१ तीमथ्य 5

5 ¹ वडीलधाऱ्या माणसाला कठोरपणे रागावू नकोस, तर पित्याप्रमाणे त्याला विनवणी कर; आणि तरुणांना भावांप्रमाणे, ² वडीलधाऱ्या स्त्रियांना मातांप्रमाणे, आणि तरुणींना पूर्ण शुद्धतेने बहिणींप्रमाणे वागव.

³ ज्या खरोखर विधवा आहेत, त्यांचा मान राख. ⁴ पण एखाद्या विधवेला मुलेबाळे किंवा नातवंडे असतील, तर त्यांनी प्रथम आपल्या स्वतःच्या घराण्याविषयी भक्ती दाखवायला आणि आपल्या आईवडिलांचे उपकार फेडायला शिकावे; कारण हे आमच्या पित्याला संतोष देते. ⁵ जी खरी विधवा एकाकी राहिली आहे, ती आमच्या पित्यावर आपली आशा ठेवते आणि रात्रंदिवस विनंत्या व प्रार्थना करीत राहते. ⁶ पण जी विधवा भोगविलासात जगते, ती जिवंत असूनही मेलेली आहे. ⁷ ह्या आज्ञाही दे, म्हणजे ते निर्दोष राहतील. ⁸ पण जो कोणी आपल्या स्वतःच्या माणसांची — विशेषतः आपल्या घरातील माणसांची — तरतूद करीत नाही, त्याने विश्वास नाकारला आहे आणि तो अविश्वासणाऱ्यापेक्षाही वाईट आहे.

⁹ जिचे वय निदान साठ वर्षे आहे आणि जी एकाच पतीशी विश्वासू राहिली आहे, अशाच विधवेची नोंद कर; ¹⁰ जिच्याविषयी सत्कृत्यांची साक्ष आहे — जर तिने मुलांचे संगोपन केले असेल, परक्यांचे आतिथ्य केले असेल, पवित्रजनांचे पाय धुतले असतील, दुःखितांना मदत केली असेल आणि प्रत्येक चांगल्या कामाचा पाठपुरावा केला असेल.

¹¹ पण तरुण विधवांना नाकार; कारण जेव्हा वासना त्यांना ख्रिस्तापासून ओढते, तेव्हा त्यांना लग्न करावेसे वाटते, ¹² आणि आपले पहिले वचन बाजूला ठेवल्यामुळे त्या स्वतःवर दंड ओढवून घेतात. ^a a v12 "त्यांचे पहिले वचन" म्हणजे विधवांच्या यादीत नोंद झाली तेव्हा ख्रिस्ताची व मंडळीची सेवा करण्याविषयी त्यांनी केलेला संकल्प. ¹³ शिवाय त्या आळशी व्हायला शिकतात आणि घरोघर हिंडत राहतात — केवळ आळशीच नव्हे, तर चहाडखोर व लुडबूड करणाऱ्याही होतात आणि जे बोलू नये तेच बोलतात. ¹⁴ म्हणून माझी इच्छा आहे की, तरुण विधवांनी लग्न करावे, मुलेबाळे व्हावीत, घर सांभाळावे आणि विरोध्याला निंदा करण्याची कसलीही संधी देऊ नये. ¹⁵ कारण कित्येकजणी आधीच बहकून सैतानामागे लागल्या आहेत. ¹⁶ जर एखाद्या विश्वासणाऱ्या स्त्रीच्या नातलगांमध्ये विधवा असतील, तर तिने त्यांना सांभाळावे आणि मंडळीवर भार टाकू नये, म्हणजे मंडळीला खऱ्या विधवांना सांभाळता येईल.

¹⁷ जे वडील चांगले नेतृत्व करतात ते दुप्पट मानास पात्र आहेत, विशेषतः जे उपदेश व शिकवण यांत कष्ट करतात. ¹⁸ कारण शास्त्रलेख म्हणतो: 'मळणी करणाऱ्या बैलाच्या तोंडाला मुसके बांधू नकोस,' आणि 'कामकऱ्याला त्याची मजुरी मिळण्यास तो पात्र आहे.'

¹⁹ दोन किंवा तीन साक्षीदारांच्या पुराव्यावाचून एखाद्या वडिलावरील आरोप स्वीकारू नकोस. ²⁰ जे पाप करीत राहतात, त्यांना सर्वांसमोर रागाव, म्हणजे बाकीच्यांना भय वाटेल.

²¹ आमचा पिता, ख्रिस्त येशू आणि निवडलेले देवदूत ह्यांच्यासमोर मी तुला निक्षून सांगतो: कसलाही पूर्वग्रह न ठेवता, पक्षपाताने काहीही न करता ह्या सूचना पाळ. ²² कोणावरही घाईघाईने हात ठेवू नकोस आणि दुसऱ्यांच्या पापांत वाटेकरी होऊ नकोस — स्वतःला शुद्ध राख.

²³ ह्यापुढे केवळ पाणीच पिऊ नकोस, तर तुझ्या पोटासाठी व तुझ्या वारंवार होणाऱ्या आजारांसाठी थोडा द्राक्षारस घे.

²⁴ काही माणसांची पापे उघड असतात आणि न्यायाच्या आधीच पुढे जातात; तर काहींची पापे मागाहून येतात. ²⁵ त्याचप्रमाणे चांगली कामेही उघड असतात, आणि जी तशी नसतात तीही लपून राहू शकत नाहीत.