提摩太前書 4

4 ¹聖靈明明噉話：到咗後嘅日子，有啲人會離棄信仰，去聽從啲引誘人嘅邪靈同埋鬼魔嘅道理， ²呢啲道理係透過啲講大話嘅人嘅虛偽而嚟嘅，佢哋自己嘅良心已經好似俾烙鐵烙過噉麻木咗。 ³佢哋禁止人結婚，又叫人戒食某啲食物，但呢啲食物係我哋嘅父所造，係俾啲信主又明白真理嘅人帶住感恩嚟領受嘅。 ⁴因為凡係我哋嘅父所造嘅嘢都係好嘅，只要帶住感恩嚟領受，冇一樣係應該推卻嘅， ⁵因為呢啲嘢係藉住我哋嘅父嘅話語同埋禱告而成為聖潔嘅。

⁶你將呢啲事提醒啲弟兄姊妹，你就係基督耶穌一個好嘅僕人，靠住信仰嘅話語同埋你一直跟從嘅美好教導嚟得着餵養。 ⁷至於嗰啲不敬虔、無聊嘅荒誕故事，你要一概唔好理。倒不如操練自己做個敬虔嘅人。 ⁸操練身體有少少益處，但係對神嘅虔敬凡事都有益處，因為佢應許咗今生同埋來生嘅生命。 ⁹呢句話係可信嘅，完全值得人接受。 ¹⁰我哋正正係為咗呢個緣故而勞苦爭戰，因為我哋將盼望放喺永活嘅父身上，佢係萬人嘅救主，尤其係信主嘅人嘅救主。 ¹¹呢啲事你要吩咐同埋教導人。

¹²唔好俾人因為你後生就睇小你，倒不如喺言語、行為、愛心、信心同埋純潔上面，做信徒嘅榜樣。 ¹³喺我嚟到之前，你要專心公開誦讀聖經、勸勉、同埋教導。 ¹⁴唔好忽略你裡面嗰個恩賜，就係藉住預言，喺眾長老按手喺你身上嗰陣賜俾你嘅。 ¹⁵你要實行呢啲事，全心全意投入喺入面，好等大家都睇得到你嘅長進。 ¹⁶你要謹慎留意自己同埋自己嘅教導，喺呢啲事上要恆心堅持，因為你噉樣做，就會救返你自己同埋聽你嘅人。