Paulo Kyerɛw Krataa Kɔmaa Timoteo
Paulo krataa a etwa to, a ɔkyerɛw bere a owu abɛn no, a ɔde dwumadi no hyɛ Timoteo nsa na ɔhyɛ no sɛ ɔnka asɛm no.
1 1Me Paulo a yɛn Agya pɛ nti meyɛ Kristo Yesu somafo, sɛnea nkwa a ɛwɔ Kristo Yesu mu ho bɔhyɛ no te no, 2mekyerɛw kɔma Timoteo, me ba dɔfo no: Adom, mmɔborɔhunu ne asomdwoe a efi yɛn Agya ne Kristo Yesu yɛn Awurade nkyɛn nka wo.
Hyɛ Ogya a Yɛn Agya De Maa Wo No Mu Den
3Meda yɛn Agya ase, ɔno a mede ahonim pa som no sɛnea me nananom yɛe no, bere a mekae wo daa wɔ me mpaebɔ mu anadwo ne awia no. 4Sɛ mekae wo nisu a, me kɔn dɔ sɛ mehu wo, na ama anigye ahyɛ me ma. 5Mekae wo gyidi a nyaatwom nni mu no; gyidi no tenaa wo nana Lois ne wo na Eunike mu kan, na seesei, mewɔ awerɛhyɛmu sɛ ɛte wo nso mu.
6Enti mekae wo sɛ hyɛ yɛn Agya akyɛde a ɛwɔ wo mu no mu den sɛ ogya, akyɛde a wunyae bere a mede me nsa guu wo so no. 7Efisɛ yɛn Agya amfa ehu honhom amma yɛn, na mmom tumi, ɔdɔ ne ahohyɛso Honhom. 8Enti mma yɛn Awurade ho adansedi nyɛ wʼaniwu, na mma me a meyɛ ne deduani no nso nyɛ wʼaniwu; na mmom fa yɛn Agya tumi no so ne me nhu amane wɔ asɛmpa no ho. 9Ogyee yɛn nkwa, na ɔde ɔfrɛ kronkron frɛɛ yɛn, ɛnyɛ yɛn nnwuma nti, na mmom ne ankasa botae ne nʼadom nti; adom yi na ɔde maa yɛn wɔ Kristo Yesu mu ansa na mmere biara refi ase, 10na seesei wada no adi wɔ yɛn Agyenkwa Kristo Yesu ba no mu, ɔno a ɔde owu aba awiei, na ɔnam asɛmpa no so ama nkwa ne nkwa a ɛnsɛe da no ahyerɛn. 11Saa asɛmpa yi nti na wɔyii me sɛ ɔsɛmpakafo ne ɔsomafo ne ɔkyerɛkyerɛfo. 12Ɛno nti na mehu amane sɛɛ yi. Nanso ɛnyɛ me aniwu, efisɛ minim nea mede me ho ato no so no, na mewɔ awerɛhyɛmu sɛ obetumi abɔ nea wɔde ahyɛ me nsa no ho ban akosi da a ɔbɛsan aba no.
13Kura nsɛm pa a wotee fii me hɔ no nhwɛso no mu den, wɔ gyidi ne ɔdɔ a ɛwɔ Kristo Yesu mu no mu. 14Bɔ ade pa a wɔde ahyɛ wo nsa no ho ban, nam Honhom Kronkron a ɔte yɛn mu no so.
15Wunim eyi: obiara a ɔwɔ Asia mantam mu no atwe ne ho afi me ho, na Figelo ne Hermogene ka ho. 16Yɛn Awurade Yesu nhunu Onesiforo fiefo mmɔbɔ, efisɛ mpɛn pii na ɔmaa me ahoɔden foforo, na me nkɔnsɔnkɔnsɔn no anyɛ nʼaniwu. 17Mmom, bere a ɔduu Roma no, ɔde nsi hwehwɛɛ me kosii sɛ ohuu me. 18Yɛn Awurade Yesu mma onnya mmɔborɔhunu mfi Awurade nkyɛn da no. Wunim yiye sɛnea ɔsom kɛse wɔ Efeso.
