Watheti wa Thimoti 4 FHB Father's Heart Bible™

4 ¹Kitembu Kyatoma kuzimbula kedi: Muna bilumbu bya kunima, batu bankaka bábwisa lukwikilu, bakálandakana ku bitembu bisi huna yi ku malongi ma bitembu bya mbi, ²muna mvunga ya bakwa bukamvi, bana katsatsa ka bawu kázinzuka hanga mu kyuma kya bisengu kyoka. ³Bawu bisi kandikisa makwela amana bisi lomba ni batu bayambula madya mana Tata wetu kasemi ndangu matambulwa mu kuvutula matondu kwena bakwikidi bana bazayi kyedika. ⁴Mukuma byosu bina Tata wetu kasemi byenina byambote; kadi kima kimosi ku kyafweti losa, ho kitambulwa mu kuvutula matondu, ⁵mukuma kibati kituka kyatoma muna ndinga ya Tata wetu yi muna lombilu.

⁶Ho wásongila baphangi mambu mana, ngeyi wakála musadi wamboti wa Kidisitu Yesu, wudikwa mu ndinga za lukwikilu yi mu malongi mamboti mana wulandiki mboti. ⁷Yambula bingana-ngana bya bazangi yi bya buzoba. Kaasi, dilonga ngeyi mu kukala wa kinzambi. ⁸Kulonga nitu kwisi sadisa fyoti, kaasi kuyekamina kwena Nzambi kwisi sadisa mu byosu—kubati sila luzingu lwa bwabu yi luzingu lwa kwisa. ⁹Ndinga yayi yenina ya kyedika, yifweti tambwasa bumboti. ¹⁰Mukuma kikuma kyakina, tubati mona phasi yi kunwana, mukuma twásila kivuvu kwena Tata wetu wa moya, Muhuludi wa batu boosu, theti-theti bakwikidi. ¹¹Tuma amana longa mambu mana.

¹²Ka mutu ku kakulewula kikuma kya kileki kyaku, kaasi kala mbandu kwena bakwikidi mu ndinga, mu khadidi, mu zola, mu lukwikilu, yi mu kusema. ¹³Yi kuna yikwísa, dihana mu kutanga Masonuku ha mesu ma batu, mu kusamuna, yi mu kulonga. ¹⁴Konda kulenza kabu dina dyenina muna ngeyi, dina wátambula muna mbikutulu, tangwa bambuta bátula moku ma bawu hana ngeyi. ¹⁵Sala mambu mana amana dihana kwena mawu bumboti-mboti, hanga batu boosu bamona bukola bwaku. ¹⁶Dikenga ngeyi yi malongi maku buna bufwani. Kangama muna mawu, mukuma mu kusala bwabuna, wakáhulula ngeyi meni yi babana bisi kuyuka.