Nathumli Kuikhamareili Khalei Shimkhurli Khayākashi Khamilu
Church chi ithumwui Avāwui shimkhur thada phaninglu: rarkhameiya mayarnaobingli avāva̱ thada, nganuikhamei sha̱naobingli nazarva̱ thada. Chiwui thili kasā khavai kakaso: ra̱meikapamva̱ kathuma churchna yangmiranu kala kathuma ngalā khuiluiranu, kathānabingli khayāshida mayonmiranu, morei kasāchingabingli saikorawui mangāli machinranu, kala Timothywui mayung ngaphā khavai drakhāra̱ kateteo manganu.
5 1Kasarnao akhali saklak eina makaharalu, kha avāva̱ akha sāda ali kasolu, kala yaronnaobingli chinao akha sāda kasolu. 2Ningkathar saikora eina kasar sha̱naobingli ava̱ akha sāda, kala ngalānaobingli chinaongalā akha sāda kasolu.
3Kachangkhat eina ra̱meinao ngasābingli khayākashi khamilu. 4Kha ra̱meinao akhana naongarā lah ara̱-azā leiakha, rimeikapta athumwui ava̱ avāli samikharān sāda, athum khalattawui shimkhurli dharma sākhavai tamkhuiranu. Hi ithumwui Avāli ningyāng ungngasaka. 5Kachangkhat eina ra̱meinao ngasāda, kachiphun sāhaira china, ithumwui Avāli chihāna, ngashun ngayā kapo kala seihā kasāli singda leira. 6Kha sākhangangai sākhavai kharing ra̱meinaova̱ china, kharinga leilala thikahaina. 7Hikathā kaso chila milu, chithākha athum maphenkapai ngasāra. 8Mi akhana akhalattawui mibingwui vang, mataimeikapta awui shimkhurwui mibingwui vang, khuirā masāmiakha, ana shitkasang chi khalanhaira kala mashitkasanga akha eina zakshimeikharda ngasāra.
9Ra̱meinaova̱ china awui zingkum hangtharuk teomeila, kala gahara akhamāng ngasāda mangamāng, ali aming shānkhuilu, 10kaphā otsak eina theihaira: naongarāli shimanhaida, kha̱mibingli mathānthathup samphangkhuida, Varewui mibingwui phei pheoda, khanang samphangbingli ngachonmida, kala kaphā otsak kachiva̱li phāhaiva̱.
11Kha ra̱meinao nganuibingli aming mashānkhuilu; athumwui ningkachāngna Khristawui eina athumli lānkā tharan, athumna ngakumkhangai ngasāra, 12kala chithāda, athumwui mungkhare khangashit chi horkahaiwui vang, athum khalattali bichar rāngasakra. a a v12 "Athumwui mungkhare khangashit" hiya, athumli ra̱meinaowui aming shānkhui atam, Khrista kala churchli otram ngatha̱ khavai athumna sākahai khangashit chi hānga. 13Athumna shim kachi shim kachili vāda, ngachāng makakā ngasākhavaila tamkhui. Ngachāng makakāmāng maningla, kha morkasapabing kala miwui otli hapkhano mibing ngasāda, mahāngkhangai tui chi hānga. 14Chiwui vang eina ina ra̱meinao nganuibingli ngakum, naongarā pharā, kala shimkhurli nganaokhui khavai ningchānga, chithākha yangkashena mashāt khavai atam kachā masamphangmara. 15Kaja mi kaikha arui Satanli shurkhavai akachang sāhaira. 16Shitkasanga sha̱nao akhana awui theisābingwui ngachaili ra̱meinaobing leiakha, ana athumli ngachonmiranu, churchli khanang mangasakla, chithākha churchna kachangkhat eina ra̱meinao ngasābingli ngachonmi shapra.
17Kaphā eina khangāka khararnaobing, mataimeikapta pao hāshok kala tamchitheili panglāk eina ot kasābing china, khayākashi khani samphangkhangayia. 18Kaja hithada kapihaida lei: "Mā naida khalei mukkāwui khamor makhalappaimana," kala "Ot kasā mi china awui ngalangman samkaphang khangachāna."
19Shākhi mi khani lah kathumwui tui maningla, arara akhawuitungli kaphen chi makhuisangalu. 20Kateibingna ngachee khavai, morei sāchingabing chili mi saikorawui miktāli kaharlu.
21Ithumwui Avā, Khrista Jishu, kala kapangkhui kahai kazingraobingwui miktāli ina nali saklak eina kapona: hi ningkhamibing chi mijang mavaila mayonlu, mimai mayangla khikha masāalu. 22Khipālikha thaklāk eina pāng masomialu, kala kateibingwui moreili mahorsangngarumalu. Nakhalatta tharda mayonlu.
23Tara̱ māng mamangchingalu. Nawui wuk kala nali atam kasāngkha rā kazātbingwui vang, drakhāra̱ kasha̱kha manglu.
24Mi kaikhawui morei chi theipailaka, bicharli rida zatra; kateibingwui moreiva thili shura. 25Chithada sāda, kaphā otbing chi theipailaka, kala matheipai chibingla mangathumpaimara.
