Phaangkriang pina nat thangga khaang theinu
Paul na Timothy khou phaangkriang khouna sung nat thang lang khatle mi katei ding kalum thang ngamnu balumsa zanu mi nun khou hiaknu chong ding bachoi thang lang rinne. Kraanmi, talen ongnu, lou mi — badan khat khat ga riangre khaangnu lang bi gaye. Chong lang bi kae kanaanu ga tongnu maaknuwe; bangiam toga laak thangro, balangbe daanla ani Pa na sung kale thangnu pi thanglune.
2 1Atibriakpina, asa kapaisa, Christa Jisu khou ongnu phaangkriang khouna nang sung nat thangro. 2Khatle sake rwan kasemba meithaan bi eina nakhou rinnu chong ga, mi katei ding le kalum thang ngamnu balumsa zanu mi nun khou nangna bachoi thang ngo. 3Christa Jisu om kasanu kraanmi khat danga, nang le riangre khaang ongro. 4Kraanmi pakhatchana chwan to ong basaan talei ram om lang bing bi tang lat make; balangbe maan kraanmi lang chak thang ongnu ding pem thang lang nge. 5Khatle talen ongnu mina chongtan nung suiga talen make dabe, maan luthop lou latlaye. 6Kraan katwakka to ongnu lou mi gana tapaan baloi ga karangga lousunu to ding gaye. 7Eina rinnu chong ga nang baningsuwo, balangbe Pukraangba na lang bing nung suiga nang khou theinu pi thanglune.
8Asacham bi rinnu danga, thinu nun lak pina ring thou thangnu, David om chaang bina ponnu Jisu Christa ding nang baningsuwo; 9haba sacham lang eina riangre khaangga, kasianu mi danga chai thangnuwe. Atiyeda ani Pa om chong ga chai thang make! 10Atibriakpina kathang swak thangnu bing lang eina lang bing ga khaangnuwe, hagana banina le khwa sei liannu le bachamga Christa Jisu khou ongnu kanthangnu ga lousunu ngam lang nge. 11Hei chong ga balumsa zanuwe: Ani Maan le diga thi bachamme dabe, ani Maan le diga le ringnu le bachamlune; 12ani khaang theiye dabe, ani le Maan le diga paanlune; ani Maan ding za make dabe, ani ding le Maanna za laye; 13ani balumsa lang khop make dabe, Maan ga balumsa zanu khwa ongme, balangbe Maanna Bazan ding za lat ngam make.
Pa na za thangnu chwan mi
14Hei bing ga bani khou baningsu thang ngo, khatle chong lang bi kae kanaa mak lang ani Pa meithaan bi bani ding bachu thang ngo; haga bathaang maaknu khatle kangainu nun ding to basiatlune.
15Bazenu chong ga ririak paanluga, kazak lat maknu chwan mi toga, ani Pa khou nazan pi za thang lang nang karam thang ngo. 16Atiyeda bathaang maaknu khatle Rikrwang ding kachi maknu chong bina pen dammo; balangbe haga mi nun ding ririak se maknu bi inku thou lang pi to rwe, 17khatle bani om chong ga pum basaamnu ri danga kasam thanglune. Hei bing lak pi Hymenaeus le Philetus le ongme, 18hei rwan ga bazenu bina lampui maanluga, ring thou thangnu ga han loi rwe diga ringa, mi kasem om balumsat ding bakluga ongme. 19Ati ngaaklena ani Pa om tipka ongnu inmun ga han ong ngaake, hei danga sin thang rwe: “Maanna Baom ongnu bing ding theiye,” khatle “Bameng kounu bing nung suiga ririak se maknu bina barak thang ngo.”
20In lian khat bi kachaak khatle tangka om ben bing cha make, atiyeda thing khatle talei imphaannu om ben bing le amme; kasem ga takungnu lang, kasem ga takung maknu lang gaye. 21Atibriakpina tudannuna hei bing bina baraantoza to bathiang thangnuwe dabe, maan ga takungnu om ben toga pi to lang nge: bathiangnu, Pukraangba lang bathaang amnu, kasanu chwan bing nung suiga to lang karonu.
22Mangkoinu om bathainu bina dwak swakro; sung bathiangnuna Pukraangba meng kounu bing le diga, ririak senu, balumsat, kriangnu khatle dai bazaangnu ding zong ngo. 23Kapangnu khatle thei maknu kae kanaanu bing bi pen dammo; haga ga kraan saraan pi swake dinu nang theiye. 24Pukraangba om swak rwanna sian ra-aam mak lang, atiyeda mi bing khou sung bazaang lang, kalum thang ngamnu khatle baze maknu to thangnu bi khaang theinu to ding gaye. 25Maitwang bi ongnu bing ding sung bazaangga to baze thang ngo; balangbe ani Pa na bazenu ding theinu lang bani khou sung lenu ga pi thanglune zaye, 26khatle bati bathainu to lang bani ding namluga qwan mi toga thangnu Diabol om phaa bina dwak swakluga, bani ga sung karak lang nge.