይ ለሁሉ ገር፣ ለማስተማር የሚችል፣ ክፉ ሲደርስበት የሚታገሥ ሊሆን ይገባዋል እንጂ ተጣጢ ሊሆን አይገባም፤ ²⁵የሚቃወሙትን በገርነት ይገሥጽ፤ ምናልባት አባታችን እውነትን ያውቁ ዘንድ ንስሓን ይሰጣቸው ይሆናል፤ ²⁶ፈቃዱን እንዲያደርጉ ማርኮ ይዟቸው ከነበረው ከዲያብሎስ ወጥመድ አምልጠው፣ ወደ ልቡናቸው ይመለሱ ዘንድ።