१ तीमथ्य 2

2 ¹ तर मग, सर्वांत प्रथम मी अशी विनंती करतो की, सर्व माणसांसाठी विनवण्या, प्रार्थना, मध्यस्थी व उपकारस्तुती करण्यात याव्यात; ² राजांसाठी व अधिकारावर असलेल्या सर्वांसाठी, म्हणजे आपण पूर्ण भक्तिभावाने व प्रतिष्ठेने शांत व स्वस्थ जीवन जगावे. ³ हे आमचा पिता, आमचा तारणारा, याला चांगले व संतोषकारक आहे; ⁴ त्याची इच्छा आहे की सर्व माणसांचे तारण व्हावे आणि त्यांनी सत्याचे ज्ञान प्राप्त करावे. ⁵ कारण एकच पिता आहे, आणि पिता व मानवजात यांच्यामध्ये एकच मध्यस्थ आहे, तो म्हणजे ख्रिस्त येशू हा मनुष्य; ⁶ त्याने सर्वांसाठी खंडणी म्हणून स्वतःला दिले — योग्य वेळी दिलेली ही साक्ष. ⁷ यासाठीच मला उपदेशक व प्रेषित नेमण्यात आले — मी खरे सांगतो, खोटे बोलत नाही — विश्वासात व सत्यात राष्ट्रांचा शिक्षक असा मला नेमले. ⁸ माझी इच्छा आहे की प्रत्येक ठिकाणी पुरुषांनी राग व वाद न करता पवित्र हात वर करून प्रार्थना करावी.

⁹ त्याचप्रमाणे, स्त्रियांनी विनयशीलतेने व संयमाने योग्य पेहराव करावा; गुंफलेले केस, सोने, मोती किंवा मौल्यवान वस्त्रे यांनी नव्हे, ¹⁰ तर सत्कृत्यांनी नटावे, जसे आमच्या पित्याविषयी भक्तिभाव बाळगणाऱ्या स्त्रियांना शोभते. ¹¹ स्त्रीने पूर्ण अधीनतेने, शांतपणे शिकावे. ¹² स्त्रीने शिकवावे किंवा पुरुषावर अधिकार गाजवावा, याला मी परवानगी देत नाही; उलट, तिने शांत राहावे. ¹³ कारण आदाम प्रथम घडवला गेला, नंतर हव्वा. ¹⁴ आणि आदाम फसवला गेला नाही, तर स्त्री फसवली गेली व अपराधी ठरली. ¹⁵ तरी ती बाळंतपणाच्या द्वारे तारली जाईल — जर त्या विश्वास, प्रेम व पवित्रता यांत संयमाने राहिल्या तर. ^a a v15 सर्वनाम 'ती' पासून 'त्या' असे बदलते — मूळ मजकुरातल्याप्रमाणे — बहुधा या सद्गुणांत टिकून राहणाऱ्या सर्वसामान्य स्त्रियांना उद्देशून.