1 Timotheo 4

4 ¹Roho Mtakatifu asema waziwazi: katika nyakati za mwisho baadhi ya watu wataiacha imani, wakisikiliza roho zidanganyazo na mafundisho ya mashetani, ²kwa unafiki wa waongo, ambao dhamiri zao wenyewe zimetiwa kovu kama kwa chuma cha moto. ³Wanakataza watu wasioe, na kuamuru wajiepushe na vyakula alivyoviumba Baba yetu ili vipokewe kwa shukrani na wale waaminio wenye kuijua kweli. ⁴Kwa maana kila kitu alichokiumba Baba yetu ni chema; wala hakuna cha kukataliwa kikipokewa kwa shukrani, ⁵kwa kuwa kinatakaswa kwa neno la Baba yetu na kwa kuomba.

⁶Ukiwakumbusha ndugu mambo haya, utakuwa mtumishi mwema wa Kristo Yesu, uliyelishwa kwa maneno ya imani na mafundisho mema uliyoyafuata. ⁷Jiepushe na hadithi zisizo za utauwa, zisizo na maana. Badala yake, jizoeze kuwa mtu wa utauwa. ⁸Mazoezi ya mwili yafaa kidogo, bali kujitoa kwa Mungu kwafaa kwa mambo yote—kukiahidi uhai wa sasa na ule ujao. ⁹Hili ni neno la kuaminika, linalostahili kukubaliwa kabisa. ¹⁰Kwa ajili ya hili twafanya kazi na kujitaabisha, kwa sababu tumeweka tumaini letu kwa Baba aliye hai, Mwokozi wa watu wote, hasa wa waaminio. ¹¹Uyaagize mambo haya na kuyafundisha.

¹²Mtu awaye yote asiudharau ujana wako, bali uwe kielelezo kwa waaminio katika usemi, mwenendo, upendo, imani, na usafi. ¹³Hata nitakapokuja, ushike sana kusomwa kwa Maandiko hadharani, kuhubiri, na kufundisha. ¹⁴Usiache kuitumia karama iliyomo ndani yako, uliyopewa kwa unabii, kwa kuwekewa mikono ya wazee. ¹⁵Yatende mambo haya na kujitoa kwake kabisa, ili maendeleo yako yaonekane na watu wote. ¹⁶Jitunze nafsi yako na mafundisho yako kwa bidii. Udumu katika mambo haya, kwa maana kwa kufanya hivyo utajiokoa nafsi yako na wale wakusikiao.