Kulombila batu boosu
Pholu wálomba theti ni bisambu bisalama kikuma kya batu boosu, kumosi yi bakyamvu, mukuma Tata wetu wuzodi ni batu boosu bahúluka, amana mukhundingisi mosi, Kidisitu Yesu, wádihana yandi-meni kikuma kya boosu. Buna bayakala balombila konda khabu, amana bakhetu bavwata miledi buna bufwani, balonguka mu talala, amana balongaku.
2 1Buna, theti, yiluhekini kikesa ni bizitu, bisambu, bilomba bya kulombila batu, yi matondu bisalama kikuma kya batu boosu, 2kikuma kya bakyamvu yi boosu bena yi kiyeka, hanga twazínga luzingu lwa ngemba yi talala, mu kinzambi kyosu yi luzitu. 3Mama menina mamboti amana masephidisa Tata wetu, Muhuludi wetu, 4wuna wuzodi ni batu boosu bahúluka amana bazaya kyedika. 5Mukuma, Tata kenina mosi, amana mukhundingisi mosi kenina ha kati dya Tata yi batu, mutu wuna Kidisitu Yesu, 6wuna wádihana yandi-meni mu phila ya kukatula batu boosu mu kihika—kimbangi kina kihanami muna tangwa dyafwana. 7Kikuma kya mama, bátsikununa yikala mbambala yi thumwa—yizimbula kyedika, mbatiku huna—mulongi wa makanda mu lukwikilu yi kyedika. 8Nzodi ni bayakala mu bifulu byosu balombila, mu kutombula moku matoma konda khabu yi ntendani.
9Phila mosi, bakhetu bavwata miledi buna bufwani, mu luzitu yi kukanga kwa mbundu, heku mu tsuki za kuluka, keti wolu, keti misanga, keti miledi mya thalu, 10kaasi mu mihangu mya bukheti, bwosu bufwani kwena bakhetu bana bisi samuna bweya mwena Tata wetu. 11Mukhetu kalonguka mu talala, mu kulemvuka kwosu. 12Yisiku sisa mukhetu kalonga keti kukala yi hamu hana thandu ya yakala; kaasi, kadibata. 13Mukuma, Atamu wáhangama theti, amana Eva. 14Amana Atamu kahunamiku, kaasi mukhetu wádihuna amana wákituka mutu wa kukulula mitsiku. 15Kaasi kahúluka muna nzila ya kubuta bana, Yuka ni bánanga mu lukwikilu, lungongu, kudisemisa, yi kukanga kwa mbundu. a a v15 Mpandu ya nkumbu yisobidi tuka «yandi» yakula «bawu» — bwosu bwenina muna ndinga yatheti — nanga yisi songila bakhetu boosu bana bisi kwamina muna bikalulu byabina bya mboti.
