Kunyengeterera Vanhu Vose
Pauro anotanga akumbira kuti munyengetero uitirwe vanhu vose, kusanganisira madzimambo, nokuti Baba vedu vanoda kuti vanhu vose vaponeswe, uye murevereri mumwe, Kristu Jesu, akazvipa nokuda kwavose. Ipapo varume vanofanira kunyengetera vasina hasha, uye vakadzi vapfeke zvine mwero, vadzidze vakanyarara, uye varege kudzidzisa.
2 1Saka, pakutanga kwazvo, ndinokurudzira kuti zvikumbiro, minyengetero, kureverera, nokuvonga zviitirwe vanhu vose, 2nokuda kwamadzimambo navose vari muchigaro choutongi, kuti tirarame upenyu hune rugare norunyararo, mukunamata Mwari kuzere nomururemekedzo. 3Izvi zvakanaka uye zvinofadza Baba vedu, Muponesi wedu, 4ivo vanoda kuti vanhu vose vaponeswe uye vasvike pakuziva chokwadi. 5Nokuti pana Baba vamwe chete, nomurevereri mumwe chete pakati paBaba navanhu, iye munhu Kristu Jesu, 6iye akazvipa sorudzikinuro nokuda kwavose—uchapupu hwakapiwa panguva yakafanira. 7Nokuda kwaizvozvi ndakaitwa muparidzi nomupostori—ndiri kutaura chokwadi, handisi kureva nhema—mudzidzisi wamarudzi mukutenda nomuchokwadi. 8Ndinoda kuti varume munzvimbo dzose vanyengetere, vachisimudza maoko matsvene vasina kutsamwa kana gakava.
9Saizvozvo, vakadzi ngavapfeke zvakafanira, vane mwero nokuzvidzora, kwete nebvudzi rakarukwa, negoridhe, namaparera, kana nenguo dzinodhura, 10asi namabasa akanaka, sezvakafanira vakadzi vanopupura kuti vanonamata Baba vedu. 11Mukadzi ngaadzidze akanyarara, achizviisa pasi zvizere. 12Handitenderi mukadzi kudzidzisa kana kuva nesimba pamusoro pomurume; asi ngaagare akanyarara. 13Nokuti Adhamu ndiye akatanga kuumbwa, tevere Evha. 14Uye Adhamu haana kunyengerwa, asi mukadzi ndiye akanyengerwa akava mudariki. 15Asi achaponeswa nokubereka vana, kana vakarambira mukutenda, norudo, noutsvene, nokuzvidzora. a a v15 Chisazita chinoshanduka kubva pa‘iye’ kuenda pa‘ivo’ — sezvazviri mumagwaro okutanga — zvichida chichireva vakadzi pakazhinji vanorambira mutsika idzi dzakanaka.