2ይ ጢሞቴዎስ 2 FHB Father's Heart Bible™

2 ¹እምበኣር፥ ወደይ፥ በቲ ኣብ ክርስቶስ ኢየሱስ ዘሎ ፀጋ ተጠናኸር። ²እቲ ኣብ ቅድሚ ብዙሓት መሰኻኽር ካባይ ዝሰማዕኻዮ ድማ፥ ንኻልኦት ከምህሩ ንዝኽእሉ እሙናት ሰባት ኣማሕፅኖ። ³ከም ፅቡቕ ወታደር ክርስቶስ ኢየሱስ ኮይንካ መከራ ተኻፈል። ⁴ዝኾነ ወታደር ብግልጋል እንተሎ፥ ነቲ ዝመልመሎ ኸሐጕስ ይደሊ እዩ እሞ፥ ኣብ ናይ መነባብሮ ነገር ኣይጠላለፍን። ⁵ተቓዳዳማይ ድማ ከምቲ ሕጊ እንተ ዘይተቓዲሙ፥ ኣኽሊል ኣይቕበልን እዩ። ⁶እቲ ዝፅዕር ሓረስታይ፥ ካብ ፍረ ቐዲሙ ኽቕበል ይግብኦ እዩ። ⁷ጐይታ ኣብ ኵሉ ነገር ምስትውዓል ክህበካ እዩ እሞ፥ ነቲ ዝብሎ ዘለኹ ኣስተንትኖ።

⁸ከምቲ ኣብ ወንጌለይ ዘሎ፥ ካብ ምዉታን ዝተንሰአ፥ ካብ ዘርኢ ዳዊት ዝኾነ ኢየሱስ ክርስቶስ ዘክር፤ ⁹ምእንታኡ ኸም ገበነኛ ተኣሲረ መከራ እቕበል ኣለኹ። ቃል ኣቦና ግና ኣይእሰርን እዩ! ¹⁰ስለዙይ እቶም ሕሩያት ነቲ ኣብ ክርስቶስ ኢየሱስ ዘሎ ምድሓን ምስ ናይ ዘለኣለም ክብሪ ምእንቲ ኽረኽቡ፥ ስለኦም ኵሉ እፅመም ኣለኹ። ¹¹እዝ ቃል እዙይ እሙን እዩ፦ ምስኡ እንተ ሞትና፥ ምስኡ ድማ ክንነብር ኢና፤ ¹²እንተ ፀመምና፥ ምስኡ ድማ ክንነግስ ኢና፤ እንተ ኸሓድናዮ፥ ንሱ ኸዓ ክኽሕደና እዩ፤ ¹³ንሕና እሙናት እንተ ዘይኮና፥ ንሱ እሙን ኮይኑ ይነብር፤ ንባዕሉ ኽኽሕድ ኣይኽእልን እዩ እሞ።

ብኣቦ ዝተፈተነ ሰራሒ

¹⁴ነዝ ነገራት እዙይ ኣዘክሮም፥ ብዛዕባ ቃላት ከይባእሱ ድማ ኣብ ቅድሚ ኣቦና ኣጠንቅቆም፤ ጥቕሚ የብሉን፥ ነቶም ዝሰምዑ ኸዓ የጥፍኦም።

¹⁵ነቲ ቃል ሓቂ ብቕንዕና እናኸፋፈልካ፥ ኣብ ቅድሚ ኣቦና ዝተፈተንካ፥ ዘይሓፍር ሰራሒ ኾይንካ ርእስኻ ንምቕራብ ፅዓር። ¹⁶ካብ ከንቱን ዘይቕዱስን ዘረባ ግና ርሓቕ፤ ናብ ዝበለፀ ረሲእነት የብፅሖም እዩ እሞ፤ ¹⁷ዘረባኦም ከዓ ኸም ዝበስብስ ቍስሊ ክላባዕ እዩ። ካብኣቶም ሄሜኔዎስን ፊሌጦስን እዮም፥ ¹⁸ንሳቶም ትንሳኤ ድሮ ኸም ዝኾነ እናበሉ ኻብ ሓቂ ዝተፈለዩ፥ እምነት ገሊኦም ሰባትውን ዘፍርሱ እዮም። ¹⁹እቲ ፅኑዕ መሰረት ኣቦና ግና ደው ኢሉ ኣሎ፤ ከምዙይ ኢሉ ተሓቲሙ፦ “ነቶም ናቱ ዝኾኑ ይፈልጦም፥” ከምኡውን “ስሙ ዝፅውዕ ኵሉ ካብ እከይ ይረሓቕ።”

²⁰ኣብ ዓብዪ ገዛ፥ ናይ ወርቅን ብሩርን ጥራሕ ዘይኮነስ፥ ናይ ዕንፀይቲ ከምኡውን ናይ መሬት ኣቕሑ እውን ኣለዉ፤ ገሊኡ ንኽብሪ፥ ገሊኡ ድማ ንሕስረት እዩ። ²¹እምበኣር ሓደ ሰብ ካብዝ ነገራት እዙይ ንርእሱ እንተ ኣንፅሀ፥ ንኽብሪ ዝኸውን ኣቕሓ፥ ቅዱስ፥ ንጐይታ ዝጠቅም፥ ንዅሉ ፅቡቕ ግብሪ ድማ ዝተዳለወ ይኸውን።

²²ካብ ትምኒት ንእስነትካ ህደም፤ ምስቶም ካብ ንፁህ ልቢ ንጐይታ ዝፅውዑ ኾይንካ፥ ፅድቅን እምነትን ፍቕርን ሰላምን ስዓብ። ²³ባእሲ ኸም ዝወልዱ ትፈልጥ ኢኻ እሞ፥ ካብ ዓሻን ዘይምሁርን ክትዕ ርሓቕ። ²⁴ባርያ ጐይታ ተባኣሳይ ክኸውን ኣይግብኦን፤ ንዅሉ ሕያዋይ፥ ክምህር ዝኽእል፥ ክፉእ ምስ ተገብሮ ዝዕገስ ደኣ ይኹን እምበር። ²⁵ነቶም ዝቃወምዎ ብህድኣት እናገሰፀ፤ ምናልባሽ ኣቦና ንስሃ ሂቡ ሓቂ ኸም ዝፈልጡ ይገብሮም ይኸውን እዩ፥ ²⁶ነቒሖም ድማ፥ ፍቓዱ ኽገብሩ ኻብቲ ተማሪኾም ዝሓዞም መፈንጠር ድያብሎስ የምልጡ ይኾኑ።