1 Timoteo 5

5 ¹Ayaw badlonga pag-ayo ang tigulang nga lalaki, kondili hangyoa siya ingon nga usa ka amahan, ug ang mga batan-ong lalaki ingon nga mga igsoon, ²ang tigulang nga mga babaye ingon nga mga inahan, ug ang mga batan-ong babaye ingon nga mga igsoong babaye, uban sa tibuok nga kaputli.

³Pasidunggi ang mga balo nga tinuod gayod nga mga balo. ⁴Apan kon ang usa ka balo adunay mga anak o mga apo, kinahanglan una nilang makat-onan ang pagpakita ug pagtahod ngadto sa ilang kaugalingong panimalay, nga nagabayad sa ilang mga ginikanan—kini nakapahimuot sa atong Amahan. ⁵Ang tinuod nga balo, nga nag-inusara, nagabutang sa iyang paglaom sa atong Amahan, nga nagapadayon sa gabii ug adlaw sa mga pangamuyo ug mga pag-ampo. ⁶Apan ang balo nga nagkinabuhi alang sa kaugalingong kalipayan patay na bisan buhi pa siya. ⁷Ihatag usab kining mga sugo, aron sila dili kasawayan. ⁸Kon adunay tawo nga wala magtagbo sa panginahanglan sa iyang kaugalingon—ilabina sa mga sakop sa iyang panimalay—gilimod niya ang pagtuo ug labaw pa siya ka daotan kay sa usa ka dili magtutuo.

⁹Ilista ang usa ka balo kon siya nag-edad ug kan-uman ka tuig pataas ug nagmatinud-anon sa usa lamang ka bana, ¹⁰nga giila tungod sa maayong mga buhat: kon nagmatuto siya ug mga anak, nag-abiabi sa mga dumuduong, naghugas sa mga tiil sa mga balaan, mitabang sa mga nag-antos, ug naningkamot sa tanang maayong buhat.

¹¹Apan ayaw ilista ang mga batan-ong balo; kay sa dihang ang ilang mga tinguha mobira kanila gikan kang Cristo, buot silang magminyo, ¹²ug sa ingon nagdala sila ug hukom sa ilang kaugalingon tungod sa pagsalikway sa ilang unang saad. ^a a v12 Ang “ilang unang saad” nagtumong sa pasalig nga ilang gihimo sa pag-alagad kang Cristo ug sa simbahan sa dihang sila nalista sa listahan sa mga balo. ¹³Makat-on usab sila nga magtinapolan, nga magsuroy-suroy sa balay-balay—dili lamang tapolan, kondili tabian ug hilabtanon, nga nagasulti sa dili angay nilang isulti. ¹⁴Busa buot ko nga ang mga batan-ong balo magminyo, manganak, magdumala sa ilang mga panimalay, ug dili mohatag ug higayon sa kaaway sa pagpanglibak. ¹⁵Kay ang uban mibulag na aron mosunod kang Satanas. ¹⁶Kon adunay magtutuo nga babaye nga may mga balo taliwala sa iyang mga paryente, kinahanglan siyang motabang kanila, nga dili magpabug-at sa simbahan, aron kini makatabang sa tinuod nga mga balo.

¹⁷Ang mga anciano nga nangulo pag-ayo takos sa doble nga pasidungog, ilabina kadtong naghago pag-ayo sa pagwali ug sa pagpanudlo. ¹⁸Kay ang Kasulatan nag-ingon: “Ayaw busali ang baka samtang nagagiok kini,” ug “Ang mamumuo takos sa iyang suhol.”

¹⁹Ayaw dawata ang usa ka sumbong batok sa usa ka anciano gawas kon adunay pagpamatuod sa duha o tulo ka saksi. ²⁰Mahitungod sa mga nagpadayon sa pagpakasala, badlonga sila atubangan sa tanan, aron ang uban mahadlok.

²¹Hugot kong nagasugo kanimo atubangan sa atong Amahan, ni Cristo Jesus, ug sa piniling mga anghel: tumana kining mga tugon nga walay pagpihig, nga walay bisan unsang buhaton tungod sa pagpasulabi. ²²Ayaw pagdinalian sa pagpandong sa imong mga kamot kang bisan kinsa, ug ayaw pag-apil sa mga sala sa uban—tipigi ang imong kaugalingon nga putli.

²³Ayaw na pag-inom ug tubig lamang—pag-inom ug diyutayng bino alang sa imong tiyan ug sa imong masubsob nga mga sakit.

²⁴Ang mga sala sa ubang mga tawo dayag, nga nagauna ngadto sa paghukom; ang mga sala sa uban nagasunod ra. ²⁵Sa samang paagi, ang maayong mga buhat dayag usab, ug bisan kadtong dili dayag dili gayod matago.