Kũhooera Andũ Oothe

Paulo mbere nĩaromba mahooya mahooywo nĩ ũndũ wa andũ othe, o na athamaki, tondũ Ithe witũ nĩekwenda andũ othe mahonoke, na mũiguithania ũmwe, Kristũ Jesũ, nĩeerutire nĩ ũndũ wa othe. Thuutha ũcio arũme mahooe matarĩ na marakara, nao andũ-a-nja mehumbe na ũtheru, merute maakirĩte, na matikarute andũ.

Gĩcunjĩ 2.

Mbere ya maũndũ mothe, nĩngũmũringĩrĩria atĩ mathaithana, na mahooya, na gũthaithanĩrĩra andũ, na gũcookia ngaatho, iheanagĩrwo andũ oothe, nĩ ũndũ wa athamaki na arĩa oothe marĩ na wathani, nĩ geetha tũtũũre mũtũũrĩre wa thaayũ na wa hooreri, tũrĩ na wĩtigĩri Ngai mũkinyanĩru na gĩtĩĩo. Ũndũ ũyũ nĩ mwega na nĩ wa gũkenia Ithe witũ, Mũhonokia witũ, ũrĩa wendaga andũ oothe mahonoke na mamenye ũhoro wa ma. Amu kũrĩ Ithe ũmwe, o na mũiguithania ũmwe gatagatĩ ka Ithe na andũ, nake nĩ mũndũ Kristũ Jesũ, ũrĩa eeheanire we mwene atuĩke ũkũũri wa andũ oothe—naguo ũcio nĩ ũira ũrĩa waheanirwo ihinda rĩrĩa rĩagĩrĩire. Na nĩ ũndũ wa ũguo-rĩ, nĩndatuirwo mũhunjia na mũtũmwo—ngwaria ma, ndiraheenania—na mũrutani wa ndũũrĩrĩ thĩinĩ wa wĩtĩkio na ũhoro wa ma. Nĩ ngwenda atĩ arũme kũndũ guothe mahooyage, makĩambararia mooko matheru na igũrũ, hatarĩ marakara kana ngarari.

O ũndũ ũmwe, atumia nĩmagĩrĩirwo nĩ kwĩhumba nguo iria ciagĩrĩire, marĩ na thoni na kwĩrigĩrĩria, no ti na njuĩrĩ cia kũogwa, kana thahabu, kana ruru, kana nguo cia goro mũno, no nĩmagĩrĩirwo nĩ ciĩko njega, o ta ũrĩa kwagĩrĩire atumia arĩa moimbũraga atĩ nĩmatĩĩte Ithe witũ. Mũtumia nĩerutage na kĩhooreri, enyiihĩtie biũ. Niĩ ndietĩkĩrĩtie mũtumia arutane kana aathe mũndũ mũrũme; no nĩaikarage akirĩte. Amu Adamu nĩwe wombirwo mbere, Hawa agĩcooka. Na Adamu tiwe waheenirio, no nĩ mũtumia ũrĩa waheenirio, agĩtuĩka mũrengeeri wa watho. No nĩakahonokio nĩ ũndũ wa gũciara ciana, mangĩkorwo matũũrĩte marĩ na wĩtĩkio, na wendo, na ũtheru, marĩ na kwĩrigĩrĩria. ^a