Ka Horar da Kanka cikin Ibada

Bulus ya yi gargaɗi game da malaman da ke hana aure da waɗansu abinci, alhali kuwa kome da Ubanmu ya yi nagari ne, ana kuma karɓarsa da godiya. Timoti zai horar da kansa ga ibada, kada ya bar kowa ya raina ƙuruciyarsa, ya karanta Nassi a bainar jama'a, ya kuma lura da rayuwarsa da koyarwarsa sosai.

Babi na 4.

Ruhu Mai Tsarki ya faɗa a fili cewa a kwanaki na ƙarshe waɗansu za su yashe bangaskiya, suna mai da hankali ga ruhohi masu ruɗi da koyarwar aljanu, ta wurin munafuncin maƙaryata waɗanda aka ƙona lamirinsu kamar da ƙarfe mai zafi. Suna hana yin aure, suna kuma umurni a guji abinci da Ubanmu ya yi domin a karɓa da godiya daga masu bi waɗanda suka san gaskiya. Gama duk abin da Ubanmu ya yi yana da kyau; ba a kin kome in an karɓa da godiya, gama ana tsarkake shi ta wurin maganar Ubanmu da kuma addu'a.

In ka tuna wa 'yan'uwa waɗannan abubuwa, za ka zama bawa nagari na Almasihu Yesu, wanda ake ciyarwa da kalmomin bangaskiya da kyakkyawar koyarwar da ka bi. Kada ka saka hannu a cikin tatsuniyoyin banza marasa bangaskiya. A maimakon haka, ka horar da kanka ga ibada. Horar da jiki yana da amfani kaɗan, amma ibada ga Allah tana da amfani a kowace hanya—tana yin alkawarin rai na yanzu da kuma rai mai zuwa. Wannan magana ce amintacciya wadda ta cancanci cikakkiyar karɓa. Gama saboda haka muke wahala, muke kuma ƙoƙari, domin mun sa bege ga Uba mai rai, Mai Ceton dukan mutane, musamman masu bi. Ka umurta, ka kuma koyar da waɗannan abubuwa.

Kada ka bar kowa yă rena ka saboda ƙuruciyarka, amma ka zama abin koyi ga masu bi cikin magana, da hali, da ƙauna, da bangaskiya, da tsabta. Sai na zo, ka mai da hankalinka ga karanta Nassi a fili, da wa'azi, da koyarwa. Kada ka yi sakaci da baiwar da take cikinka, wadda aka ba ka ta wurin annabci, sa'ad da dattawa suka ɗibiya hannuwansu a kanka. Ka aikata waɗannan abubuwa, ka kuma ba da kanka gaba ɗaya gare su, domin kowa yă ga cin gabanka. Ka kula da kanka da kyau, da kuma koyarwarka. Ka ci gaba da haka, gama in ka yi haka za ka ceci kanka da kuma masu sauraronka.