1 ጢሞቴዎስ 4

4 ¹መንፈስ ቅዱስ በግልጽ እንዲህ ይላል፤ በኋለኛው ዘመን አንዳንዶች አሳች መናፍስትንና የአጋንንትን ትምህርት በማዳመጥ ከእምነት ይለያሉ፤ ²ይህም ኅሊናቸው በጋለ ብረት እንደ ተተኰሰ በደነዘዘ ውሸታሞች ግብዝነት በኩል ነው። ³እነዚህም ጋብቻን ይከለክላሉ፤ አባታችን እውነትን በሚያውቁ አማኞች ከምስጋና ጋር እንዲቀበሉት የፈጠራቸውን ምግቦች ከመብላት እንዲታቀቡ ያዛሉ። ⁴አባታችን የፈጠረው ሁሉ መልካም ነውና፤ ከምስጋና ጋር ከተቀበሉት የሚጣል ምንም የለም፤ ⁵በአባታችን ቃልና በጸሎት ይቀደሳልና።

⁶ይህን ለወንድሞችና ለእኅቶች ብታስታውስ፣ በተከተልኸው የእምነት ቃልና በመልካም ትምህርት የተመገብህ የክርስቶስ ኢየሱስ መልካም አገልጋይ ትሆናለህ። ⁷ለእግዚአብሔር አክብሮት የሌላቸውን የከንቱ ተረቶች ራቅ፤ ከዚህ ይልቅ ራስህን እግዚአብሔርን ለመምሰል አሠልጥን። ⁸የሰውነት ማሠልጠን ለጥቂት ይጠቅማል፤ እግዚአብሔርን መምሰል ግን የአሁኑንና የሚመጣውን ሕይወት ተስፋ ስለሚሰጥ በሁሉ ነገር ይጠቅማል። ⁹ይህ የታመነና ሙሉ በሙሉ ሊቀበሉት የሚገባ ቃል ነው። ¹⁰ስለዚህም እንደክማለን፤ እንጋደላለንም፤ ምክንያቱም የሰው ሁሉ፣ ይልቁንም የአማኞች አዳኝ በሆነው በሕያው አባታችን ተስፋ አድርገናል። ¹¹ይህን እዘዝ፤ አስተምርም።

¹²ማንም ስለ ወጣትነትህ አይናቅህ፤ ነገር ግን በንግግር፣ በኑሮ፣ በፍቅር፣ በእምነትና በንጽሕና ለአማኞች ምሳሌ ሁን። ¹³እስክመጣ ድረስ፣ ቅዱሳት መጻሕፍትን በሕዝብ ፊት ለማንበብ፣ ለመስበክና ለማስተማር ራስህን ስጥ። ¹⁴ሽማግሌዎች እጃቸውን በአንተ ላይ በጫኑ ጊዜ በትንቢት የተሰጠህን በአንተ ውስጥ ያለውን ጸጋ ቸል አትበል። ¹⁵እድገትህ በሁሉ ዘንድ እንዲገለጥ ይህን አድርግ፤ በእነዚህም ነገሮች ራስህን ሙሉ በሙሉ ስጥ። ¹⁶ራስህንና ትምህርትህን በጥንቃቄ ጠብቅ፤ በዚህም ጽና፤ ይህን ማድረግህ ራስህንም የሚሰሙህንም ታድናለህና።