1 Timotiu 5

5 ¹Má ṣe fi ìbínú bá àgbà ọkùnrin kan wí, ṣùgbọ́n bẹ̀ ẹ́ bí ẹni pé baba rẹ ni, kí o sì bẹ àwọn ọ̀dọ́kùnrin bí arákùnrin, ²àwọn àgbà obìnrin bí ìyá, àti àwọn ọ̀dọ́bìnrin bí arábìnrin, ní ìwà mímọ́ pátápátá.

³Fi ọlá fún àwọn opó tí í ṣe opó nítòótọ́. ⁴Ṣùgbọ́n bí opó kan bá ní ọmọ tàbí ọmọ-ọmọ, kí wọ́n kọ́kọ́ kọ́ bí wọn yóò ti máa fi ìfọkànsìn hàn sí ìdílé ara wọn, kí wọ́n sì san ẹ̀san fún àwọn òbí wọn—èyí ní ń wu Baba wa. ⁵Opó tòótọ́, ẹni tí a fi sílẹ̀ ní ìdáwà, fi ìrètí rẹ̀ lé Baba wa, ó sì ń bá a lọ ní òru àti ní ọ̀sán nínú ìbẹ̀bẹ̀ àti àdúrà. ⁶Ṣùgbọ́n opó tí ó ń gbé ìgbé-ayé ìgbádùn ara rẹ̀ ti kú, bí ó tilẹ̀ wà láàyè. ⁷Pa àwọn àṣẹ wọ̀nyí láṣẹ pẹ̀lú, kí wọ́n má bàa ní àbùkù. ⁸Bí ẹnikẹ́ni kò bá pèsè fún àwọn tirẹ̀—pàápàá jùlọ àwọn ará ilé rẹ̀—ó ti sẹ́ ìgbàgbọ́, ó sì burú ju aláìgbàgbọ́ lọ.

⁹Kí a má ṣe kọ orúkọ opó kan sínú ìwé àfi bí ó bá ti pé ẹni ọgọ́ta ọdún, tí ó sì ti jẹ́ olóòótọ́ sí ọkọ kan ṣoṣo, ¹⁰tí a sì jẹ́rìí sí nítorí àwọn iṣẹ́ rere rẹ̀: bí ó bá tọ́ àwọn ọmọ dàgbà, tí ó gba àwọn àlejò, tí ó wẹ ẹsẹ̀ àwọn ẹni mímọ́, tí ó ran àwọn tí ìpọ́njú ń ṣẹ́ lọ́wọ́, tí ó sì lépa gbogbo iṣẹ́ rere.

¹¹Ṣùgbọ́n kọ̀ láti kọ orúkọ àwọn ọ̀dọ́ opó sílẹ̀; nítorí nígbà tí ìfẹ́-ọkàn wọn bá fà wọ́n kúrò lọ́dọ̀ Kristi, wọ́n a máa fẹ́ láti lọ́kọ, ¹²nítorí náà wọ́n a mú ìdájọ́ wá sórí ara wọn nítorí tí wọ́n ti pa ìlérí wọn àkọ́kọ́ tì. ^a a v12 “Ìlérí wọn àkọ́kọ́” tọ́ka sí ìfinúhàn tí wọ́n ṣe láti sin Kristi àti ìjọ nígbà tí a kọ orúkọ wọn sínú àkọsílẹ̀ àwọn opó. ¹³Wọ́n a sì kọ́ bí wọn yóò ti máa ṣe ọ̀lẹ, tí wọ́n ń rìn láti ilé dé ilé—kì í ṣe ọ̀lẹ nìkan, ṣùgbọ́n olófòófó àti àwọn tí ń yọjú sí ọ̀ràn ẹlòmíràn, tí wọ́n ń sọ ohun tí kò yẹ kí wọ́n sọ. ¹⁴Nítorí náà, mo fẹ́ kí àwọn ọ̀dọ́ opó lọ́kọ, kí wọ́n bímọ, kí wọ́n máa ṣàkóso ilé wọn, kí wọ́n má sì fún ọ̀tá ní àyè láti sọ̀rọ̀ ẹ̀gàn. ¹⁵Nítorí àwọn kan ti yà kúrò tẹ́lẹ̀ láti tọ Satani lẹ́yìn. ¹⁶Bí obìnrin onígbàgbọ́ kan bá ní àwọn opó láàrín àwọn ìbátan rẹ̀, kí ó ṣe ìrànlọ́wọ́ fún wọn, kí ó má ṣe di ẹrù wọ̀ ìjọ lọ́rùn, kí ìjọ lè ṣe ìrànlọ́wọ́ fún àwọn opó tòótọ́.

¹⁷Àwọn alàgbà tí ó ń darí dáradára yẹ fún ọlá ìlọ́po méjì, pàápàá jùlọ àwọn tí ń ṣe làálàá nínú ìwàásù àti ìkọ́ni. ¹⁸Nítorí Ìwé Mímọ́ sọ pé: “Má ṣe di màlúù ní ẹnu nígbà tí ó bá ń tẹ ọkà,” àti pé, “Òṣìṣẹ́ yẹ fún owó ọ̀yà rẹ̀.”

¹⁹Má ṣe gba ẹ̀sùn kan lòdì sí alàgbà kan àyàfi lórí ẹ̀rí ẹlẹ́rìí méjì tàbí mẹ́ta. ²⁰Ní ti àwọn tí ó dúró ṣinṣin nínú ẹ̀ṣẹ̀, bá wọn wí níwájú gbogbo ènìyàn, kí àwọn yòókù lè bẹ̀rù.

²¹Mo fi tọkàntọkàn kìlọ̀ fún ọ níwájú Baba wa, àti Kristi Jesu, àti àwọn áńgẹ́lì àyànfẹ́: pa àwọn ìlànà wọ̀nyí mọ́ láìní ẹ̀tanú, láìṣe ohunkóhun nípa ojúsàájú. ²²Má ṣe fi kánjúkánjú gbọ́wọ́ lé ẹnikẹ́ni lórí, má sì ṣe bá ẹlòmíràn pín nínú ẹ̀ṣẹ̀ wọn—pa ara rẹ mọ́ ní mímọ́.

²³Má ṣe máa mu omi nìkan mọ́—mu wáìnì díẹ̀ nítorí inú rẹ àti nítorí àìsàn rẹ tí ń ṣẹlẹ̀ lọ́pọ̀ ìgbà.

²⁴Ẹ̀ṣẹ̀ àwọn ènìyàn kan hàn gbangba, ó sì ń ṣáájú wọn lọ sí ibi ìdájọ́; ṣùgbọ́n ẹ̀ṣẹ̀ àwọn mìíràn ń tẹ̀lé wọn lẹ́yìn. ²⁵Bẹ́ẹ̀ gẹ́gẹ́ ni, àwọn iṣẹ́ rere pẹ̀lú hàn gbangba, àti pé àní àwọn tí kò tilẹ̀ hàn kò lè fi ara pamọ́.