1 Timothy 4

4 ¹Manglā Katharana tharlak eina hānga: khaleiwui atamli mi kaikhana mikhanama manglābing kala kameobingwui tamkachitheili nganātitkhuida, shitkasang chi horhaora. ²Hi kakapik mibingwui phākakhaning eina shokra; athum khalattawui ning chi kakhayak mari eina sheikakai kathāda mangthonhaira. ³Athumna ngalā khui khavai mahaphaira, kala khamashung theibing shitkasangbingna ningshi eina khuisang khavai ithumwui Avāna sākahai kashakazā chi masha khavai hānga. ⁴Kaja ithumwui Avāna sākahai saikora kaphāna; ningshi eina khuisang tharan khikha horkhavai maleimana, ⁵kaja ithumwui Avāwui tui eina kala seihā kasā eina chi tharngasakhaira.

⁶Hikathā hi ivānaongarāli theingasaklu, chithākha na shitkasangwui tui kala nawui shurkahai kaphā tamkachithei eina thaotunhai, Khrista Jishuwui kaphā rao ngasāra. ⁷Vareli makathei, mangkhama̱ khararchān chikatha chili khikhikhala maleilu. Chiwui mahutli, dharma sākhavai nakhalatta tamchitheilu. ⁸Phasā tamchitheina tateo ngachona, kha Vareli kaphaninga ara mirin kala rāki kharingla ngashitmida, apong saikorali ngachona. ⁹Hi shitsangkapai chānsam tuina, kala peida khuisang samphangkhangayina. ¹⁰Chiwui vang eina ithumna ot sāda hotnai, kaja ithumna kharinga Avā, mi saikorawui Huikhame, mataimeikapta shitkasangbingwui Huikhameli chihāna. ¹¹Hikathā tui hi ningkhamilu kala tamchitheilu.

¹²Na nganuilakhawui vang khipānakha nali maningkachai ngasaklu, kha tuimatui, acham-aram, leikashi, shitkasang kala ningkatharli shitkasangbingwui ngayoyan sāphalungra. ¹³I rāranglakha eina tangda, mibingwui mangāli Kathara tui pākasa, pao hākashok kala tamkachitheili ningyāng chigatlu. ¹⁴Khamarān eina, khararnaobingna nali pāng somda mikahai nawui lungli khalei lemmet chi mahengsangalu. ¹⁵Hikathā hi sāchinglu kala chili nakhalatta peida chigatlu, chithākha mi saikorana nana mangā vāngasak kahai chi theira. ¹⁶Nakhalatta kala nawui tamkachithei chi nganātitkhuilu. Hili ngasochinglu, kaja chithāda sāda nakhalattala kala nawui kashābingli huimira.