Ayyaanaan Jabaatanii Obsuu
Phaawulos Ximotewos ayyaana irraa humna akka fudhatuu fi barsiisa sana namoota amanamoo warra kaan barsiisuu danda'anitti akka dabarsu itti hima. Loltuu, dorgomaa, qotee bulaa — fakkiin hundinuu waa'ee dhiphina obsuuti. Falmiin jechootaa faayidaa hin qabu; garraamummaadhaan sirreessi, Abbaan keenya qalbii jijjiirrachuu kennuu danda'aatii.
2 1Kanaaf, ilma koo, ayyaana Kristos Yesus keessa jiru irraa jabina argadhu. 2Waan ati dhuga baatota baay'ee durattii ana irraa dhageesse, namoota amanamoo kan nama kaan illee barsiisuu danda'aniitti kenni. 3Akka loltuu gaarii Kristos Yesus dhiphina keessatti qooda kee fudhadhu. 4Loltuun tajaajila irra jiru tokko iyyuu dhimmoota jireenya nama idilee keessatti of hin xaxu; inni isa waraane gammachiisuu barbaada. 5Taphataan tokko seera irratti hundaa'ee yoo hin dorgomne, gonfoon isaaf hin kennamu. 6Qotee cimee hojjetu inni dura firii irraa qooda fudhachuu qaba. 7Waan ani jedhu yaadi; Gooftaan waan hundumaa keessatti hubannaa sif in kenna.
8Yesus Kristos kan warra du'aniin ka'e, sanyii Daawit ta'e, akkuma wangeela koo keessatti jedhametti yaadadhu, 9isa kanaaf ani akka nama hamaa hidhamee in dhiphadha. Garuu dubbiin Abbaa keenyaa hin hidhamne! 10Kanaaf ani warra filataman jedhee waan hundumaa in obsa; isaanis jireenya bara baraa ulfina wajjin fayyina Kristos Yesus keessa jiru akka argataniif. 11Dubbiin kun amanamaa dha: Yoo isa wajjin du'ne, isa wajjin in jiraanna; 12yoo obsine, isa wajjin in moofna; yoo isa ganne, innis nu in gana; 13yoo amanamoo hin taane, inni amanamaa ta'ee in jiraata, waan of ganuu hin dandeenyeef.
Hojjetaa Abbaan Biratti Fudhate
14Waan kana isaanitti yaadachiisi; dubbii irratti akka wal hin lolleef Abbaa keenya durattii isaan akeekkachiisi—kun faayidaa hin qabu, dhaggeeffattoota immoo in balleessa.
15Ofii kee Abbaa keenya duratti fudhatama argatee, hojjetaa hin qaanoofne, dubbii dhugaa sirriitti kan qoodu ta'ee dhiheessuuf carraaqi. 16Garuu haasaa duwwaa fi Waaqayyoon hin kabajne irraa of fageessi; inni namoota hammeenya keessa dabalee in oofa, 17dubbiin isaaniis akka madaa nyaatu in babal'ata. Isaan keessaa Hiimenayosii fi Filexos jiru, 18isaan dhugaa irraa jallatanii, du'aa ka'uun duraanuu ta'eera jedhanii, amantii namoota tokko tokkoo in diiguu. 19Garuu hundeen Abbaa keenyaa isa jabaan in dhaabata, chaappaa'ee kanaan: «Inni warra isaa ta'an in beeka,» fi «Namni maqaa isaa waamu hundinuu hammeenya irraa haa deebi'u.»
20Mana guddaa keessa meeshaan warqee fi meetii qofa osoo hin taane, kan muka fi suphee illee jira—kan tokko kabajaaf, kan tokko immoo salphinaaf. 21Kanaaf namni tokko yoo of kana irraa qulqulleesse, meeshaa kabajaa in ta'a: qulqulluu, gooftaadhaaf bu'aa qabeessa, hojii gaarii hundumaaf qophaa'aa.
22Hawwii dargaggummaa irraa baqadhu; qajeelummaa, amantii, jaalala fi nagaa warra onnee qulqulluu irraa Goofticha waaman wajjin hordofi. 23Falmii gowwaa fi beekumsa hin qabne irraa of qusadhu; ati akka wal-lolaa dhalchan beekta. 24Tajaajilaan Gooftaa wal hin lolu; garuu nama hundumaaf laaffisaa, barsiisuuf dandeettii kan qabu, yeroo miidhamu obsaa ta'uu qaba. 25Warra isa mormaniif laaffisaan isaan sirreessa. Tarii Abbaan keenya dhugaa akka beekaniif qalbii jijjiirrachuu isaaniif in kenna, 26isaanis of hubatanii, kiyyoo seexanaa isaan itti qabee fedhii isaa akka raawwataniif hidhee jiru keessaa in miliqu.
