Nani Namla Ongnu Inkhun Ding Takhwang Towo
Rupkathan ding ani Pa om inkhun danga bachu thang ding ngo, kapaisa patso rwan ding pa rwan danga khatle palwei kamaisa rwan ding unao rwan danga bachu thang ngo. Atiga chwan ding rin kakhangnu bing: rupkathan na tameinu tudan ding chui nge khatle tudan na palwei lat lou ding gaye, patso rwan ding takhwang khatle ngaaknu, balaang zana noh to ongnu ding bazan ding raaknu, khatle Timothy om bon lang zu impaang pi thang ngo.
5 1Kapaisa patso khat ding rakanga raak mako, atiyeda pa khat danga maan khou bachu thang ngo, khatle palwei rwan ding unao rwan danga, 2kamaisa patso rwan ding nu rwan danga, khatle palwei kamaisa rwan ding bathiangnu talununa unao rwan danga bachu thang ngo.
3Batak takka tameinu ongnu rwan ding takhwang towo. 4Atiyeda tameinu khatna basa rwan mak tabe basa om sa rwan amme dabe, banina kama katak bani brumza inkhun lang takhwang tonu khatle bani nu pa rwan khou lou han pinu zei ding ngo; balangbe hei nga ani Pa khou pem taknuwe. 5Batak takka tameinu ongnu, araan taknu maan gana, ani Pa khou bachun thangga, zingpha sunpha kalumga khatle hweiniga ongne. 6Atiyeda lozaan za lang ringnu tameinu gabe maan ring ong beida thi damme. 7Hei bing chongtan le diga pi thang ngo, atiga bani khou sianu rin lang maak ting ngo. 8Tudannu pakhatna bani brumza bing lang, balaang zana bain inkhun bing lang phunnu to make dabe, maanna balumsanu ding khan rwe khatle balumsa maknu mi lak pina sia kataknu gaye.
9Tameinu khatna kum somruk khak dam luga, kapaisa khatcha basan tonu ong dabe za, maan ding meng chak thang ngo, 10maan kasanu chwan bi sake ongnu ong dabe; maanna basa rwan kai lian ngaakka, bazin mi nun ding loukhut thang ngaakka, bathiangnu mi nun om khabui sui pi ngaakka, riangre khaangnu nun ding paang thang ngaakka khatle kasanu chwan balang bing ding zong ngaake.
11Atiyeda palwei tameinu rwan ding meng chak mako; balangbe bani bathainuna Christa khouna bani ding kai thou thang kaan bi, banina katha lang nwamme, 12atiga bani kama katak om karennu ding bathan sat briakpina, bani balaang zana koi thang ding lousulune. a a v12 "Bani kama katak om karennu" rinnu nga, banina tameinu list bi meng chak nong lang kaan bi Christa le rupkathan ding chwanlaang to lang bani karen thangnu lang bi rinne. 13Banina le takaatnu ong lang zeiye, in in bi seluga—takaatnu ong za makka, tu tu tam tamnu rwan khatle chwan katopnu katap tonu mi lan rwe, rin mak langnu chong ga rinne. 14Atibriakpina palwei tameinu rwanna katha langluga, basa rwan amga, bain inkhun phun chuiga khatle munanu nun khou sia lang rin lang badou chanu pi mak lang eina nwamme. 15Balangbe kasem rwan nga Seitaan nung sui langna han pak dam rwe. 16Balumsanu kamaisa khatna bain unao rwan lak pi tameinu rwan amme dabe, maanna bani ding paang thang ngo, rupkathan khou potrit pi to mako, atiye dabe rupkathanna batak takka tameinu ongnu rwan ding paang thang ngam lang nge.
17Phun chui lang phunnu chwan phunnu rwan nga takhwang kani lou thang lang khopnu rwe, balaang zana chong rinnu khatle bachu thangnu bi rakanga chwan tonu rwan ga. 18Balangbe Chongdip bi rinne, “Sen channa saang kadim ta ongnu kaan bi, bamun khwam mako,” khatle “Chwanlaang tonu mi nga balaang lo man lou thang lang khopnuwe.”
19Sake pinu mi ni mak tabe thum maak tabe, chwan phunnu khat lu chung bi koi impu thangnu chong ga za mako. 20Noh to ong bachamnu rwan ding, mi bing meithaan bi raak thang ngo, atiye dabe rwan nun le diga kachilune.
21Atibriakpina ani Pa meithaan bi, Christa Jisu khatle kathang swaknu tambaan chonglang rwan meithaan bi, eina nakhou chongtan piye: hei bing chongtan ding kama chongsem makka zeiyo, khatle kathing aih toga khatchanale to mako. 22Pakhatchanale lu chung bi hiakna kut thwei mako, khatle katei rwan om noh bi badam mako—nating bathiang lang cheksinno.
23Atun tui za in lat lanro mako—nabon lang khatle bathin ta ongnu nasa kanaa lang zu kasinnu in ngo.
24Kasem mi nun om noh ga indaoga, chong kasem lang kama seye; atiyeda katei rwan om noh ga nung sui hunglune. 25Hadanga le, kasanu chwan bing ga indaowe, khatle indao maaknu bing le diga lukpham ong lang za make.