2ይ ጢሞቴዎስ 1 FHB Father's Heart Bible™

1 ¹ብፍቓድ ኣቦና ሃዋርያ ክርስቶስ ኢየሱስ ዝኾነ ጳውሎስ፥ ከምቲ ኣብ ክርስቶስ ኢየሱስ ዘሎ ተስፋ ህይወት፥ ²ናብ ጢሞቴዎስ፥ ፍቑር ወደይ፤ ካብ ኣቦናን ካብ ጐይታና ክርስቶስ ኢየሱስን፥ ፀጋን ምሕረትን ሰላምን ይኹን።

ነቲ ኣቦና ዝሃበካ ሃልሃልታ ኣባርዖ

³ነቲ ከምቲ ኣቦታተይ ዘገልገልዎ ብንፁህ ሕሊና ዘገልግሎ ኣቦና፥ ለይትን መዓልትን ኣብ ፀሎተይ እንተየቋረፅኩ ዅልሻዕ እናዘከርኩኻ፥ አመስግኖ ኣለኹ። ⁴ንብዓትካ እናዘከርኩ፥ ብሓጐስ ምእንቲ ኽመልእ፥ ክሪአካ እናፍቕ ኣለኹ። ⁵ነታ ኣባኻ ዘላ ቅንዕቲ እምነት እዝክር ኣለኹ፤ እዚኣ ቅድም ኣብ ኖኻ ሎይስን ኣብ ኣዴኻ ኤውንቄን ዝነበረት፥ ሕዚ ድማ ኣባኻውን ከም ዘላ ርግፀኛ እየ።

⁶ስለዙይ ነቲ ብምንባር ኣእዳወይ ኣባኻ ዘሎ ውህብቶ ኣቦና፥ ከም ብሓድሽ ከተባርዖ የዘኻኽረካ ኣለኹ። ⁷ኣቦና መንፈስ ፍርሓት ኣይኮነን ዝሃበና፥ መንፈስ ሓይልን ፍቕርን ገዛእ ርእስኻ ምግዛእን ደኣ እምበር። ⁸ስለዙይ ብምስክርነት ጐይታና፥ ብኣይ ብእሱሩ ድማ ኣይትሕፈር፤ ብሓይሊ ኣቦና ደኣ ምእንቲ ወንጌል መከራ ተኻፈል እምበር። ⁹ኣድሒኑ ብቅዱስ ጽውዓ ፀውዐና፤ እዙይ ከዓ ከም ገዛእ ፍቓዱን ፀጋን ደኣ እምበር ከም ግብርና ኣይኮነን። እዛ ፀጋ እዚኣ ቅድሚ ዘመናት ኣብ ክርስቶስ ኢየሱስ ተውሃበትና፥ ¹⁰ሕዚ ግና ብምግላፅ መድሕንና ክርስቶስ ኢየሱስ ተገሊፃ፤ ንሱ ንሞት ኣጥፍአ፥ ብወንጌል ድማ ህይወትን ዘይምማትን ኣብርሀ። ¹¹ነዝ ወንጌል እዙይ ከዓ ሰባኺን ሃዋርያን መምህርን ክኸውን ተሾምኩ። ¹²ስለዙይ ከዓ እዙይ ዝኣመሰለ መከራ እቕበል ኣለኹ። ንመን ከም ዝኣመንኩ እፈልጥ እየ፤ ነቲ ዝተኣማመነኒ ከዓ ክሳዕ እታ ዝምለሰላ መዓልቲ ክሕልዎ ከም ዝኽእል ርግፀኛ እየ እሞ፥ ኣይሓፍርን እየ።

¹³ነቲ ካባይ ዝሰማዕኻዮ ኣብነት ጥዑይ ቃላት፥ ብእምነትን ብፍቕርን ኣብ ክርስቶስ ኢየሱስ ሓዞ። ¹⁴ነቲ ኣማሚኑ ዝሃበካ ፅቡቕ ሕድሪ፥ በቲ ኣባና ዝነብር መንፈስ ቅዱስ ሓልዎ።

¹⁵እዙይ ትፈልጥ ኢኻ፤ እቶም ኣብ ሃገር እስያ ዘለዉ ዅሎም፥ ፊገሎስን ሄርሞጌኔስን ሓዊሶም፥ ካባይ ተመሊሶም እዮም። ¹⁶ጐይታና ኢየሱስ ንቤተሰብ ኦኔሲፎሮስ ምሕረት ይሃቦም፤ ንሱ ብዙሕ ጊዜ ኣዕሪፉኒ እዩ እሞ፥ ብመቝሐይ ድማ ኣይሓፈረን። ¹⁷ብኣንፃሩ ናብ ሮሜ ምስ መፀ፥ ክሳዕ ዝረኽበኒ ኣበርቲዑ ደለየኒ። ¹⁸ጐይታና ኢየሱስ በታ መዓልቲ እቲኣ ካብ ጐይታ ምሕረት ክረክብ ይሃቦ። ኣብ ኤፌሶን ክንደይ ኣቢሉ ኸም ዘገልገለ፥ ባዕልኻ ኣፀቢቕካ ትፈልጥ ኢኻ።