Isirchini Paulo Timoteo
Parweet ne po let ne po Paulo, ne kisir ye neegit meet, kogochi Timoteo kegenget ak kocharunee ineendet koamda ng'olyoot.
1 1Paulo, kayooktoindetap Kristo Jeso eng' mageetap Kwandanyo, eng' kayomisetap saboon ne mi Kristo Jeso, 2ak Timoteo, lakweennyu ne achame: Ingotep kobootok myeeindo ak rireenet ak kaalyeet ne punu Kwandanyo ak Kristo Jeso Kiptaiyandennyo.
Ibelbel Liplibenet ne Kigoonin Kwandanyo
3Amwachini Kwandanyo kongoi, ne aoote eng' muguleldo ne tiliil ko uu ki yai kwanisyekyuk, ale masise abwaati inyee eng' saautikyuk, kemeut ak peetuut. 4Abwaati peegap konyeguk, amach miising' ageer inyee, si kobiit anyiit poiboiyet. 5Abwaati kayaneng'ung' ne po iman, ne ki sabei tai eng' kamenng'ung' Lois ak kamenng'ung' Eunike, ak nguno, angen komyee ale mi eng' inyee kora.
6Nooto anyun abwaati inyee si ibeel konunetap Kwandanyo ne mi inyee, eng' indoiyetap eunekyuk. 7Amu ma kigoonech Kwandanyo kabuusetap luget, ago Kabuusetap kimnateet, ak chamyet, ak riibetapkei. 8Nooto anyun amat ililan agobo paoryetap Kiptaiyandennyo, anan agobo anee chiitap korgoreet nenyi, ago inyalil kobootanyu agobo logoiywek che myach eng' kimnateetap Kwandanyo. 9Kisarwech ak kiguurwech eng' kuuret ne tiliil, ma eng' poisyonikyok, ago eng' magennyi ineegei ak myeeindo, che ki kigoonech eng' Kristo Jeso kotom konom peetuusyek, 10ago nguno kageng'ang'jin eng' ng'aang'jinetap Yetindennyo Kristo Jeso, ne ki par meet, ak koboorun saboon ak saboondap koigeny eng' logoiywek che myach. 11Agobo logoiywechu che myach ko ki kiguure koek amwaindet ak kayooktoindet ak kaneetindet. 12Nooto anyun si anyalil ko uu ni. Ago ma lilan, amu angen ne kaayan, ak angen komyee ale imuuchi koriip ne ki kigoochin kogonor agoi peetuunooto.
13Inam kergeindap ng'aleek che myee che kagas eng' anee, eng' kayaneet ak chamyet ne mi Kristo Jeso. 14Iriip kamanisyet ne myee ne ki kigoochin kogonor, eng' Kabuuset ne Tiliil ne menye eng' mugulelwekyok.
15Ingen ni, ale ki kistoe piik tugul che menyei emetap Asia anee, kobooto Figelo ak Hermogene. 16Ingogoochi Kiptaiyandennyo Jeso rireenet kootap Onesiforo, amu ki imuunyo konyil che chaang' ak ma ki lilan agobo ratisyosyekyuk. 17Ago ye kingo iit Rome, ki cheeng'o eng' igiiljinet agoi konyoorwo. 18Ingogoochi Kiptaiyandennyo Jeso konyooru rireenet eng' Kiptaiyat eng' peetuunooto. Ingen inyee komyee miising' ole ki koboisyee eng' Efeso.