1 Timothy 2

2 ¹Rimeikapta, mi saikorawui vang kapo, seihā kasā, mi vang ngakao kala ningkashi sāmi khavai ina pongai. ²Awungabing kala pangshap leiping saikorawui vangla seihā sāmilu, chithākha ithumna dharma kala khayākakā unglak eina chingri va̱ri kahai eina ringra. ³Hi kaphāna, kala ithumwui Huikhame Avāli ningyāng ungngasaka. ⁴Ana mi saikora huikhui khavai kala khamashung theikhui khavai ngasakngai. ⁵Kaja Avā akhamānga, kala Avā eina miwui ngachaili tuisak sāme akhamānga, mikumo Khrista Jishuna, ⁶ana saikorawui vang ngatangman sāda akhalatta mihaira. Hi retkahai atamli khami shākhina. ⁷Ina khamashung matuira, makapikmana: hiwui vang ili paokaphā hākashok, paokazata, kala shitkasang kala khamashung eina miyurbingli ojā sākhavai kapangkhuihaira. ⁸Ina apam kachiva̱li mayarnaobingna malungkhavāt kala ngayāt maleila kathara pāng khāngkāda seihā sāmi khavai ngasakngai.

⁹Chithada sāda, sha̱naobingna khayākashi kala khalatta khangarin eina, khayā eina kashankachon ngasāphalungra, sam hākharikta, sinā, muktā, lah khamathā kashankachon eina maningla, ¹⁰kha ithumwui Avāli khangacheena khuisang sha̱naobingli ngarān kahai thada, kaphā otsak eina ngasāphalungra. ¹¹Sha̱naona hamsang unglak eina, va̱ri kahai eina tamkhuiphalungra. ¹²Ina sha̱naoli mayarnaobingli tamchithei lah pangshap leikhavai mamayāmana; kha ana va̱ri kahai eina leiphalungra. ¹³Kaja Adamli khare sākhui, chiwui thili Eveli sākhui. ¹⁴Kala Adam mamikhanammana, kha sha̱naova mikhanam sāda morei kaphunga ngasāhaowa. ¹⁵Kha athumna shitkasang, leikashi, kathar kala khalatta khangarin eina zangakha, ana naokhara̱wui mangā eina huikhuira. ^a a v15 Kachihān-tui 'ana' china 'athum' eina kharok—khare tuili leikahai thada—hikathā kaphā acham-aram eina ngachon sha̱nao saikorali hāngpai jikahaina.