1 ጢሞቴዎስ 5

5 ¹ሽማግሌውን በኀይል አትገሥጽ፤ ነገር ግን እንደ አባት ለምነው፤ ጐልማሶችንም እንደ ወንድሞች፣ ²አረጋውያን ሴቶችን እንደ እናቶች፣ ወጣት ሴቶችንም በፍጹም ንጽሕና እንደ እኅቶች አድርገህ ለምናቸው።

³በእውነት መበለቶች የሆኑትን መበለቶች አክብር። ⁴አንዲት መበለት ልጆች ወይም የልጅ ልጆች ቢኖሯት ግን፣ እነርሱ አስቀድመው ለገዛ ቤታቸው አክብሮትን ማሳየትን፣ ለወላጆቻቸውም ብድራትን መመለስን ይማሩ፤ ይህ አባታችንን ደስ ያሰኛል። ⁵በእውነት መበለት የሆነችውና ብቻዋን የቀረችው ግን፣ ተስፋዋን በአባታችን ላይ አድርጋ ሌሊትና ቀን በልመናና በጸሎት ትጸናለች። ⁶ለገዛ ተድላዋ የምትኖረው መበለት ግን በሕይወት ሳለች እንኳ የሞተች ናት። ⁷ነቀፋ የሌለባቸው እንዲሆኑ ይህን ደግሞ አዝዛቸው። ⁸ማንም ለገዛ ወገኖቹ፣ ይልቁንም ለቤተሰቡ አባላት የማያስብ ቢሆን፣ ሃይማኖትን ክዷል፤ ከማያምንም ሰው ይልቅ የከፋ ነው።

⁹መበለት ዕድሜዋ ከስድሳ ዓመት የማያንስና ለአንድ ባል ታማኝ የነበረች ብትሆን ብቻ በመዝገብ ትመዝገብ፤ ¹⁰በመልካም ሥራዋም የተመሰከረላት ትሁን፤ ልጆችን ያሳደገች፣ እንግዶችን የተቀበለች፣ የቅዱሳንን እግር ያጠበች፣ የተቸገሩትን የረዳች፣ መልካሙንም ሥራ ሁሉ የተከታተለች ብትሆን ነው።

¹¹ወጣት መበለቶችን ግን በመዝገብ ከመመዝገብ ተከልከል፤ ፍላጎታቸው ከክርስቶስ ሲስባቸው ማግባት ይፈልጋሉና፤ ¹²እንዲህም የመጀመሪያ ቃል ኪዳናቸውን በመተዋቸው በራሳቸው ላይ ፍርድን ያመጣሉ። ^a a v12 “የመጀመሪያ ቃል ኪዳናቸው” ማለት በመበለቶች መዝገብ ሲመዘገቡ ክርስቶስንና ቤተ ክርስቲያንን ለማገልገል የገቡትን ቃል ያመለክታል። ¹³ደግሞም ከቤት ወደ ቤት እየተዘዋወሩ ሥራ ፈትተው መቀመጥን ይማራሉ፤ ሥራ ፈትተው ብቻ ሳይሆን የማይገባቸውን እየተናገሩ አሉባልተኞችና በሌሎች ጒዳይ ጣልቃ ገቢዎች ይሆናሉ። ¹⁴ስለዚህ ወጣት መበለቶች እንዲያገቡ፣ ልጆች እንዲወልዱ፣ ቤታቸውን እንዲያስተዳድሩ፣ ለጠላትም ለማማት ምንም አጋጣሚ እንዳይሰጡ እወዳለሁ። ¹⁵አንዳንዶች ፈቀቅ ብለው ሰይጣንን ለመከተል አስቀድመው ዘወር ብለዋልና። ¹⁶አንዲት አማኝ ሴት በዘመዶቿ መካከል መበለቶች ቢኖሩ፣ እርሷ ትደጉማቸው፤ ቤተ ክርስቲያን በእውነት መበለቶች የሆኑትን መደገፍ ትችል ዘንድ፣ ሸክም አይሁንባት።

¹⁷በመልካም የሚመሩ ሽማግሌዎች፣ ይልቁንም በስብከትና በማስተማር የሚደክሙት፣ የእጥፍ ክብር ይገባቸዋል። ¹⁸መጽሐፍ፣ “እህልን በሚያበራየው በሬ አፍ ላይ አፍ መያዣ አታድርግ” እንዲሁም “ሠራተኛ ደመወዙ ይገባዋል” ይላልና።

¹⁹በሁለት ወይም በሦስት ምስክሮች ምስክርነት ካልሆነ በቀር፣ በሽማግሌ ላይ የሚቀርብን ክስ አትቀበል። ²⁰በኀጢአት የሚጸኑትን ግን ሌሎቹ እንዲፈሩ በሁሉ ፊት ገሥጻቸው።

²¹በአባታችን፣ በክርስቶስ ኢየሱስና በተመረጡት መላእክት ፊት፣ ይህን ትእዛዝ ያለአድልዎ እንድትጠብቅ፣ በወገንተኝነትም ምንም እንዳታደርግ አጥብቄ አዝሃለሁ። ²²በማንም ላይ እጅህን ለመጫን አትቸኵል፤ በሌሎችም ኀጢአት አትተባበር፤ ራስህን ንጹሕ አድርገህ ጠብቅ።

²³ከእንግዲህ ውኃ ብቻ አትጠጣ፤ ስለ ሆድህና አዘውትሮ ስለሚይዝህ ሕመም ጥቂት የወይን ጠጅ ተጠቀም።

²⁴የአንዳንዶች ሰዎች ኀጢአት ግልጽ ሆኖ ወደ ፍርድ ይቀድማቸዋል፤ የሌሎች ኀጢአት ግን ኋላ ይከተላል። ²⁵እንዲሁም መልካም ሥራ ግልጽ ነው፤ ግልጽ ያልሆነውም እንኳ ተሰውሮ ሊቀር አይችልም።