Avā Shimli Yaokahomabing
Kathānabingli pānkhavai hi khangachāng maningla kha mirin ngasāna. Churchwui kathāna chi sui makakā, malungnimkaphā, lupāli ningchangnā maleila, kala awui shimkhur mathada khangarān ngasāphalungra; deaconbingli rida chāng yangfalu. Ithumwui Avāwui shimkhurli Timothyna kathada sāmameirakhala kaji theikhui khavai Paulna kagapina, kala Khristawui maramli laa akha hāngchitheia.
3 1Hi shitsangkapai chānsam tuina: Kachikathāna yaokahoma sākhavai ningkachāng leiakha, a khayākakā otsak chi sāngaiching. 2Chieina yaokahoma hi shāt makā, apreiva̱li chisin, khalatta ngarin, chamsin katheia, ayat unglak eina, kha̱mimāli ngahānkatha, tamchithei katheia mi sāphalungra. 3Khamarip masāphalungmara, khangashao masāphalungmara kha malungnim, makharar, kala lupāli makhangamar mi sāphalungra. 4Ana khayākakā katonga eina anaongarāli hamsang ngasakda, khalattawui shimkhur chi kaphā eina kachingphalungra. 5Kaja kachikathā mi akhana khalattawui shimkhur chi kaching matheiakha, ithumwui Avāwui churchli kathada ana yangmira? 6A onkahai kadhar mi masāphalungmara, maningakha a langsoda, chipeena samphang kahai khonshāt akhamāngli phanshokpaishina. 7Chieina a mashitkasangbingwui alungli khamaso samphangphalungra, chithākha a maikashi kala chipeewui khalenli maphanshokmara.
8Deaconbingnala ning khani makasā, drakhāra̱ tarākha mangli mazang, kakhayak tongzā khavai makhangamar, kala ningkā khavai sāphalungra. 9Athumna tharzā kahai mashun-makhui eina shitkasangwui khangathuma chi singtitphalungra. 10Athumnala rida chāng tamyang ngasakphalungra; chieina athum shāt makā da theihaiakha, deacon sāda otram ngatha̱ranu. 11Chithada sāda sha̱naobingnala khayāshi khavai, morkasāp masāphalungmara, kha ngarakzakhai kala ot saikorali chisin sāphalungra. 12Deacon hi apreiva̱li chisin sāda, anaongarā eina khalattawui shimkhur chi kaphā eina kachingphalungra. 13Otram phālak eina ngatha̱ deaconbingna khalattawui vang khamaso kala Khrista Jishuli shitkasangwui vang khamataia ning khanganung samphangra.
Ithumwui Shitkasangwui Alungli Khangathuma
14Ina nawuili thākta rāra da chihānda leisālala, hikathā tui hi nali kagapina. 15Kha ina kharā hunkha, ithumwui Avāwui shimkhurli kathada zatphalungra da nana theira; chi shimkhur chiya kharinga Avāwui church, khamashungwui pakra̱ kala shimphungna. 16Kachangkhat eina, Vareli dharmarinwui khangathuma chi khamataia: A phasā kāda rāhaowa, Manglā Katharana ali khamashunga da mayaihai, kazingraobingna ali theihai, yurbingli hāshokhaira, okathui peichaoda ali shitsanga, tekhamatei eina khāngmathothaira. a a v16 Hi kharethangwui shitkasang laa hi Jishuwui pongli sai—asāli rā kahai a, khamashunga da theikhui kala tekhamatei eina khāngmathothai; hiwui alungli "a" da matui saikora Jishuli kahāngna.
