1 KuThimothewu 4

4 ¹uMoya oNgcwele usho ngokucacile: ezikhathini ezizayo abanye bayakulishiya ukholo, banake imimoya ekhohlisayo nezimfundiso zamademoni, ²ngobuzenzisi babaqambimanga abazunyezwa izazela zabo kungathi zishiswe ngensimbi evuthayo. ³Benqabela ukushada, bafune ukuba kudedwe ukudla uBaba wethu akwenza ukuba kwamukelwe ngokubonga ngabakholwayo abaziqondayo iqiniso. ⁴Ngokuba konke uBaba wethu akwenza kuhle; akukho okumele kulahlwe uma kwamukelwa ngokubonga, ⁵ngokuba kungcweliswa yizwi likaBaba wethu nangomthandazo.

⁶Khumbuza abazalwane ngalezi zinto, khona uyakuba yinceku enhle kaKhristu uJesu, ondliwe ngamazwi okholo nangemfundiso enhle oyilandelayo. ⁷Ungabi nabudlelwano nezinganekwane eziyize eziphambene nokwesaba uNkulunkulu. Kunalokho, ziqeqeshe ukuba umesabe uNkulunkulu. ⁸Ukuqeqesha umzimba kusiza kancane, kodwa ukuzinikela kuNkulunkulu kusiza ngazo zonke izindlela—kuthembisa ukuphila manje nokuphila okuzayo. ⁹Lokhu kuyizwi elithembekileyo elifanele ukwamukelwa ngokugcwele. ¹⁰Ngokuba yikho lokhu esisebenzela kanzima futhi silwela, ngoba sibekile ithemba lethu kuBaba ophilayo, uMsindisi wabantu bonke, ikakhulukazi abakholwayo. ¹¹Yala ufundise lezi zinto.

¹²Makungabikho muntu okudelelayo ngenxa yobusha bakho, kodwa yiba yisibonelo kwabakholwayo ekukhulumeni, ekuziphatheni, othandweni, okholweni, nasekuhlanzekeni. ¹³Kuze ngifike, zinikele ekufundeleni abantu imiBhalo, ekushumayeleni, nasekufundiseni. ¹⁴Ungalunaki isiphiwo esikuwe, owasinikwa ngesiprofetho, kubekwa izandla zamalunga phezu kwakho. ¹⁵Yenza lezi zinto, uzinikele ngokugcwele kuzo, ukuze wonke umuntu abone ukuqhubeka kwakho. ¹⁶Ziqaphe wena nemfundiso yakho ngokucophelela. Phikelela kulokhu, ngokuba ukwenza njalo kuyakusindisa wena nabakuzwayo.