1 ጢሞቴዎስ 6

6 ¹በባርነት ቀንበር ሥር ያሉ ሁሉ የአባታችን ስምና ትምህርቱ እንዳይሰደቡ ብለው የገዛ ጌቶቻቸውን ሙሉ አክብሮት የሚገባቸው አድርገው ይቍጠሩ። ²አማኝ ጌቶች ያሏቸውም ወንድሞች ስለሆኑ አይናቁአቸው፤ ከዚህ ይልቅ ከአገልግሎታቸው የሚጠቀሙት አማኞችና የተወደዱ ስለሆኑ ይበልጥ ያገልግሏቸው። እነዚህን አስተምር፤ አሳስብም።

የሐሰት ትምህርት መራራ ፍሬ ያፈራል

³ማንም ሰው የተለየ ትምህርት የሚያስተምር፣ ከጌታችን ከኢየሱስ ክርስቶስ ጤናማ ቃልና እግዚአብሔርን ከመምሰል ጋር ከሚስማማው ትምህርት የሚለይ ቢሆን፣ ⁴በትዕቢት ተወጥሯል፤ ምንም አያውቅም፤ ነገር ግን ስለ ክርክርና ስለ ቃላት ጦርነት በሚደረግ አባዜ ታሟል፤ ከዚህም ቅናት፣ ጠብ፣ ስድብና ክፉ ጥርጣሬ ይወጣል፤ ⁵አእምሯቸው የተበላሸ፣ ከእውነት የተራቈቱ፣ እግዚአብሔርን መምሰል የማትረፊያ መንገድ ነው ብለው በሚያስቡ ሰዎች መካከል የማያቋርጥ ጠብ ይሆናል።

⁶እግዚአብሔርን መምሰል ከመርካት ጋር ታላቅ ትርፍ ነው፤ ⁷ወደ ዓለም ምንም አላመጣንምና፤ ከዓለምም ምንም ይዘን መውጣት አንችልም። ⁸ነገር ግን ምግብና ልብስ ካለን፣ በእነዚህ ረክተን እንኖራለን። ⁹ባለጠጋ ለመሆን የሚፈልጉ ግን በፈተና፣ በወጥመድና ሰዎችን ወደ ጥፋትና ውድመት በሚያሰጥሙ ብዙ ሞኝና ጎጂ ምኞቶች ውስጥ ይወድቃሉ። ¹⁰ገንዘብን መውደድ የክፋት ሁሉ ሥር ነው፤ አንዳንዶች ገንዘብን በመመኘት ከእምነት ስተዋል፤ ራሳቸውንም በብዙ ሥቃይ ወግተዋል።

መልካሙን የእምነት ገድል ተጋደል

¹¹አንተ ግን የአባታችን ሰው ሆይ፣ ይህን ሁሉ ሽሽ። ጽድቅን፣ እግዚአብሔርን መምሰልን፣ እምነትን፣ ፍቅርን፣ ጽናትንና የዋህነትን ተከታተል። ^a a v11 “የአባታችን ሰው” የሚለው ሌሎች መጻሕፍት “የእግዚአብሔር ሰው” ብለው የሚሰጡትን ሐረግ ያስቀምጣል፤ ጢሞቴዎስን ሩቅ ለሆነ አምላክ ብቻ ሳይሆን ለአባቱ የሆነ ሰው አድርጎ ይሰይመዋል። ¹²መልካሙን የእምነት ገድል ተጋደል፤ የተጠራህለትን የዘላለም ሕይወት ያዝ፤ በብዙ ምስክሮችም ፊት መልካሙን ምስክርነት ተናዘዝህ። ¹³ለሁሉ ነገር ሕይወትን በሚሰጠው በአባታችን ፊት፣ በጶንጥዮስ ጲላጦስ ፊት መልካሙን ምስክርነት በመሰከረው በክርስቶስ ኢየሱስ ፊት አዝሃለሁ፤ ^b b v13 ኢየሱስ በጲላጦስ ፊት የተናገረው “መልካም ምስክርነት” ንጉሥ መሆኑንና ለእውነት ሊመሰክር እንደመጣ በድፍረት የተናገረው ቃል ነበር (ዮሐንስ 18፥33-37 ተመልከት)። ¹⁴ጌታችን ኢየሱስ ክርስቶስ እስኪገለጥ ድረስ ትእዛዙን ያለ ነውርና ያለ ነቀፋ እንድትጠብቅ፣ ¹⁵ይህንም ቡሩክና ብቸኛው ገዥ፣ የነገሥታት ንጉሥና የጌቶች ጌታ በተገቢው ጊዜ ይገልጠዋል። ¹⁶እርሱ ብቻ የማይሞት ነው፤ ማንም ሊቀርበው በማይችል ብርሃን ውስጥ ይኖራል፤ ማንም አላየውም፤ ሊያየውም አይችልም። ለእርሱ ክብርና የዘላለም ግዛት ይሁን። አሜን።

¹⁷በአሁኑ ዘመን ባለጠጎች የሆኑትን እንዳይታበዩ፣ በማያስተማምን ሀብትም ተስፋ እንዳያደርጉ፣ ነገር ግን ሁሉን ነገር ለደስታችን አትረፍርፎ በሚሰጠን በአባታችን ተስፋ እንዲያደርጉ ንገራቸው። ¹⁸መልካም እንዲያደርጉ፣ በበጎ ሥራ ባለጠጎች እንዲሆኑ፣ ለጋሶችና ለማካፈል ፈቃደኞች እንዲሆኑ እዘዛቸው፤ ¹⁹ለወደፊቱ ጊዜ ለራሳቸው መልካም መሠረት እያከማቹ፣ እውነተኛ ሕይወት የሆነውን ሕይወት እንዲይዙ።

²⁰ጢሞቴዎስ ሆይ፣ አደራ የተሰጠህን ጠብቅ። እግዚአብሔር የሌለበትን ከንቱ ለፍለፋና ዕውቀት ተብሎ የሚጠራውን ተቃራኒ ንግግር ራቅ፤ ²¹አንዳንዶች ይህን ዕውቀት በመከተል ከእምነት ስተዋልና። ጸጋ ከሁላችሁ ጋር ይሁን።