Kaibü Lepka Kibü Chempen to Soumo Hatashi
Lashong kho seneibü Bou chempen tegü ngeashi, jaishoubou shuong to bou tegü hoba younak yaksa shuong to na tegü. Kheijinei kümbü ngühkhüm shuong: lashongei la latnyu ai shuong kümdaleida hoba ai shuongei sao lang kila, jaishou shuong to soumo hatbü hoba püetbü, maangpon shabü shanga müt pendou thedanga tetenbü, hoba Timoti mangshatbü shanga ih.
5 1Jaishoubou che to kaangko tehak, lausikei bou tegü hao to ngekashi, hoba younak bousu shuong to jaisina tegü, 2hatbü yaksa shuong to nyu tegü, hoba younak yaksa shuong to na tegü, hinseibü pendoua ngekashi.
3Tükde latnyu kibü latnyu shuong to soumo hatashi. 4Lausikei latnyu che la shousi ayingsi shisishousi kialonga, haoenei shaang jembü chempen to soumo hatla hoba haoeneibü nyusibou to mubü kula lenjan—aishanga ho seneibü Bou to olintida. 5Tükde latnyu kibü, mütpem along apyoan, seneibü Bou to maanglemda, hoba langyang si chalou welaua hoba subüjabüa kümdaleida. 6Lausikei jembü maang olinbüa langkei kibü latnyu kho, sao lang kijinei haian kia. 7Ho ngühkhüm shuongkei lenkhümbashi, khei haoen la amai apla athüklabü. 8Aoei ong jembü chempen, yaangbouei jembü chem kabü shuong to asamlonga, haoei mailem athekuko, hoba maialembü che tokei amaibou ki.
9Latnyu che kho, sao po saonyi ka hanbou akibü, hoba lao che la ong tükdebü kibü yingalonga ong, lühbaka doashi, 10maibü kümsilei danko ngean kibü: saoei shousi shuong hekkei, yenbou shuong sungletkei, Mühghaü mütshuongeibü you makkei, khonkutibü shuong to thuikei, hoba maibü kümsilei pendoua jembü kümbo kuyokei longa ong.
11Lausikei younak latnyu shuong to lühbaka dola üangashi; aishanga haoeneibü maangei haoen Khrista ka nangan chaloua haoen lao lela mangsühda, 12hoba kheijinei haoen lolo la shedbü sungbada, aishanga haoenei haoeneibü shaangbü theletbü apyokei. a a v12 "Haoeneibü shaangbü theletbü" dogo laubü kho, haoen latnyu lühbaka doan kibü chaloua Khrista hoba lashong to khangenla thekubü shangabü ki. 13Haoenkei kümsilei akümla lenenda, chem ka chem to lamkhümko—kümsilei akümbü ong aying, lausikei lilisese hoba müt jembü yoa atbü shuong la yeiko, ai laula ashonbü kho lauda. 14Kheijinei ngei younak latnyu shuong lao lela, shousi shuong bukla, jembü chem küpjemla, hoba dangbou to lilisese jihsiphai akula mangsühda, 15Aishanga aoyou kho Satan phai semla bangjung satan apa. 16Mailembü yaksa cheei jembü chempen yoa latnyu shuong kialonga, saoei haoen to samjan, hoba lashong to onat teyeiti, khei lashongei tükde latnyu kibü shuong to samla thüklabü.
17Maibüa leibü jaishou shuong penyi nyensang hapla mubü, yaangbouei ngüh songlenbüa hoba lenbüa aeibou kümdaleibü shuong to. 18Aishanga Laishibaei lenda, “Youshou nakji kibü masu haoeibü sembung tekhühku,” hoba “Kümbouei haoeibü mu hapla mubü.”
19Müt nyi ayingsi sem aukabüeibü shedkubü akilonga, jaishoubou che to amaibü lauyobü tesungletma. 20Shed kümbo laubü shuong kho, müt pendou thedanga haoen to hakashi, khei lubü shuongei hatlabü.
21Ngei no to seneibü Bou, Khrista Jisu hoba pienbü khuthük hangangbü shuong thedanga aeibou sakkuda: ho ngühkhüm shuong the achüh jungeiashi, mat jembüei aiche tekümma. 22Aoei to ong mangde ik teshaang, hoba lubü shuongeibü shedbüa teyoan, nyi lolo hinseian kishi.
23Touje dei ong tenyungma—kaibü shiang hoba nyi weko takbü kibü shanga jü shisho lekushi.
24Aoyou müteibü shedbü kho maang longan kia, hoba mat jembü to shaang haukei; lausikei lubü shuongeibü shedbü phaito semda. 25Kho tegütham, maibü kümsilei shuongkei maang longan kia; hoba maang alongbü shuong ong huletla athüklabü.
