提摩太後書 2

2 ¹所以，我嘅孩子啊，你要靠住基督耶穌裏面嘅恩典去得力。 ²你喺好多見證人面前由我度聽到嘅嘢，就要交託畀啲忠心、又有能力去教導人嘅人。 ³你要好似基督耶穌嘅精兵咁，同大家一齊承擔苦難。 ⁴當值嘅士兵唔會纏喺民間嘅事務上面——佢一心想討招募佢嗰位歡喜。 ⁵運動員若果唔係按規矩去比賽，就唔會得到冠冕。 ⁶辛勤耕種嘅農夫，理應第一個分享收成。 ⁷你要細心思想我所講嘅嘢，因為主必喺凡事上賜你悟性。

⁸你要記住耶穌基督，佢從死人中復活，係大衞嘅後裔，正如我所傳嘅福音一樣， ⁹我為咗呢個福音受苦，好似犯人咁被鎖住。但係我哋嘅父嘅道，係鎖唔住嘅！ ¹⁰所以我為咗蒙揀選嘅人忍受一切，好等佢哋都可以得到喺基督耶穌裏面嘅救恩，並且得着永遠嘅榮耀。 ¹¹呢句話係可信嘅： 我哋若果同佢一齊死，都必同佢一齊活； ¹²我哋若果忍耐， 就都必同佢一齊作王； 我哋若果唔認佢，佢都會唔認我哋； ¹³我哋若果失信， 佢仍然係信實嘅， 因為佢唔可以否認自己。

一個蒙父悅納嘅工人

¹⁴你要提醒佢哋呢啲事，喺我哋嘅父面前警戒佢哋，唔好為咗言詞爭辯——呢啲事冇益處，仲會敗壞聽嘅人。

¹⁵你要竭力喺我哋嘅父面前把自己獻上，作一個蒙悅納、無愧嘅工人，按正意講解真理嘅道。 ¹⁶但係要遠避啲空洞、不敬虔嘅閒談，因為呢啲會令人越陷越深，越發不敬虔， ¹⁷佢哋嘅話會好似毒瘡咁蔓延。當中有許米乃同腓理徒， ¹⁸佢哋偏離咗真理，話復活已經發生咗，敗壞咗啲人嘅信心。 ¹⁹然而，我哋嘅父嘅穩固根基仍然企得穩，上面蓋咗印：「主認得屬佢嘅人」，又話「凡稱呼主名嘅人，都要離開罪惡」。

²⁰喺一間大屋裏面，唔單只有金器銀器，仲有木器同瓦器——有啲係作貴重用途嘅，有啲係作卑賤用途嘅。 ²¹所以人若果自潔，脫離呢啲卑賤嘅事，就可以成為貴重嘅器皿：成聖、合主人用、預備好去行各樣善工。

²²你要逃避少年人嘅私慾，同埋清心求告主嘅人一齊追求義、信、愛同和平。 ²³至於嗰啲愚拙、無知嘅爭辯，你要一概唔好參與，因為你知道呢啲會惹起爭端。 ²⁴主嘅僕人唔應該同人爭吵，反而要對眾人溫柔，善於教導，受人虧負仍然忍耐， ²⁵用溫柔嘅態度去糾正嗰啲敵對佢嘅人。或者我哋嘅父會賜佢哋悔改嘅心，去認識真理， ²⁶佢哋就可以醒悟過嚟，逃脫魔鬼嘅網羅——佢哋原本被魔鬼擄住，隨佢嘅意思去行。