Gukorera ba shebuja nk’abavukana
Amabwirizwa ku bashumba, hanyuma ishusho y'abigisha bafata kwubaha Imana nk'inzira yo kwironkera inyungu. Kunyurwa ni co cunguko nyakuri, kandi kwifuza amahera kwacumise bamwe. Paulo yihanikiriza Timoteyo kurwana intambara nziza, kandi abwira abatunzi kwizigira Data aho kwizigira itunga.
6 1Abari munsi y’ingǒgo y’ubuja bose bakwiye kubona ko ba shebuja bakwiye icubahiro cose, kugira ngo izina rya Data wa twese n’inyigisho ntibitukwe. 2Abafise ba shebuja bemera ntibabagire ivyageretse kubera ko ari abavukana; ahubwo babakorere neza kuruta, kuko abungukira ari abizera, bakundwa cane. Ivyo bigishe kandi ubihimirize.
Inyigisho z’ikinyoma zama ivyamwa bibabaza
3Nimba hari uwigisha ukundi, adahuza n’amajambo azima ya Yesu Kristo Umwami wacu, n’inyigisho ihuza no kwubaha Imana, 4aba yishimagiza, nta co azi, ahubwo arwaye indwara yo kwitwararika impari n’ukuganjǐrana amajambo, ivyo bikavyara ishari, intureka, ukwambikana n’ukugirana amakenga mabi, 5n’amatati adahera mu bantu bafise imizirikanya yonona, bambuwe ukuri, biyumvira ko kwubaha Imana ari inzira yo kwungukira.
6Mbere ukwubaha Imana kujananye no kuryoherwa n’ivyo umuntu afise ni inyungu nini, 7kuko nta co twazananye mw’isi, kandi nta co dushobora kuvanamwo. 8Ariko nitwaba dufise ibifungurwa n’impuzu, ivyo bizoduhaza. 9Mugabo abipfuza gutunga bagwa mu bigeragezo, mu mutego, no mu vyipfuzo vyinshi vy’ubupfu kandi vyonona, ibikwega abantu mu kurimbuka no mu matongo. 10Urukundo rw’amahera ni umuzi w’ubwoko bwose bw’ububi; bamwe bakwipfuza bavuye mu kwizera maze biwomamwo imibabaro myinshi.
Rwana urugamba rwiza rw’ukwizera
11Ariko wewe, muntu wa Data wa twese, huruka ivyo vyose. Nuronderane umwete ukugororoka, ukwubaha Imana, ukwizera, urukundo, ukwihangana n’ubwitonzi. a a v11 “Muntu wa Data wa twese” ni ihinduro ry’imvugo izindi Bibiliya zihindura ngo “muntu w’Imana” — ryita Timoteyo nk’umwe aba uwa Data, atari uw’imana iri kure gusa. 12Rwana urugamba rwiza rw’ukwizera; fata ubugingo budashira wahamagariwe, ukaba warahamije intahe nziza imbere y’ivyabona vyinshi. 13Ndakwinginga imbere ya Data wa twese, aha ibintu vyose ubugingo, no kwa Kristo Yesu, yahamije intahe nziza imbere ya Ponsiyo Pilato, b b v13 “Intahe nziza” Yesu yahamije imbere ya Pilato ni ukumenyesha kwiwe gushikamye ko ari umwami kandi ko yaje guhamya ukuri (raba Yohana 18:33–37). 14ngo ubungǒbunge ibwirizwa ata gacaho kandi ata maganya gushika Yesu Kristo Umwami wacu azohishurwa, 15ivyo Umutware w’umuhezagiwe akaba ari we wenyene, Umwami w’abami n’Umukama w’abakama, azozana mu gihe cabǐgenewe. 16Ni we wenyene adapfa, aba mu muco umuntu adashobora kwegera, nta muntu yigeze amubona canke ashobora kumubona. Icubahiro n’ubwami budashira bibe ivyiwe. Amen.
17Bwira abatunzi bo muri iki gihe tugezemwo ngo ntibishime canke ngo bizigire ubutunzi butizigirwa, ariko ngo bizigire Data wa twese, aduha vyose bikwiye ngo tubinezererwe. 18Babwire ngo bakore iciza, batungane mu mirimo myiza, bagire ubuntu, bitegurire gusangira, 19babikije bo nyene umushinge mwiza w’ikizoza, kugira ngo bashobore gufata ubugingo ari bwo bugingo nyakuri.
20Timoteyo, zigama ivyo wajejwe. Wirinde ibiyago vy’ubusa bidafise Imana n’ivyo bamaganyirana vyitwa ubumenyi bw’ikinyoma, 21kuko bamwe babwemeye bavuye mu kwizera. Ubuntu bubane namwe mwese.
