提摩太前書 5

5 ¹唔好嚴厲責備年長嘅男人,倒要好似對父親咁勸導佢;對後生嘅男人,就當作兄弟; ²對年長嘅女人當作母親,對後生嘅女人就當作姊妹,要完全純潔咁對待佢哋。

³要尊重寡婦,就係真正無依無靠嘅寡婦。 ⁴但係如果寡婦有兒女或者孫兒女,佢哋就應該先學識喺自己家裡盡孝,報答父母嘅養育之恩,因為呢樣係我哋嘅父所喜悅嘅。 ⁵至於真正孤身一人嘅寡婦,佢將盼望寄託喺我哋嘅父身上,晝夜不停咁懇求同禱告。 ⁶但係嗰啲為住縱情享樂而活嘅寡婦,佢雖然生存,其實已經死咗。 ⁷呢啲命令你亦都要吩咐佢哋,好等佢哋無可指責。 ⁸如果有人唔供養自己嘅人,尤其係自己家裡嘅人,咁佢就係背棄咗信仰,比唔信主嘅人仲差。

⁹寡婦要登記入冊,必須至少滿六十歲,而且對一個丈夫忠貞; ¹⁰佢仲要有善行嘅好名聲:曾經養育兒女、款待客旅、替聖徒洗腳、幫助受苦嘅人,又盡力去做各樣善工。

¹¹但係後生嘅寡婦,你就唔好收佢哋入冊;因為當佢哋嘅情慾令佢哋離開基督,佢哋就想再嫁, ¹² 咁樣佢哋就自招審判,因為佢哋撇棄咗當初嘅承諾。 ^a a v12 「當初嘅承諾」係指佢哋登記入寡婦名冊嗰陣,所立下要服侍基督同教會嘅承諾。 ¹³同時佢哋亦學識咗懶惰,喺人嘅屋企周圍走;唔單止懶惰,仲講是非、多管閒事,講埋啲唔應該講嘅嘢。 ¹⁴所以我希望後生嘅寡婦再嫁,生兒育女,料理家務,唔畀對頭有機會毀謗。 ¹⁵因為已經有啲人偏離正路,轉去跟隨撒但。 ¹⁶如果有信主嘅婦人,佢嘅親戚裡面有寡婦,佢就應該供養佢哋,唔好加重教會嘅負擔,好等教會可以供養真正無依無靠嘅寡婦。

¹⁷善於治理嘅長老,值得加倍尊敬,尤其係嗰啲勤勞傳道同教導嘅人。 ¹⁸因為聖經話:「牛喺踹穀嘅時候,唔好籠住佢個嘴,」又話:「工人得工錢係應該嘅。」

¹⁹控告長老嘅指控,如果唔係有兩三個見證人,你就唔好接受。 ²⁰至於嗰啲繼續犯罪嘅人,你要喺眾人面前責備佢哋,好等其餘嘅人有所懼怕。

²¹我喺我哋嘅父、基督耶穌同蒙揀選嘅天使面前,鄭重咁囑咐你:要遵守呢啲吩咐,唔好有成見,亦唔好憑偏袒去做任何事。 ²²唔好急急咁替人按手,亦唔好沾染別人嘅罪,要保守自己清潔。

²³你唔好再淨係飲水喇,為咗你個胃同你經常有嘅病,可以飲少少酒。

²⁴有啲人嘅罪好明顯,喺佢哋受審判之前就已經顯露出嚟;但有啲人嘅罪就係之後先跟住嚟。 ²⁵同樣咁,善行都係好明顯嘅;就算唔明顯嘅,亦都唔可以永遠隱藏。