Mühghaü to Souhatbüa No Lolo Tangtishi

Paulei yak lebü hoba shabü sou shuong thangetlabü lenbou shuong shangabü tetenkei, aishanga seneibü Bouei kümbü ajanjan pendou maibü ki hoba thangtet yoan sungletda. Timoti Mühghaü to souhatbü yeila lolo tangtishi, müt cheei haoeibü younak to teshela, Saopobü Lai müt pendou thedanga joyokei, hoba haoeibü langkei si lenbü aeto hinseian chühashi.

Chapter 4.

Soushou Saopobüei shangashatko lauda, latetche jiha atei khüpettibü soushou shuong hoba shabü sou shuongeibü songlen to aweko, mailem abanglabü. Ho kho, lolo sensimaang wanei namkaangei kangan kibü yepeibü shuongeibü yepbü danko loulabü. Haoenei yak lebü thangetlabü, hoba ngühmai ngebü mailembü shuongei thangtet yoan sungletla shanga seneibü Bouei kümbü shaubü shuong, shaula athükkei dogo laulabü. Aishanga seneibü Bouei kümbü ajanjan pendou maibü ki; hoba thangtet yoan sungletla kialonga aieikei apyola athükkei, aishanga kho seneibü Bou ngüh hoba welaubü danko saüenkuda.

Habü thinei jaisinasi shuong to ngetiashi, hoba no mailem ngüh hoba no phai sembü maibü songlenei shautian, Khrista Jisu maibü khangenbou che yinglabü. Asaopobü hoba ngoubü ngühphatbü shuong yoa aiche teki. Aeiko, Mühghaü to souhatbü yeila no lolo tangtishi. Mang tangtibü kho shisho thuida, lausikei Mühghaü to ngühmaanglanbü kho ajanjan pendoua thuida; tat langkei hoba loulabü langkei to thekuda. Ho mailemlabü ngüh ki, hoba khümboa sungletla mubü. Aishanga ho shanga senei unda hoba janda; aishanga senei müt pendou, kongnyu mailembü shuongeibü Khümenbou kibü langkei Bou to maanglembei. Habü thinei sakkushi hoba lenashi.

No mütao shanga aoeikei no amangsenjan, lausikei ngüh, kümsilei, sanou, mailem hoba hinseibü, no mailembü shuong la chühshangbü che yingshi. Ngo asühshongko, noknyüh thedanga Laishiba lenbü, ngekbü hoba lenbü to no lolo ngühmaanglanshi. No to kibü jongsak, thuseibü ngüh danko hoba jaishou shuongei no thüka ik shatan kubü kho, temaawailet. Habü thinei kümashi hoba khübüa no lolo khümboa kuashi, khei no thedanga paibü kho pendouei haplabü lele. No lolo hoba no lenbü to maangsangko chühshi; khübü to ponpen kishi, aishanga khei kümbüei no hoba no ngüh ditbü shuong ham khümenlabü.