Vatariri muImba yaBaba vedu

Unhu, kwete kugona, ndihwo hunokodzeresa vatungamiri. Mutariri anofanira kuva asina chaangapomerwa, munyoro, asina makaro, uye anokwanisa kutungamirira imba yake pachake; vadhikoni vanotanga kuedzwa. Pauro anonyora kuti Timoti azive mazvibatiro aanofanira kuita mumba maBaba vedu, uye anotaura rwiyo pamusoro paKristu.

Chitsauko 3.

Heino tsumo yakavimbika: ani naani anoshuva kuva mutariri anoda basa rakanaka. Saka mutariri anofanira kuva asina chaanopomerwa: akatendeka kumukadzi wake, ane njere, anozvidzora, ane hunhu, anogamuchira vaeni, anokwanisa kudzidzisa. Asingadhakwi, asingaiti chisimba asi ari munyoro, asingakakavari, uye asingadi mari. Anofanira kutonga imba yake zvakanaka, achiita kuti vana vake vateerere nokukudzwa kwose, nokuti kana munhu asingazivi kutonga imba yake, achachengeta sei kereke yaBaba vedu? Haafaniri kuva munhu achangotendeuka, kuti arege kuzvikudza agowira mukutongwa kumwe cheteko kwadhiabhorosi. Anofanirawo kuva nemukurumbira wakanaka kuvari kunze, kuti arege kuwira mukunyadziswa nomumusungo wadhiabhorosi.

Madhikoni awo anofanira kukudzwa, asina hunyengeri, asingadi waini zhinji, asingakariri pfuma inonyadzisa. Anofanira kubatisisa chakavanzika chokutenda nehana yakachena. Iwowo anofanira kutanga aedzwa; ipapo, kana achinge aonekwa asina chaanopomerwa, ngaashumire somadhikoni. Saizvozvowo vakadzi vanofanira kukudzwa, vasingacheri vamwe, asi vane njere uye vakatendeka pazvinhu zvose. Dhikoni anofanira kuva akatendeka kumukadzi wake uye anofanira kutonga vana vake neimba yake zvakanaka. Madhikoni anoshumira zvakanaka anozviwanira chinzvimbo chakanaka nokutsunga kukuru pakutenda muna Kristu Jesu.

Chakavanzika Chiri Pamwoyo peKutenda Kwedu

Ndiri kukunyorera mirayiridzo iyi, kunyange ndichitarisira kuuya kwauri nokukurumidza. Asi kana ndikanonoka, uchaziva kuti munhu anofanira kuzvibata sei muimba yaBaba vedu, inova kereke yaBaba vapenyu, mbiru nenheyo yechokwadi. Zvisingarambiki, chakavanzika chokunamata Mwari chikuru: iye akaonekwa panyama, akaruramiswa noMweya Mutsvene, akaonekwa nevatumwa, akaparidzwa pakati pendudzi, akatendwa munyika yose, akakwidzwa mukubwinya. ^a