Kupempherera Anthu Onse
Choyamba Paulo apempha kuti mapemphero apangidwe kwa anthu onse, kuphatikizapo mafumu, popeza Atate wathu afuna kuti anthu onse apulumuke, ndipo nkhoswe imodzi, Khristu Yesu, anadzipereka yekha chifukwa cha onse. Kenako amuna apemphere opanda mkwiyo, ndipo akazi avale mwaulemu, aphunzire mwakachetechete, ndipo asaphunzitse.
2 1Choyamba, ndithu, ndikukulimbikitsani kuti madandaulo, mapemphero, mapempho operekera ena, ndi mayamiko zichitidwe chifukwa cha anthu onse, 2chifukwa cha mafumu ndi onse amene ali ndi ulamuliro, kuti tikhale ndi moyo wa mtendere ndi wabata, mu umulungu wonse ndi ulemu. 3Ichi nchabwino ndi chokondweretsa Atate wathu, Mpulumutsi wathu, 4amene afuna kuti anthu onse apulumutsidwe ndi kudza kudziwa choonadi. 5Pakuti Atate ndi mmodzi, ndipo pali mkhalapakati mmodzi pakati pa Atate ndi anthu, munthu Khristu Yesu, 6amene anadzipereka Yekha dipo la onse—umboni woperekedwa pa nthawi yake yoyenera. 7Pa ichi ine ndinaikidwa kukhala mlaliki ndi mtumwi—ndinena choonadi, sindinama—mphunzitsi wa mitundu ya anthu mu chikhulupiriro ndi choonadi. 8Ndifuna kuti amuna pa malo onse apemphere, akukweza manja oyera popanda mkwiyo kapena mkangano.
9Chimodzimodzinso, akazi avale moyenera, modzichepetsa ndi modziletsa, osati ndi tsitsi loluka, golidi, ngale, kapena zovala zamtengo wapatali, 10koma ndi ntchito zabwino, monga mmene kuyenera kwa akazi amene avomereza kuopa Atate wathu. 11Mkazi aphunzire mwakachetechete, modzichepetsa kwathunthu. 12Sindilola mkazi kuphunzitsa kapena kukhala ndi ulamuliro pa mwamuna; koma akhale chete. 13Pakuti Adamu anapangidwa poyamba, kenaka Hava. 14Ndipo Adamu sanapusitsidwe, koma mkazi anapusitsidwa nakhala wolakwa. 15Koma adzapulumutsidwa pobereka ana, ngati akhalabe mu chikhulupiriro, chikondi, chiyero, pamodzi ndi kudziletsa. a a v15 Mau oyimira dzina asintha kuchoka pa 'iye' kupita pa 'iwo'—monga mu mawu oyambirira—mwina akunena za akazi onse amene apitiriza mu makhalidwe abwino amenewa.
